សំណួរ-ចម្លើយ ជំពូកទី៣ លិខិតបទដ្ឋាន (ភាគ៩)

សំណួរ

៤១- តើទម្រង់នៃប្រកាសមានអ្វីខ្លះ ?

៤២- តើចំណែកដើមនៃប្រកាសមានអ្វីខ្លះ ?

៤៣- តើខ្លឹមសារនៃប្រកាសបែងចែកជាអ្វី ?

៤៤- តើប្រកាសមានគំរូដូចម្តេច ?

៤៥- ដូចម្តេចហៅថាដីកា ?

ចម្លើយ

៤១- ទម្រង់នៃប្រកាសមាន៣ផ្នែក ៖ ចំណែកដើម ខ្លឹមសារ និងរូបមន្តបញ្ចប់ ។

៤២- ចំណែកដើមនៃប្រកាសរួមមានឈ្មោះហៅផ្លូវការនៃប្រទេស និងបាវចនា និមិត្តសញ្ញាស្ថាប័ន ប្រភព លេខ និងអក្សរកាត់ ចំណងជើង មុខងារ មន្រ្តីដែលជាអ្នកចេញ ប្រកាស ការចុះឯកសារយោង រូបមន្តសម្រេច ។

៤៣- ខ្លឹមសារនៃប្រកាស​ត្រូវបែងចែកជាប្រការ ត្រូវចុះលេខប្រការ ។ ក្នុងប្រការចុងក្រោយ ត្រូវបញ្ជាក់អាជ្ញាធរដែលទទួលបន្ទុកអនុវត្តប្រកាស គឺអគ្គលេខាធិការ អគ្គនាយក ប្រធាននាយកដ្ឋានពាក់ព័ន្ធ អភិបាលខេត្តក្រុង.......អាជ្ញាធរនានា ។

៤៤- គំរូប្រកាស

                                                               ព្រះរាជាណាចក្រកម្ពុជា

                                                            ជាតិ សាសនា ព្រះមហាក្សត្រ

ក្រសួងសេដ្ឋកិច្ច និង ហិរញ្ញវត្ថុ និង

ក្រសួងសង្គមកិច្ច​ អតីតយុទ្ធជន និងយុវនីតិសម្បទា

លេខៈ............................

                                                                    ប្រកាសអន្តរក្រសួង

                                                                               ស្តីពី

                                     ការកំណត់ និងកែសម្រួលប្រាក់ឧបត្ថម្ភគោលនយោបាយប្រចាំខែ

                                                          ជូនកូនរបស់គ្រួសារជនពលី និងមរណៈ

                                                 ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ

                                            រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា

• បានឃើញរដ្ឋធម្មនុញ្ញ នៃព្រះរាជាណាចក្រកម្ពុជា
• បានឃើញព្រះរាជក្រឹត្យលេខ នស/រកត/០៧០២/១២៤. ចុះថ្ងៃទី១៥ ខែកក្កដា ឆ្នាំ២០០៤ ស្តីពីការតែងតាំងរាជរដ្ឋាភិបាលនៃព្រះរាជាណាចក្រកម្ពុជា
• បានឃើញព្រះរាជក្រមលេខ ០២/នស/៩៤ ចុះថ្ងៃទី២០ ខែកក្កដា ឆ្នាំ១៩៩៤ ដែលប្រកាសឲ្យប្រើច្បាប់ស្តីពីការរៀបចំ និងប្រព្រឹត្តទៅនៃគណៈរដ្ឋមន្រ្តី
• បានឃើញព្រះរាជក្រមលេខ នស/រកម/០១០៥/០០១ ចុះថ្ងៃទី១៧ ខែមករា ឆ្នាំ២០០៥ ដែលប្រកាសឲ្យប្រើច្បាប់ស្តីពីការបង្កើតក្រសួងសង្គមកិច្ច អតីតយុទ្ធជន និងយុវនីតិសម្បទា
• បានឃើញអនុក្រឹត្យលេខ ៥៥ អនក្រ.បក. ចុះថ្ងៃទី០៨ ខែមេសា ឆ្នាំ២០០៥ ស្តីពីការរៀបចំ និងប្រព្រឹត្តទៅរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា
• បានឃើញព្រះរាជក្រមលេខ នស/រកម/០១៩៦/១៨ ចុះថ្ងៃទី២៤ ខែមករា ឆ្នាំ១៩៩៦ ដែលប្រកាសឲ្យប្រើច្បាប់ស្តីពីការបង្កើតក្រសួងសេដ្ឋកិច្ច និងហិរញ្ញវត្ថុ
• បានឃើញអនុក្រឹត្យលេខ ០៤ អនក្រ.បក. ចុះថ្ងៃទី២០ ខែមករា ឆ្នាំ២០០០ ស្តីពីការរៀបចំ​ និង្ប្រព្រឹត្តទៅរបស់ក្រសួងសេដ្ឋកិច្ច និងហិរញ្ញវត្ថុ
• បានឃើញអនុក្រឹត្យលេខ ៧៨ អនក្រ.បក ចុះថ្ងៃទី១៨ ខែធ្នូ ឆ្នាំ២០០៤ ស្តីពីការបំពេញបន្ថែម និងកែសម្រួលនាយកដ្ឋានមួយចំនួននៃក្រសួងសេដ្ឋកិច្ច និងហិរញ្ញវត្ថុ
• បានឃើញអនុក្រឹត្យលេខ ០៨ អនក្រ.បក. ចុះថ្ងៃទី២៦ ខែមករា ឆ្នាំ២០០៧ របស់រាជរដ្ឋាភិបាល ស្តីពីរបបឧបត្ថម្ភចំពោះយោធិនពាលី មរណៈ បង្កស្លាប់ បាត់ខ្លួន និងពិការ
• បានឃើញសេចក្តីសម្រេច ២០ សសរ. ចុះថ្ងៃទី៣០ ខែមករា ឆ្នាំ១៩៩១ របស់ក្រុមប្រឹក្សារដ្ឋមន្រ្តី ស្តីពីរបបនយោបាយចំពោះជនពាលី ពិការ និងលិខិតលេខ ៥១៥ សជណ អវ. ចុះថ្ងៃទី២០ ខែមីនា ឆ្នាំ១៩៩១ របស់រដ្ឋមន្រ្តី ទទួលបន្ទុកខុទ្ធកាល័យក្រុមប្រឹក្សារដ្ឋមន្ត្រី
• យោងមតិណែនាំដ៏ខ្ពង់ខ្ពស់ របស់សម្តេចនាយករដ្ឋមន្រ្តី ក្នុងកិច្ចប្រជុំពេញអង្គគណៈរដ្ឋមន្រ្តីនៅថ្ងៃទី១៩ ខែមករា ឆ្នាំ២០០៧
• យោងចំណារដ៏ខ្ពង់ខ្ពស់របស់សម្តេចនាយករដ្ឋមន្ត្រី ចុះថ្ងៃទី២៩ ខែមករា ឆ្នាំ២០០៧ លើលិខិតលេខ ២៩៩ សហវ.ចុះថ្ងៃទី២៥ ខែមករា ឆ្នាំ២០០៧ របស់ក្រសួងសេដ្ឋកិច្ច និងហិរញ្ញវត្ថុ ។

                                                                                 សម្រេច

ប្រការ ១ - ត្រូវបានតំឡើងប្រាក់ឧបត្ថម្ភគោលនយោបាយប្រចាំខែ ជូនកូនគ្រួសារជនពាលី និងមរណៈ

                 របស់អតីតយោធិន នៃកងយោធពលខេមរភូមិន្ទ  និងកងកម្លាំងនគរបាលជាតិពី ៤,០០០ រៀល

                (បួនពាន់រៀល) ទៅ ៨,០០០ រៀល (ប្រាំបីពាន់រៀល) សម្រាប់កូនម្នាក់ ។

ប្រការ ២ -  បទបញ្ញត្តិណា ដែលផ្ទុយនឹងខ្លឹមសារនៃប្រការ១ ខាងលើត្រូវទុកជានិរាករណ៍ ។

ប្រការ ៣ - ប្រកាសអន្តរក្រសួងនេះ មានសិទ្ធភាពអនុវត្ត ចាប់ពីថ្ងៃទី០១ ខែមករា ឆ្នាំ២០០៧នេះតទៅ ។

រាជធានីភ្នំពេញ ថ្ងៃទី ១៥ ខែ មីនា ឆ្នាំ ២០០៧

               ទេសរដ្ឋមន្រ្តី                                                                                              រដ្ឋមន្រ្តី

រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ                                      ក្រសួងសង្គមកិច្ច អតីតយុទ្ធជន និងយុវនីតិសម្បទា

             ហត្ថលេខា ត្រា                                                                                      ហត្ថលេខា ត្រា

កន្លែងទទួល

- អគ្គលេខាធិការព្រឹទ្ធសភា

- អគ្គលេខាធិការដ្ឋានរដ្ឋសភា

- ខុទ្ធកាល័យសម្តេចនាយករដ្ឋមន្ត្រី

- ទីស្តីការគណៈរដ្ឋមន្រ្តី

- សាលាខេត្ត-ក្រុង ដើម្បីអនុវត្ត

- ឯកសារ-កាលប្បវត្តិ

៤៥- ដីកា គឺជាលិខិតចែងពីបទប្បញ្ញត្តិ ឬជាលិខិតឯកត្តភូត ចេញដោយអភិបាលរាជធានី-ខេត្ត ក្រុង-ស្រុក-ខណ្ឌ និង ឃុំ-សង្កាត់ ក្នុងដែនសមត្ថកិច្ចរបស់ខ្លួន ។ អភិបាលរាជធានី-ខេត្ត អាចចេញដីកាក្នុងបញ្ហាអ្វីមួយ លុះត្រាតែគាត់មាននីតិសម្បទាក្នុងបញ្ហានោះ ដែលចែងដោយ ព្រះរាជក្រឹត្យ ប្រកាស ។ ប៉ុន្តែបើពុំមានលិខិតបទដ្ឋានណាមួយ ជាមូលដ្ឋានទេ អភិបាលរាជធានី-ខេត្ត អាចចេញដីកាសម្រេចលើកិច្ចការអ្វីមួយ ដែលស្ថិតក្នុងមុខការជាធម្មតារបស់គាត់ ។

តភាគ