ពិធីមហាអំបុកនេះ ទោះបីជាមិនបានអំបុក ដែលមានគុណភាពល្អ១០០% ក៏វាជាល្បែងកំសាន្តមួយ ជាទស្សនីយភាពមួយ ដែលធ្វើចលនារួមគ្នា ស្រុះស្រួលធ្វើឱ្យបរិយាកាសរីករាយ តាំងពីក្បាលព្រលប់រហូតដល់ខែត្រង់ ។ នេះជាឳកាសមួយដែលក្រមុំកំលោះស្រុកស្រែ មានឳកាសបានបង្ហាញរូបរាង បានបង្ហាញកាយវិការ បានបង្ហាញពីភាពប៉ិនប្រសព្វរបស់ខ្លួនចំពោះកំលោះៗស្រុកស្រែដែរ ។ ម៉្យាងកំលោះៗមានឳកាស ក្នុងការជ្រើសរើសភរិយា ក្នុងពេលនោះជាមួយនារីដែលមានភាពទន់ភ្លន់ រវៀសរវៃ ប៉ិនប្រសព្វក្នុងការងារ ចូលចុះក្នុងចំណោម ។ ដូច្នេះជាមួយនឹងពិធីដែលធ្វើតាមដំណែលចាស់បុរាណ តជាប្រពៃណីនេះក៏ជាឳកាសមួយ បង្កលក្ខណៈឱ្យយុវជន យុវនារីខ្មែរនៅជនបទ មានឳកាសនឹងជួបប្រាស័យទាក់ទងគ្នាស្វែង យល់ចិត្តគ្នាទៅវិញទៅមក បន្ទាប់ពីបានបញ្ចប់ការងារធ្វើស្រែចំការអស់មួយរដូវរួចមក ។
