សំណួរ
១. តើប្អូនត្រូវធ្វើអ្វីខ្លះ ដើម្បីទទួលបានសេចក្តីសុខសុភមង្គល ក្នុងក្រុមគ្រួសាររបស់ប្អូន ?
២. ហេតុអ្វីបានជាគេនិយាយថា ការកែប្រែមិត្តភក្តិឱ្យប្រាសចាកអំពើអាវាសែ ជាសកម្មភាពចូលរួមអភិវឌ្ឍសង្គមជាតិ ?
៣. ដូចម្តេចហៅថាអំពើហិង្សាក្នុងគ្រួសារ ? ទម្រង់នៃអំពើហិង្សាក្នុងគ្រួសារមានដូចម្តេចខ្លះ ?
ចម្លើយ
១. ដើម្បីទទួលបានសេចក្តីសុខ សុភមង្គល ក្នុងក្រុមគ្រួសាររបស់ខ្ញុំៗត្រូវ ៖
- ស្តាប់បង្គាប់ដំបូន្មានឪពុកម្តាយ
- ស្តាប់ និងយល់គ្នាទៅវិញទៅមក
- ចេះជួយសម្រាលការងារឪពុកម្តាយ ឬក្រុមគ្រួសារ
- មិនត្រូវមើលបំណាំគ្នានៅក្នុងគ្រួសារនោះទេ
- ចេះស្រឡាញ់បងប្អូន ជួយការពារគ្នា
- ចេះបង្កបរិយាកាសសប្បាយរីករាយក្នុងគ្រួសារ
- មិនបង្កការលំបាកដល់ក្រុមគ្រួសារ
- ចេះថែទាំទ្រព្យសម្ភារៈក្នុងគ្រួសារ
- ចេះដោះស្រាយបញ្ហាផ្សេងៗ ដោយសន្តិវិធី មិនប្រើហិង្សា
- មិនបង្កបញ្ហាក្នុងគ្រួសារ ។
២. បានជាគេនិយាយថាការកែប្រែមិត្តភក្តិឱ្យប្រាសចាកអំពើអាវាសែ ជាសកម្មភាពចូលរួមអភិវឌ្ឍសង្គមជាតិព្រោះ ៖
- វាបានចូលរួមចំណែកកាត់បន្ថយនិងបំបាត់អំពើអសកម្មអសុវត្ថិភាព អសន្តិសុខក្នុងសង្គម
- ដើម្បីឱ្យជននោះក្លាយខ្លួនជាធនធានមនុស្សល្អក្នុងសង្គមជាតិបច្ចុប្បន្ននេះត្រូវការណាស់នូវធនធានមនុស្សដើម្បីបម្រើសង្គមជាតិ
- អ្នកទាំងនោះជាសសរទ្រូង ឬជាទំពាំងស្នងឫស្សី
- ជួយពួកគេឱ្យចំណេញប្រាក់កាស ពេលវេលា កម្លាំងកាយ ចិត្ត អនាគតភ្លឺស្វាងត្រចះត្រចង់
- ជួយកាត់បន្ថយភាពក្រីក្រក្នុងសង្គម ។
៣. ក. អំពើហិង្សាក្នុងគ្រួសារ សំដៅយកអំពើហិង្សាណាដែលកើតឡើងរវាងប្តីប្រពន្ធ កូនៅក្នុងបន្ទុក និងជនទាំងឡាយណាស្ថិតនៅក្រោមដំបូលផ្ទះតែមួយ ។
ខ. អំពើហិង្សាក្នុងគ្រួសារមានទម្រង់ ដូចខាងក្រោម ៖
១. អំពើហិង្សាផ្លូវកាយ គឺការបង្ករឱ្យមានរបួសស្នាមដូចជា ៖
- ការសម្លាប់
- ការវាយដំ ការទាត់ធាក់ ធ្វើទារុណ្ឌកម្មលើផ្លូវកាយ
- ការបាញ់ប្រហារ ។
២. អំពើហិង្សាផ្លូវចិត្ត គឺការ ៖
- ប្រើពាក្យទ្រគោះបោក បញ្ឈី ផ្គើន ដៀមដាម ប្រមាថ
- រើសអើង
- ពាក្យគំរាមកំហែង បង្ករភាពអាម៉ាស់មុខ ការបៀតបៀនកេរ្តិ៍ខ្មាស់ ជេរបញ្ចោរអាសអាភាសដែលប៉ះពាល់ផ្លូវចិត្ត
- ឬសកម្មភាពណាដែលជម្រុញឱ្យជន រងគ្រោះធ្វើអត្ថឃោត
៣. អំពើហិង្សាផ្នែកជីវភាពសេដ្ឋកិច្ច គឺការ ៖
- គាបសង្កត់ពុំផ្តល់លុយប្រពន្ធ ឬប្តី ដើម្បីរ៉ាប់រងការចំណាយផ្សេងៗរបស់គ្រួសារ
- ការបង្ខិតបង្ខំដល់ជនរងគ្រោះ ដើម្បីយកលុយកាក់ឱ្យខ្លួនក្រោមលក្ខខណ្ឌរបស់ខ្លួនពុំសមហេតុផល
- ការបំផ្លេចបំផ្លាញទ្រព្យសម្បត្តិគ្រួសាររ (បោកឆ្នាំង បោកចាន..)
- លួចទ្រព្យសម្ភារៈរបស់របរក្នុងផ្ទះយកទៅលក់ បញ្ចាំ
- បង្ខាំងមិនឱ្យចេញទៅប្រកបមុខរបរផ្សេងៗ ។
៤. អំពើហិង្សាផ្នែកផ្លូវភេទ ៖ គឺការ ៖
- ចាប់បង្ខំរំលោភភេទ សេពសន្ថវៈ
- បំពានលើស្រ្តីនៅពេលមានទំណមផ្លូវភេទ ដូចជា មានផ្ទៃពោះ ពេលអស់រដូវ...
- មិនរវល់ផ្លូវភេទ សោះអង្គើយ...។
