មេរៀន ការកែតម្រូវគណនី

            គេធ្វើការកែតម្រូវទៅល់អន្តរការណ៍ទាំងឡាយណាដែលមានទំនាក់ទំនងទៅនឹងគណនី ប្រភេទចំណូលឬប្រភេទចំណាយដែលកើតឡើងច្រើនជាងមួយការិយបរិច្ឆេទ (ការកែតម្រូវអាចប្រើទិន្នាប្បវត្តទូទៅដើម្បីកត់ត្រាជាទម្រង់ទិន្នាប្បវត្តទូទៅ) ។

            ការកែតម្រូវចែកចេញជា៤ប្រភេទដូចខាងក្រោម ៖

            ១- ការកែតម្រូវដើម្បីបែងចែកតម្លៃដែលបានកត់ គេចែកចេញជាពីរករណី ៖

• ចំពោះទ្រព្យមានរំលស់ គេធ្វើការកែតម្រូវដោយយកគណនី២ទ្វេភាគគ្នាជានិច្ចគឺ គណនីចំណាយរំលស់ កត់ត្រាខាងឥណពន្ធ និងគណនីរំលស់បន្ថែមកត់ត្រាខាងឥណទាន ចំណែកឯទឹកប្រាក់បានមកពីការគណនាសម្រាប់កាលបរិច្ឆេទនីមួយៗ ដោយប្រើវិធីសាស្រ្ត Straight line method ។
• ​ចំពោះទ្រព្យមិនគិតរំលស់ ចំពោះទ្រព្យប្រភេទនេះគេធ្វើការកែតម្រូវដោយយកគណនី២ទ្វេភាគគ្នាជានិច្ច គឺគណនីប្រភេទទ្រព្យកត់ត្រាខាងឥណទាន និងគណនីប្រភេទចំណាយកត់ត្រាខាង ឥណពន្ធ ចំណែកឯទឹកប្រាក់ដែលទ្រព្យនោះបានប្រើប្រាស់រួចហើយនៅក្នុងកាលបរិច្ឆេទនោះ ។

២- កត់ដើម្បីបែងចែកចំណូលមិនទាន់សម្រេច ចំពោះការកែតម្រូវប្រភេទនេះគេត្រូវយកគណនី២ទ្វេភាគគ្នា គឺគណនីចំណូលមិនទាន់សម្រេចកត់ត្រាខាងឥណពន្ធ និងគណនីចំណូលសម្រេចកត់ត្រាខាងឥណទាន ចំណែកឯទឹកប្រាក់ត្រូវកត់ត្រាគឺជាទឹកប្រាក់ដែលក្នុងកាលបរិច្ឆេទនោះបានក្លាយមកជាចំណូលសម្រេច ពីចំណូលមិនទាន់សម្រេច ។

៣- កត់ចូលដើម្បីកត់ត្រាចំណាយដែលមិនទាន់បានកត់ ការកែតម្រូវប្រភេទនេះគេត្រូវយកគណនី ២ ទ្វេភាគគ្នា គឺគណនីប្រភេទចំណាយកត់ត្រាខាងឥណពន្ធ និងគណនីប្រភេទបំណុលកត់ត្រាខាងឥណទានចំណែកឯទឹកប្រាក់ ដែលត្រូវកត់ត្រាគឺជាទឹកប្រាក់ដែលក្នុងកាលបរិច្ឆេទនោះបានក្លាយទៅជាចំណាយ ប៉ុន្តែមិនទាន់បានបង់លុយឲ្យគេ ។

៤- កត់ចូលដើម្បីកត់ត្រាចំណូលដែលមិនទាន់បានកត់ ការកែតម្រូវប្រភេទនេះ គេត្រូវយកគណនី ២ ទ្វេភាគគ្នាគឺគណនីប្រភេទទ្រព្យដែលជាឥណនេយ្យ កត់ត្រាខាងឥណពន្ធ និងគណនីប្រភេទចំណូលកត់ត្រាខាងឥណទាន ។