សំណួរ-ចម្លើយ មេរៀនទី២ ឥរិយាបថអ្នកប្រើប្រាស់ (ភាគ២)

សំណួរ

៧- អ្វីទៅជាកំលាំងជំរុញតាមការឧបត្ថម្ភ ?

៨- អ្វីទៅជាឥរិយាបថក្នុងការទិញ ?

៩- តើអ្វីទៅជាដំណើរប្រព្រឹត្តនៃការធ្វើសេចក្តីសម្រេចចិត្តទិញ ?

១០- តើការធ្វើសេចក្តីសម្រេចចិត្តទិញ អ្នកប្រើប្រាស់ត្រូវឆ្លងកាត់ប៉ុន្មានជំហាន ? អ្វីខ្លះ ?

១១- តើមានកត្តាអ្វីខ្លះ ដែលមានឥទ្ធិពលលើការសម្រេចចិត្តទិញ ?

១២- តើការធ្វើសេចក្តីសម្រេចចិត្តមានលក្ខណៈវិនិច្ឆ័យប៉ុន្មានប្រភេទ ?

ចម្លើយ

៧- កំលាំងជំរុញតាមការឧបត្ថម្ភ គឺផ្អែកលើភាពស្មោះត្រង់របស់អតិថិជន ។ វាជំរុញអ្នកប្រើប្រាស់ទិញទំនិញដែលមានផ្លាកសញ្ញាណដែលខ្លួនទុកចិត្តបំផុត អ្នកប្រើប្រាស់បង្កើតកំលាំងជំរុញតាមភាពឧបត្ថម្ភសម្រាប់ហេតុផលជាច្រើន ។ ការទិញតាមភាពឧបត្ថម្ភ គឺមិនសម្រាប់តែរបស់ធំដុំ ឬរបស់ថ្លៃនោះទេ ចំណុចសំខាន់ដែលត្រូវចងចាំ អ្នកដែលត្រូវបានជំរុញដោយការឧបត្ថម្ភគឺជាអ្នកជំនួយដ៏ស្មោះនៃផលិតផល សេវា ឬផ្លាកសញ្ញា ។

៨- ឥរិយាបថក្នុងការទិញ ពិពណ៌នាដំណើរនៃការសម្រេចចិត្ត និងសកម្មភាពនៃអតិថិជនក្នុងការទិញ និងប្រើប្រាស់ផលិតផល ។ អ្នកម៉ាឃីធីងដឹងថា វាគឺជាភាពប្រសើរក្នុងការយល់នូវដំណើរដែលអតិថិជនត្រូវឆ្លងកាត់ពេលជ្រើសរើសផលិតផល ឬសេវាដែលវាអា​ចជួយអតិថិជនក្នុងការសម្រេចចិត្តបានប្រសើរបំផុត ។

៩- ដំណើរប្រព្រឹត្តនៃការធ្វើសេចក្តីសម្រេចចិត្តទិញ គឺជាដំណើរដែលអ្នកប្រើប្រាស់ប្រមូលព័ត៌មាន និងធ្វើការជ្រើសរើសក្នុងចំណោមជម្រើសជាច្រើន ។

១០- ការធ្វើសេចក្តីសម្រេចចិត្តទិញ អ្នកប្រើប្រាស់ត្រូវឆ្លងកាត់៥ជំហានគឺ ៖

• ការទទួលស្គាល់បញ្ហា ទីមួយអ្នកប្រើប្រាស់ត្រូវស្គាល់តម្រូវការ និងសេចក្តីប្រាថ្នា ឬបញ្ហា ។
• ការស្រាវជ្រាវព័ត៌មាន បន្ទាប់មកអ្នកប្រើប្រាស់ត្រូវប្រមូលព័ត៌មានអំពីដំណោះស្រាយដែលត្រូវជ្រើសរើសតាមរយៈប្រភពផ្សេងៗជាច្រើន ។
• ការវាយតម្លៃជម្រើសផ្សេងៗ ក្រោយពីប្រមូលព័ត៌មាន អ្នកប្រើប្រាស់វាយតម្លៃជម្រើសជាច្រើនដើម្បីកំណត់ ថាតើណាមួយប្រសើរជាងគេ​ ។ ជួនកាលវាពាក់ព័ន្ធដល់ការសង្ខេបព័ត៌មាន ប្រៀបធៀបគុណសម្បត្តិ និងគុណវិបត្តិនៃជម្រើសនីមួយៗ ។
• ការសម្រចចិត្តទិញ ប្រសិនបើជម្រើសសមស្របអាចទៅរួចហើយនោះ អ្នកប្រើប្រាស់និងរើសយកផលិតផលណាមួយ ហើយធ្វើការទិញ ។
• ការវាយតម្លៃក្រោយពេលទិញ នៅចំណុចនេះ អ្នកប្រើប្រាស់វិនិច្ឆ័យការបំពេញតម្រូវការ ឬមិនបំពេញតម្រូវការជាមួួយនឹងផលិតផលដែលបានទិញ ។

១១- កត្តាដែលមានឥទ្ធិពលលើការសម្រេចចិត្តទិញមានដូចជា ៖

• បុគ្គលិកលក្ខណៈ កត្តាមានឥទ្ធិពលទីមួយគឺបុគ្គលិកលក្ខណៈ ។ បុគ្គលិកលក្ខណៈ គឺជាលំនាំនៃការកំណត់យ៉ាងល្អ និងឋិតថេរនៃឥរិយាបថ​ ។ បុគ្គលិកលក្ខណៈមានឥទ្ធិពលលើការសម្រេចចិត្តទិញ ពីព្រោះមនុស្សម្នាក់ៗមានមូលដ្ឋាននៃចំណូលចិត្តផ្អែកលើលំនាំឥរិយាបថរបស់ពួកគេ ។
• ស្រទាប់សង្គម សំដៅដល់រចនាបថជីវិត តម្លៃ និងជំនឿដែលសំដៅចំពោះក្រុមនៃមនុស្សណានោះ ។​ ស្រទាប់សង្គមត្រូវបានកំណត់ដោយកម្រិតចំណូល ឬភាពនៃអ្នកជិតខាង ។
• បរិយាកាសវប្បធម៌ កត្តាមានឥទ្ធិពលទីបី គឺបរិយាកាសវប្បធម៌ ។ វប្បធម៌គឺជាក្រុមនៃជំនឿ ឬអាកប្បកិរិយាដែលបានឆ្លងជាតំណាក់កាលពីជំនាន់មួយទៅជំនាន់មួយទៀត ។
• ក្រុមពីគ្រោះ គឺជាក្រុមឬអង្គភាពដែលជាបុគ្គលទទួលយកតម្លៃ និងអាកប្បកិរិយា ។ វាអាចរួមមាន អ្នកមាន អ្នកល្បីឈ្មោះផងដែរ ។

១២- ការសម្រេចចិត្តនិងដំណើររបស់វាប្រែប្រួលដោយឡែកៗ យោងទៅតាមតម្រូវការនៃអ្នកទិញផលិតផល និងស្ថានភាពនៃការទិញ ។ ការសម្រេចចិត្តរបស់អ្នកប្រើប្រាស់ត្រូវបានចាត់ថ្នាក់ជាលក្ខណៈវិនិច្ឆ័យបីយ៉ាងធំៗគឺ ៖

• ឥរិយាបថឆ្លើយតបដដែលៗ ពាក់ព័ន្ធដល់ការទិញផលិតផលដោយមិនមានការគិតគូរច្រើន ។ ឥរិយាបថប្រភេទនេះ គឺអតិថិជនធ្វើសេចក្តីសម្រេចសឹងតែដោយស្វ័យប្រវត្តិ ពីព្រោះគេបានផ្សារភ្ជាប់ជាមួយការសម្រេចចិត្តទិញផលិតផលដដែលនេះច្រើនដងរួចមកហើយ ។
• ការធ្វើសេចក្តីសម្រេចចិត្តមានព្រំដែន គឺត្រូវបានអនុវត្តដោយអ្នកប្រើប្រាស់ ពេលគេបានស្គាល់និងមានបទពិសោធន៍ក្នុងការទិញផលិតផលណានោះខ្លះហើយ ។ ការនេះកើតឡើងពេលដែលមានផលិតផលថ្មីមួយ ឧទ្ទេសនាមចំពោះអតិថិជនស្រដៀងនិងផលិតផលដែលអ្នកប្រើប្រាស់ធ្លាប់ទិញ ។ ព័ត៌មាននិងការវាយតម្លៃបន្ថែមចំពោះផលិតផលថ្មីនេះ គឺសំខាន់បំផុតមុនពេលជ្រើសរើសយក និងសម្រេចចិត្តទិញ ។
• ការសម្រេចចិត្តធំទូលាយ គឺជាស្ថានភាពនៃការទិញដែលការសម្រេចចិត្តពាក់ព័ន្ធដល់ភាពមានថ្លៃខ្ពស់ មិនបានស្គាល់ពីមុន ។