តើនរណាខ្លះមានសញ្ជាតិជាខ្មែរ?

ជនដែលត្រូវបានចាត់ទុកជាសញ្ជាតិខ្មែរមានដូចជា៖

១- ទោះបីជាកើតនៅទីណាក៏ដោយ

• កូនមានខាន់ស្លា ដែលកើតពីម្តាយឬឪពុកមានសញ្ជាតិខ្មែរ
• កូនឥតខាន់ស្លាដែលកើតពីម្តាយ ឬពីឪពុកដែលមានសញ្ជាតិខ្មែរទទួលស្គាល់
• កូនដែលម្តាយឪពុកមិនទទួលស្គាល់ កាលបើតុលាការបានចេញសាលក្រមថាកូននេះពិតជាកើតពីម្តាយ ឬឪពុកដែលមានសញ្ជាតិខ្មែរ

២- ត្រូវបានសញ្ជាតិខ្មែរ ដោយកើតនៅក្នុងព្រះរាជាណាចក្រកម្ពុជា

• កូនដែលកើតពីម្តាយ និងឪពុកបរទេសដែលកើតនិងរស់នៅស្របច្បាប់ក្នុងព្រះរាជាណាចក្រកម្ពុជា
• កូនដែលកើតពីម្តាយឪពុកមិនស្គាល់ និងកូននឹងកើតដែលគេរើសបាននៅក្នុងព្រះរាជាណាចក្រកម្ពុជា ត្រូវចាត់ទុកថាកើតនៅក្នុងព្រះរាជាណាចក្រកម្ពុជាដែរ។
• ស្ត្រី ឬបុរសបរទេសដែលយកប្តី ឬប្រពន្ធខ្មែរដោយបានរៀបអាពាហ៏ពិពាហ៏អាចទាមទារសញ្ជាតិខ្មែរបានលុះត្រាតែស្ត្រី ឬបុរសនោះរស់នៅជាមួយគ្នាអស់រយៈពេលបីឆ្នាំ ក្រោយពេលចុះសំបុត្រអាពាហ៍ពិពាហ៍។
• ប្រជាពលរដ្ឋខ្មែរមិនបាត់សញ្ជាតិតខ្មែរ ដោយសារការរៀបអាពាហ៍ពិពាហ៍ជាមួយជនបរទេសទេ។