វិញ្ញាសាសីលធម៌-ពលរដ្ឋវិជ្ជា សម្រាប់ត្រៀមប្រឡងសញ្ញាប័ត្រមធ្យមសិក្សាទុតិយភូមិ (វិញ្ញាសាទី១៥)

សំណួរ

១. តើប្រទេសណាដែលមានប្រជាជនច្រើនជាងគេបំផុតនៅក្នុងពិភពលោក ?

២. តើពិភពលោកទាំងមូលមានប្រជាជនសរុបទាំងអស់ប៉ុន្មាន ?

៣. ចូរបង្ហាញពីប្រទេសចំនួនប្រាំដែលមានប្រជាជនច្រើនជាងគេ ?

៤. តើកក្តាអ្វីខ្លះដែលធ្វើឱ្យផែនដីឡើងកម្តៅ ?

៥. តើកត្តាអ្វីខ្លះដែលគេចាត់ទុកថាជាការបំផ្លាញស្រទាប់អូសូន ?

ចម្លើយ

១. ប្រទេសដែលមានប្រជាជនច្រើនជាងគេបំផុតនៅក្នុងពិភពលោកគឺប្រទេសចិន។

២. យោងតាមស្ថាប័នជំរឿនសហរដ្ឋអាមេរិកដែលធ្វើការប៉ាន់ស្មានកាលពីថ្ងៃទី៣១ ខែឧសភា ឆ្នាំ២០១០ចំនួនប្រជាជនសរុបនៅលើពិភពលោកមាន ប្រាំមួយពាន់ប្រាំបីរយម្ភៃបួនលាន បីសែននាក់(៦ ៨២៤ ៣០០ ០០០)។

៣. ប្រទេសចំនួនប្រាំដែលមានប្រជាជនច្រើនជាងគេមាន ៖

• ប្រទេសចិន មានប្រជាជន ១៣៣៧ ៨១០ ០០០នាក់
• ប្រទេសឥណ្ឌា មានប្រជាជន ១ ១៨១ ៣២០ ០០០នាក់
• សហរដ្ឋអាមេរិក មានប្រជាជន ៣០៩ ៣៨៨ ០០០នាក់
• ប្រទេសឥណ្ឌាណេស៊ី មានប្រជាជន ២៣១ ៣៦៩ ៥០០នាក់
• ប្រទេស ប្រេស៊ីល មានប្រជាជន ១៩២ ៩៨៥ ០០០នាក់ ។

៤. កត្តាដែលធ្វើឱ្យផែនដីឡើងកម្តៅមាន ៖

• ការកាប់បំផ្លាញព្រៃឈើ
• ការបំពុលខ្យល់បរិយាកាសដោយឧស្ម័ន
• កំណើនយ៉ាងឆាប់រហ័សនៃការអភិវឌ្ឍទីក្រុង
• កំណើននៃការប្រើប្រាស់ថាមពល និងឥន្ធនៈមានសារធាតុបំពុល
• កំណើនឧស្សាហកម្មនិងការកាប់ឆ្ការព្រៃយកដីដាំដំណាំ
• ការអនុវត្តច្បាប់បរិស្ថាននៅមានភាពធូរលុង​ បញ្ហាទាំងអស់នេះនាំឱ្យកើនឡើង នូវអត្រាឧស្ម័នផ្ទះកញ្ចក់ក្នុងមណ្ឌលអាកាសរចល់ឱ្យលើសពីកម្រិតធម្មជាតិ ធ្វើឱ្យកម្តៅនៅលើផែនដីកើនឡើង។

៥. កត្តាដែលចាត់ទុកជាការបំផ្លាញស្រទាប់អូសូនមាន ៖

• ការបំពុលខ្យល់ ដោយសារសកម្មភាពឧស្សាហកម្មចំហេះផូស៊ីលនៅក្នុងម៉ាស៊ីនរថយន្តទោចក្រយានយន្ត និងការដុតឧសជាដើម។
• សមាសធាតុក្លរ៉ូភ្លុយអរ៉ូកាបូនដែលជាសមាសធាតុគីមីមាននៅក្នុងអង្គធាតុរាវសម្រាប់ធ្វើជាមេត្រជាក់ ក្នុងទូទឹកកកក្នុងកំប៉ុងថ្នាំបាញ់និងមេបំប៉ោងនៅក្នុងរោងចក្រជ័រប្លាស្ទីកវេចខ្ចប់
• ឧស្ម័នពុលដែលចេញពីរោងចក្រ
• ជាតិអុកស៊ីតនីទ្រិចដែលបញ្ចេញដោយយន្តហោះធំៗ។