សំណួរ-ចម្លើយ រដ្ឋបាលទូទៅ មន្រ្តីរាជការស៊ីវិលនៃក្រសួងមហាផ្ទៃ (ភាគ៣)

សំណួរ

១១- តើអ្វីដែលហៅថានីត្យានុកូលភាព ?

១២- តើនីតិវិធីនៃការបង្កើតរដ្ឋាភិបាលបន្ទាប់ពីជាប់ឆ្នោតមានប៉ុន្មានរូបមន្ត ? អ្វីខ្លះ ?

១៣- តើអ្វីជាគោលបំណងនៃការបង្កើតរដ្ឋាភិបាល ?

១៤- ដូចម្តេចដែលហៅថាវិមជ្ឈការ?

១៥- ដូចម្តេចដែលហៅថាវិសហមជ្ឈការ?

ចម្លើយ

១១- នីត្យានុកូលភាព គឺជាភាពដែលស្របច្បាប់ ជាភាពដែលត្រូវច្បាប់ចំណែកការដែលធ្វើខុសពីនេះ គឺហៅថាធ្វើខុសច្បាប់ ។

១២- នីតិវិធីនៃការបង្កើតរដ្ឋាភិបាលបន្ទាប់ពីជាប់ឆ្នោតមាន ២ រូបមន្ត ៖

• ទី១ ៖ បង្កើតសភារួច ទើបបង្កើតរដ្ឋាភិបាលតាមក្រោយ តាមសម្លេង៥០%បូកមួយ តាមរយៈការបោះឆ្នោតជាសម្ងាត់ ។
• ទី២ ៖ បង្កើតរដ្ឋសភា និងរដ្ឋាភិបាលក្នុងពេលតែមួយ តាមរយៈការបោះឆ្នោតជាកញ្ចប់ ។

១៣- ការគោលបំណងនៃការបង្កើតរដ្ឋាភិបាលមានដូចជា ៖

• ដើម្បីការពារផលប្រយោជន៍ប្រជាជន រដ្ឋាភិបាលត្រូវរិះរកគ្រប់វិធីដើម្បីពង្រឹងច្បាប់ ឱ្យមានប្រសិទ្ធភាពក្នុងគោលបំណងការពាផលប្រយោជន៍ប្រជាជនទូទៅ ។
• ដើម្បីការពាអាយុជីវិត កិត្តិយស សេចក្តីថ្លៃថ្នូររបស់ពលរដ្ឋឱ្យរួចផុតពីការធ្វើទុក្ខទោសពីអ្នកដទៃ ហើយនែនាំឱ្យប្រជាពលរដ្ឋធ្វើតែអំពើល្អ ដើម្បីសង្គមមានការរីកចម្រើននិងអភិវឌ្ឍន៍ ។
• ដើម្បីលើកស្ទួយសុខុមាលភាពប្រជាជន ចូលរួមធ្វើវិភាគទានសម្រាប់ សុខុមាលភាព ការអប់រំ ថែទាំសុខភាព និងផ្តល់សេវាកម្មជូនប្រជាពលរដ្ឋទូទៅ ។
• ដើម្បីថែរក្សាការពារ មរតក វប្បធម៌ ទំនៀមទំលាប់ប្រពៃណី អត្តសញ្ញាណជាតិ លើកស្ទួយ ទស្សនកិច្ចជាតិ ក្នុងគោលបំណងឱ្យប្រជាពលរដ្ឋចេះស្រលាញ់អ្វីដែលជាតិមាន និងផ្សព្វផ្សាយ កេរ្តិ៍ឈ្មោះប្រទេសកម្ពុជាលើឆាកអន្តរជាតិឱ្យពិភពលោកបានស្គាល់កម្ពុជាកាន់ច្បាស់ ។

១៤- វិមជ្ឈការ គឺជាប្រព័ន្ធគ្រប់គ្រងដែលរាជរដ្ឋភិបាលប្រគល់នូវភាពជាម្ចាស់លើមុខងារសិទ្ធិអំណាច ការទទួលខុសត្រូវ និងធនធាន (ហិរញ្ញវត្ថុ ទ្រព្យសម្បត្តិ និងបុគ្គលិក ) ឱ្យទៅក្រុមប្រឹក្សានៅថ្នាក់ក្រោមជាតិ ដូចជាក្រុមប្រឹក្សារាធានី ក្រុមប្រឹក្សាខេត្ត ក្រុមប្រឹក្សាស្រុក ក្រុមប្រឹក្សាក្រុង ក្រុមប្រឹក្សាខណ្ឌ ក្រុមប្រឹក្សាឃុំ ក្រុមប្រឹក្សាសង្កាត់ ដើម្បីឆ្លើយតបទៅនឹងតម្រូវការការរបស់មូលដ្ឋាន។

១៥- វិសហមជ្ឈការ មានន័យថា រាជរដ្ឋាភិបាលក្រសួង ស្ថាប័ន ធ្វើប្រតិភូម្មមុខ ងារ សិទ្ធិអំណាច និងធនធាន (ហរិញ្ញវត្ថុ ទ្រព្យសម្បត្តិ និងបុគ្គលិក) ទៅអង្គភាព ក្រោមបង្គាប់ឬទៅក្រុមប្រឹក្សាប្រភេទណាមួយ ដើម្បីអនុវត្តមុនងារនេះក្នុងនាម រាជរដ្ឋាភិបាល ក្រសួង ឬស្ថាប័ននោះ។ ក្នុងន័យនេះភាពជាម្ចាស់មិនបានផ្តល់ជូន អង្គភាពក្រោមបង្គាប់ឬក្រុមប្រឹក្សាឡើយ។ រាជរដ្ឋាភិបាលឬក្រសួងស្ថាប័ននៃរាជរ ដ្ឋាភិបាលបានរក្សាភាពជាម្ចាស់នោះ។

តភាគ