តាមសាសនាព្រាហ្មណ៍បានចាត់ទុកថា មនុស្សយើងកើតមកមាននាទីប្លែកគ្នាតាមចំណែកនាំសរីរាង្គរបស់ព្រហ្មដែលនាំឱ្យមានវណ្ណៈ ។ តើវណ្ណៈទាំងនោះមានអ្វីខ្លះ ? មាននាទីដូចម្តេចខ្លះ ?

បើតាមសាសនាព្រាហ្មណ៍នៅប្រទេសឥណ្ឌា មានការជាប់ទាក់ទង ដោយសេចក្តីប្រកាន់ជឿថា មហាព្រហ្មជាអ្នកបង្កើតសត្វលោក ។ ការកត់ត្រានៅក្នុងគម្ពីរត្រៃវេទបុរាណបានដំណាលថាប្រភពដើមនៃមនុស្សលោកគឺជាដងខ្លួននៃលោកធាតុដែលបង្កកំណើតដោយព្រះអាទិទេពផ្នែកបរិសុទ្ធគឺព្រះឳស្ឋឬមាត់ជាវណ្ណៈទី១ព្រាហ្មណ៍តម្រូវឱ្យជាម្ចាស់សាសនាមានមុខងារខាងបង្រៀនប្រៀនប្រដៅវេមន្តវិជ្ជាផ្សេងៗ ។ វណ្ណៈទី២ គឺវណ្ណៈក្សត្រិយៈឬខត្តិយៈកើតពីព្រះពាហា ឬកំភួនដៃមានមុខងារគ្រប់គ្រងប្រទេស ។ វណ្ណៈទី៣គឺវណ្ណៈវៃស្យៈឬវេស្សៈ កើតពីឧរុឬចំណែកភ្លៅមានមុខងារជាពាណិជ្ជករ សិប្បករ និងអ្នកចិញ្ចឹមសត្វ ។ វណ្ណៈទី៤ វណ្ណៈសូទ្រៈ ឬសុទ្ទៈ កើតចេញពីបាទជើងមាននាទីស៊ីឈ្នួលគេ ឬជាពពួកខ្ញុំកំដរ ។ ដោយផ្អែកតាមទស្សនវិស័យនៃលោកធាតុនេះហើយទើបបានជាសង្គមឥណ្ឌាបានគោរពប្រតិបត្តិរហូតមកដល់សព្វថ្ងៃនេះ ។