សំណួរ
១១- តើនាយកដ្ឋានរបបគយមានតួនាទីអ្វីខ្លះ ?
១២- តើច្រកគយមានប៉ុន្មានច្រក ? អ្វីខ្លះ ?
១៣- តើឯកសារចាំបាច់ក្នុងការបំពេញប្រតិវេទន៍គយមានអ្វីខ្លះ ?
១៤- ចូររៀបរាប់ពីនីតិវិធីនៃការនាំចេញទំនិញដោយបំពេញបែបបទនៅមាត់ច្រកផ្លូវសមុទ្រ/ផ្លូវទន្លេ ?
១៥- តើលិខិតសុំតវ៉ាប្រឆាំងកំណត់ហេតុគយត្រូវមានព័ត៌មានអ្វីខ្លះ ?
ចម្លើយ
១១- នាយកដ្ឋានរបបគយមានតួនាទីដូចជា ៖
- ចូលរួមរៀបចំគោលនយោបាយគ្រប់គ្រងសកម្មភាពវិនិយោគ និងសកម្មភាពនាំចេញ-នាំចូលទំនិញរបស់អង្គការ ស្ថានទូត ស្ថាប័នរដ្ឋ និងបុគ្គលផ្សេងៗទៀតតាមរបបគយអនុគ្រោះ
- ត្រួតពិនិត្យនិងគ្រប់គ្រងការចេញលិខិតអនុញ្ញាតនាំចេញ-នាំចូលទំនិញតាមរបបគយអនុគ្រោះនានា តាមការកំណត់របស់អគ្គនាយកដ្ឋាននិងរដ្ឋាករ ព្រមទាំងមានភារកិច្ចតាមដានត្រួតពិនិត្យ ការប្រើប្រាស់សម្ភារបរិក្ខារ និងទំនិញគ្រប់ប្រភេទដែលទទួលបានការអនុគ្រោះនានាតាមទិសដៅដែលបានកំណត់
- ចាត់ចែងត្រួតពិនិត្យជាក្រោយលើប្រតិវេទន៍ និងឯកសារភ្ជាប់ ហើយសរុបលទ្ធផលនិងលើកឡើងនូវវិធានការសមស្របក្នុងករណីចាំបាច់
- បំពេញបេសកកម្មផ្សេងទៀត តាមការណែនាំរបស់ក្រសួងសេដ្ឋកិច្ចនិងហិរញ្ញវត្ថុ ។
១២- ច្រកគយមាន៤ច្រកគឺ ៖
- ច្រកក្រហម
- ច្រកលឿង
- ច្រកបែតង
- ច្រកខៀវ ។
១៣- ឯកសារចាំបាច់ក្នុងការបំពេញប្រតិវេទន៍គយមានដូចជា ៖
ក- ឯកសារត្រូវភ្ជាប់ជាមួយប្រតិវេទន៍គយរួមមាន ៖
- វិក្កយបត្រ និងបញ្ជីវេចខ្ចប់
- ឯកសារដឹកជញ្ជូន
ខ- ក្នុងករណីតម្រូវចាំបាច់
- និវេទន៍ប័ណ្ណ
- អាជ្ញាប័ណ្ណ
- លិខិតអនុញ្ញាត
- វិញ្ញាបនបត្រដើមកំណើតទំនិញ
- វិញ្ញាបនបត្រធានារ៉ាប់រងនិង
- ឯកសារពាក់ព័ន្ធផ្សេងទៀត ។
១៤- នីតិវិធីនៃការនាំចេញទំនិញដោយបំពេញបែបបទនៅមាត់ច្រកផ្លូវសមុទ្រ/ផ្លូវទន្លេមានដូចជា ៖
- អ្នកនាំចេញ ឬតំណាងត្រូវធ្វើលិខិតស្នើសុំនាំចេញទំនិញទៅប្រធានអង្គភាពគយនិងរដ្ឋាករ មាត់ច្រកដោយភ្ជាប់មកជាមួយនូវឯកសារពាក់ព័ន្ធ
- ប្រធានអង្គភាពគយនិងរដ្ឋាករមាត់ច្រក ពិនិត្យលើពាក្យស្នើសុំនិងឯកសារភ្ជាប់ព្រមទាំងចុះហត្ថលេខាអនុញ្ញាតឲ្យនាំចេញតាមសំណើ ប្រសិនបើពុំមានភាពមិនប្រក្រតី
- ក្រោយពេលទទួលបានការអនុញ្ញាតឲ្យនាំចេញ អ្នកនាំចេញ ឬតំណាងត្រូវបំពេញនីតិវិធីនៃការបំពេញប្រតិវេទន៍គយ ដូចមានក្នុងនីតិវិធីប្រតិវេទន៍គយ ។
១៥- លិខិតប្រឆាំងតវ៉ាកំណត់ហេតុគយត្រូវមានព័ត៌មានដូចជា ៖
- នាម អាសយដ្ឋាន និងហត្ថលេខារបស់បុគ្គលដែលតម្កល់ការតវ៉ា
- សេចក្តីលំអិតនៃកំណត់ហេតុបទល្មើសគយ ឬកំណត់ហេតុឃាត់ទុកបណ្តោះអាសន្នរាប់បញ្ជូលទាំងសេចក្តីថតចម្លងកំណត់ហេតុទាំងនេះ
- សេចក្តីពន្យល់អំពីមូលហេតុនៃការតវ៉ា ។
តភាគ
