ប្រទេសកម្ពុជា មានមហន្តរាយប្រវត្តិសាស្រ្ត ដែលធ្វើអោយទឹកដីជិតបាត់បង់ពីផែនទីពិភពលោក ។ តែមានមតិខ្លះថា “ខ្មែរមិនដែលសាបសូន្យទេ” តើកត្តាព្រលឹងអ្វីខ្លះ ដែលបញ្ជាក់មិនសាបសូន្យ ?

ប្រទេសកម្ពុជាយើងធ្លាប់មានមហន្តរាយប្រវត្តិសាស្រ្តដែលធ្វើអោយទឹកដីជិតបាត់បង់ពីផែនទីសកលលោក ។ ខ្មែរយើងធ្លាប់នៅជាខ្ញុំសៀមជាច្រើនឆ្នាំ ក្រុងអង្គរ និងក្រុងលង្វែកត្រូវខ្ទេចខ្ទាំ អ្នកប្រាជ្ញធំៗ ត្រូវសៀមកេណ្ឌយកទៅស្រុកគេអស់ ។ ម៉្យាងទៀត ខ្មែរក៏ធ្លាប់នៅក្រោមការជិះជាន់របស់យួនរយៈពេល៨ឆ្នាំ ។ បន្ទាប់ពីសៀម និងយួន គឺបារាំង ប៉ុន្តែទឹកដីខ្មែរនៅគង់វង្សរហូតមកដល់សព្វថ្ងៃនេះ ។ ការដែលទឹកដីយើងមិនសាបសូន្យ ព្រោះខ្មែរមានព្រលឹងជាអ្នកការពារ ។ ព្រលឹងនោះ គឺព្រលឹងវប្បធម៌ អរិយធម៌ដែលខ្មែរយើងធ្លាប់មានតាំងពីមុនគ.ស ពោលគឺប្រទេសយើងជាប្រទេសចាស់ទុំជាងគេ នៅក្នុងអាស៊ីអាគ្នេយ៍ មានភាសា អក្សរ ទំនៀមទំលាប់ប្រពៃណីសិល្បៈ ស្ថាបត្យកម្ម ដូចជាប្រាសាទអង្គរវត្តជាដើម ជំនឿពុទ្ធសាសនាតាំងពីយូរណាស់មកហើយ ។ ព្រលឹងនោះ បើពោលអោយចំគឺប្រទេសយើងមានអត្តសញ្ញាណជាតិច្បាស់លាស់ ដែលជាកត្តាធានាយ៉ាងធំដល់អាយុជីវិតប្រទេសជាតិ ។