អង់ដ្រូគ្លីស
Funny
Community contributor
មានទាសករម្នាក់ឈ្មោះ អង់ដ្រូគ្លីស (Androcles) បានរត់គេចចេញពីចៅហ្វាយនាយរបស់ខ្លួនចូលទៅក្នុងព្រៃ។ គាត់បានដើរត្រាច់ចរពេញព្រៃ ដរាបទាល់តែជួបនិងសត្វតោមួយដែលកំពុងដេកថ្ងូរដោយការឈឺចាប់។ គាត់បានរត់ត្រលប់ក្រោយមកវិញ តែដោយមិនឃើញសត្វតោដេញតាម គាត់ក៏ត្រលប់ទៅរកមើលហេតុ។ គាត់បានដើរទៅជិតសត្វតោ ហើយឃើញក្រញាំជើងតោ មានជាប់បន្លាដែលធ្វើឲ្យហើម និងមានហូរឈាម។ គាត់បានដកបន្លានោះចេញ ហើយរុំរបួសក្រញាំជើងសត្វតោនោះ។ ក្រោយបាត់ឈឺ វាក៏ងើបមកលិទ្ធដៃគាត់ដូចជាសត្វឆ្កែដ៏ស្លូតមួយ។ វាបាននាំគាត់ទៅនៅក្នុងរូងរបស់វា ដោយចញ្ចឹមគាត់វិញជារៀងរាល់ថ្ងៃជាមួយនឹងសាច់ស្រស់ៗ។
នៅថ្ងៃមួយ អង់ដ្រូគ្លីសនិងសត្វតោត្រូវគេចាប់បាន ហើយបញ្ជូនទៅទីក្រុង។ គាត់ត្រូវបានគេកាត់ទោសប្រហារជីវិតដោយឲ្យតោស៊ី ឯសត្វតោត្រូវបានគេបង្អត់អាហារទុកសម្រាប់ថ្ងៃកាត់ទោស។ នៅពេលដែលថ្ងៃកាត់ទោសមកដល់ ព្រះរាជានិងមន្រ្តីក៏បានចូលរួមទស្សនាដែរ។ អង់ដ្រូគ្លីសត្រូវបានគេប្រលែងឲ្យចេញទៅកណ្តាលទីលាន ដែលរំពេចនោះតោដ៏ស្រេកឃ្លានក៏ត្រូវបានបញ្ជួនចូលទៅដែរ។ នៅពេលតំបូង សត្វតោបានគ្រហឹម ហើយរត់សម្តៅយ៉ាងលឿនទៅកាន់អង់ដ្រូគ្លីស ក្នុងបំណងសម្លាប់គាត់ តែនៅពេលដែលវាទៅជិតដល់ វាបែរជាឈប់ ហើយលិទ្ធដៃរបស់គាត់ដូចលើកមុនទៀត។ ព្រះរាជាភ្ញាក់ផ្អើលជាខ្លាំង ហើយបានបញ្ជាឲ្យគេនាំ អង់ដ្រូគ្លីសមកគាល់ទ្រង់។ អង់ដ្រូគ្លីសបានរ៉ាយរ៉ាប់រឿងទាំងប៉ុន្មានដល់ព្រះរាជា។ ជាចុងក្រោយ ព្រះអង្គបានឲ្យគេដោះលែងអង់ដ្រូគ្លីសឲ្យមានសេរីភាព ហើយឲ្យគេដោះលែងសត្វតោចូលទៅក្នុងព្រៃវិញ។
មូលន័យ៖ ការដឹងគុណជាសញ្ញានៃមនុស្សថ្លៃថ្នូរ
ប្រភព៖ អង់ដ្រូគ្លីស
0 comments
No comments have been posted yet.