Lights
Profile Head

lawyers

...

Ask question, post article, write experience get Point, learn more on Point Center

Page: 1 of 35

2020-03-30 15:37

សំណួរ-ចម្លើយ សទ្ទានុក្រម នីតិវិធីរដ្ឋប្បវេណី (ភាគ១១)

#Tages: សទ្ទានុក្រម នីតិវិធី រដ្ឋប្បវេណី

សំណួរ

៥១- តើបណ្តឹងឧបាស្រ័យសំដៅដល់អ្វី ?

៥២- តើបទអាជ្ញាសំដៅដល់អ្វី ?

៥៣- តើបុគ្គលអសមត្ថភាព ឬអសមត្ថជនសំដៅដល់អ្វី ?

៥៤- តើប្រាតិភោគលើប្រាក់ប្រដាប់ក្តីសំដៅដល់អ្វី ?

៥៥- តើប្រាក់ប្រដាប់ក្តីតុលាការសំដៅដល់អ្វី ?

ចម្លើយ

៥១- បណ្តឹងឧបាស្រ័យ សំដៅដល់បណ្តឹងតវ៉ារបស់ភាគី ដែលពុំយល់ស្របជាមួយសេចក្តីសម្រេចណាមួយ (សាលក្រម សាលដីកា ដីកាសម្រេច) របស់ចៅក្រម ឬតុលាការ ដើម្បីទាមទារឲ្យលុបចេល ឬផ្លាស់ប្តូរសេចក្តីសម្រេចដើម ។

៥២- បទអាជ្ញា សំដៅដល់អំពើ ដែលនាំឲ្យខូចសន្តិសុខសណ្តាប់ធ្នាប់របៀបរៀបរយសង្គម ដែលបញ្ញត្តដោយច្បាប់ព្រហ្មទណ្ឌ ។

៥៣- បុគ្គលអសមត្ថភាព ឬអសមត្ថជន សំដៅដល់បុគ្គលដែលមិនអាចធ្វើសកម្មភាពតាមផ្លូវច្បាប់ពេញលេញដោយខ្លួនឯងបាន ។ តាមក្រមនីតិវិធីរដ្ឋប្បវេណី មានន័យថា បុគ្គលដែលខ្វះសមត្ថភាពក្នុងការធ្វើសកម្មភាពបណ្តឹង ។

៥៤- ប្រាតិភោគលើប្រាក់ប្រដាប់ក្តី សំដៅដល់ការដាក់ទ្រព្យដើម្បីធានាប្រាក់ប្រដាប់ក្តីតាមការស្នើសុំរបស់ចុងចម្លើយ​ដោយមូលហេតុដើមចោទមិនមានលំនៅឋាន ទីស្នាក់ការ ឬទីកន្លែងអាជីវកម្មនៅព្រះរាជាណាចក្រកម្ពុជា ។

៥៥- ប្រាក់ប្រដាប់ក្តីតុលាការ សំដៅដល់ប្រាក់ប្រដាប់ក្តីមួយប្រភេទ​ ដែលភាគីត្រូវបង់នូវចំនួនចាំបាច់ ដើម្បីឲ្យតុលាការធ្វើការពិនិត្យភស្តុតាង បញ្ជូនឯកសារ ឬធ្វើសកម្មភាពផ្សេងៗ តាមនីតិវិធីក្នុងបណ្តឹង ។

តភាគ

Read More


2020-03-30 15:35

សំណួរ-ចម្លើយ សទ្ទានុក្រម នីតិវិធីរដ្ឋប្បវេណី (ភាគ១០)

#Tages: សទ្ទានុក្រម នីតិវិធី រដ្ឋប្បវេណី

សំណួរ

៤៦- តើបណ្តឹងដិតចិត្តសំដៅដល់អ្វី ?

៤៧- តើបណ្តឹងតបសំដៅដល់អ្វី ?

៤៨- តើបណ្តឹងទាមទារប្រមូលបំណុលសំដៅដល់អ្វី ?

៤៩- តើបណ្តឹងផាត់ចោលសំដៅដល់អ្វី ?

៥០- តើបណ្តឹងឧទ្ធរណ៍បន្ទាប់បន្សំសំដៅដល់អ្វី ?

ចម្លើយ

៤៦- បណ្តឹងដិតចិត្ត សំដៅដល់បណ្តឹងសុំមិនឲ្យចៅក្រម ឬក្រឡាបញ្ជីណាម្នាក់អនុវត្តមុខការរបស់ខ្លួនក្នុងករណីមានកាលៈទេសៈ ដែលអាចបណ្តាលឲ្យមានការលម្អៀលរបស់ចៅក្រម ឬក្រឡាបញ្ជីនោះ ។

៤៧- បណ្តឹងតប សំដៅដល់បណ្តឹងសាត្រឡប់របស់ចុងចម្លើយចំពោះដើមចោទ ។ ជាទូទៅ ចុងចម្លើយអាចប្តឹងតបរហូតដល់ពេលចប់ការទាញហេតុផល  ដោយផ្ទាល់មាត់បាន លុះត្រាតែកម្មវត្ថុនៃបណ្តឹងទបនោះទាក់ទងនឹងការទាមទារ ដែលជាកម្មវត្ថុនៃបណ្តឹងដើម ឬជាមធ្យោបាយការពារខ្លួនសម្រាប់បណ្តឹងជាដើម ។

៤៨- បណ្តឹងទាមទារប្រមូលបំណុល សំដៅដល់បណ្តឹងរបស់ម្ចាស់បំណុលដាក់ជូនទៅតុលាការទាមទារឲ្យកូនបំណុលទី៣ផ្តល់តាវកាលិក ដែលទាក់ទងទៅនឹងសិទ្ធិលើបំណុល ដែលត្រូវបានរឹបអូសក្នុងករណីដែលកូនបំណុលទី៣មិនព្រមសងតាមការប្រមូលបំណុលរបស់ម្ចាស់បំណុលនៃការអនុវត្ត ។

៤៩- បណ្តឹងផាត់ចោល សំដៅដល់ផ្លូវតវ៉ាដែលបើកសិទ្ធិឲ្យភាគីប្តឹងផាត់ចោលមិនឲ្យអ្នកជំនាញណាមួយ ធ្វើកោសលវិច័យ ដោយមានមូលហេតុរារាំងសច្ចភាពនៃការធ្វើកោសលវិច័យ ។

៥០- បណ្តឹងឧទ្ធរណ៍បន្ទាប់បន្សំ សំដៅដល់ពាក្យសុំរបស់ចុងបណ្តឹងឧទ្ធរណ៍ ដែលប្តឹងជាមួយនឹងបណ្តឹងឧទ្ធរណ៍របស់ដើមបណ្តឹងឧទ្ធរណ៍ ដើម្បីផ្លាស់ប្តូរសាលក្រមនៃការជំនុំជម្រះលើកទៅ១សម្រាប់ជាផលប្រយោជន៍របស់ខ្លួន ទោះបីជាសិទ្ធិឧទ្ធរណ៍របស់ខ្លួនបានរលត់ហើយក៏ដោយ ។

តភាគ

Read More


2020-03-30 15:34

សំណួរ-ចម្លើយ សទ្ទានុក្រម នីតិវិធីរដ្ឋប្បវេណី (ភាគ៩)

#Tages: សទ្ទានុក្រម នីតិវិធី រដ្ឋប្បវេណី

សំណួរ

៤១- តើនីតិវិធីដាស់តឿនសំដៅដល់អ្វី ?

៤២- តើនីតិវិធីត្រៀមសម្រាប់ការទាញហេតុផលសំដៅដល់អ្វី ?

៤៣- តើនីតិវិធីនៃការអនុវត្តសិទ្ធិលើការបញ្ជាំដោយសង្ខេបសំដៅដល់អ្វី ?

៤៤- តើនីតិវិធីសង្ខេបសំដៅដល់អ្វី ?

៤៥- តើអនុសារសាលក្រមស្ថាពរសំដៅដល់អ្វី ?

ចម្លើយ

៤១- នីតិវិធីដាស់តឿន សំដៅដល់នីតិវិធីពិសេសមួយនៃនីតិវិធីរដ្ឋប្បវេណី ដែលអនុញ្ញាតឲ្យម្ចាស់បំណុលអាចទទួលបាននូវលិខិតអនុវត្ត ។

៤២- នីតិវិធីត្រៀមសម្រាប់ការទាញហេតុផល សំដៅដល់ដំណាក់កាលមួយនៃនីតិវិធីរដ្ឋប្បវេណី ដែលក្នុងនោះតុលាការត្រូវរៀបចំសេចក្តីអះអាងរបស់គូភាគី ដែលបំភ្លឺចំណុចវិវាទនៃរឿងក្តី និងរៀបចំភស្តុតាងដែលទាក់ទងនឹងចំណុចវិវាទនៃរឿងក្តីនោះ ។

៤៣- នីតិវិធីនៃការអនុវត្តសិទ្ធិលើការបញ្ជាំដោយសង្ខេប សំដៅដល់វិធានការមួយនៃនីតិវិធីអនុវត្តដោយបង្ខំ ដែលអនុញ្ញាតឲ្យម្ចាស់សិទ្ធិលើការបញ្ជាំចលនវត្ថុដាក់ពាក្យសុំឲ្យសាលាដំបូង ដែលមានសមត្ថកិច្ចនៃទីកន្លែង ដែលត្រូវអនុវត្តកាតព្វកិច្ច ចេញដីកាសម្រេច អនុញ្ញាតឲ្យយកវត្ថុបញ្ជាំនោះមកសងផ្ទាល់តែម្តង ។

៤៤- នីតិវិធីសង្ខេប សំដៅដល់នីតិវិធីមួយសម្រាប់ដោះស្រាយវិវាទឲ្យបានឆាប់រហ័សចំពោះរឿងក្តី ដែលមានទឹកប្រាក់តិច (ទឹកប្រាក់តិចជាងមួយលានរៀល) ។

៤៥- អនុសារសាលក្រមស្ថាពរ សំដៅដល់សេចក្តីចម្លងពីមូលសាលក្រមស្ថាពរ ។ សេចក្តីដើមនៃការសម្រេចរបស់តុលាការនីមួយៗ ដែលមានរក្សាទុកនៅក្នុងបញ្ជីតុលាការ ហៅថា មូលសាលក្រម សេចក្តីចម្លងពីមូលសាលក្រមដែលគ្មានបញ្ជាក់រូបមន្តអនុវត្តហៅថា អនុសារសាលក្រម ។

តភាគ

Read More


2020-03-27 15:39

សំណួរ-ចម្លើយ សទ្ទានុក្រម នីតិវិធីរដ្ឋប្បវេណី (ភាគ៨)

#Tages: សទ្ទានុក្រម នីតិវិធី រដ្ឋប្បវេណី

សំណួរ

៣៦- តើតម្លៃលក់អប្បបរមាសំដៅដល់អ្វី ?

៣៧- តើតុលាការជាន់ខ្ពស់សំដៅដល់អ្វី ?

៣៨- តើតុលាការមានសមត្ថកិច្ចសំដៅដល់អ្វី ?

៣៩- តើអ្នកជំនាញសំដៅដល់អ្វី ?

៤០- តើអាជ្ញាសាលាសំដៅដល់អ្វី ?

ចម្លើយ

៣៦- តម្លៃលក់អប្បបរមា សំដៅដល់តម្លៃ ដែលកំណត់ដោយអ្នកវាយតម្លៃសម្រាប់ជាមូលដ្ឋាននៃការដេញថ្លៃ ក្នុងការលក់ដោយបង្ខំ ។

៣៧- តុលាការជាន់ខ្ពស់ សំដៅដល់តុលាការដែលមានអំណាចវិនិច្ឆ័យលើបណ្តឹងឧបាស្រ័យ ដែលមិនសុចចិត្តនឹងសេចក្តីសម្រេចរបស់តុលាការជាន់ទាប ។

៣៨- តុលាការមានសមត្ថកិច្ច សំដៅដល់តុលាការដែលអាចទទួលដោយស្របច្បាប់នូវពាក្យបណ្តឹង វិនិច្ឆ័យសេចក្តីលើរឿងក្តី ហើយចេញសាលក្រម ឬសាលដីកាបាន ។

៣៩- អ្នកជំនាញ សំដៅដល់អ្នកឯកទេសដែលចៅក្រមសុំឲ្យផ្តល់មតិអំពីរឿងហេតុអ្វីមួយ ដែលតម្រូវឲ្យមានការយល់ដឹងបច្ចេកទេស និងការស្រាវជ្រាវយ៉ាងពេញលេញ ។

៤០- អាជ្ញាសាលា សំដៅដល់មន្រ្តីជំនួយតុលាការទទួលបន្ទុកអនុវត្តកិច្ចការលក់ដោយបង្ខំ អនុវត្តសិទ្ធិប្រាតិភោគ អនុវត្តលក់ដោយបង្ខំ អនុវត្តសិទ្ធិប្រាតិភោគ អនុវត្តដោយបង្ខំ អនុវត្តការបញ្ជូនផ្អែកតាមការសម្រេចសេចក្តី ច្បាប់ ឬបទដ្ឋានគតិយុត្តផ្សេងទៀត ។

តភាគ

Read More


2020-03-27 15:37

សំណួរ-ចម្លើយ សទ្ទានុក្រម នីតិវិធីរដ្ឋប្បវេណី (ភាគ៧)

#Tages: សទ្ទានុក្រម នីតិវិធី រដ្ឋប្បវេណី

សំណួរ

៣១- តើជននៅក្រោមហិតូបត្ថម្ភសំដៅដល់អ្វី ?

៣២- តើជននៅក្រោមអាណាព្យាបាលទូទៅសំដៅដល់អ្វី ?

៣៣- តើជវលេខសំដៅដល់អ្វី ?

៣៤- តើដីកាកោះសំដៅដល់អ្វី ?

៣៥- តើដីកាសម្រេចសំដៅដល់អ្វី ?

ចម្លើយ

៣១- ជននៅក្រោមហិតូបត្ថម្ភ សំដៅដល់ជនដែលមានសមត្ថភាពតិចតួចក្នុងការយល់ដឹង និងវិនិច្ឆ័យអំពីលទ្ធផលតាមផ្លូវច្បាប់នៃសកម្មភាពរបស់ខ្លួន ដោយាសារមានវិបត្តិផ្នែកបញ្ញាស្មារតី ហើយត្រូវបានតុលាការដាក់ឲ្យស្ថិតនៅក្រោមការថែទាំដោយហិតូបត្ថម្ភកៈ ។

៣២- ជននៅក្រោមអាណាព្យាបាលទូទៅ សំដៅដល់នីតិជនដែលស្ថិតនៅក្នុងស្ថានភាពខ្វះសមត្ថភាពក្នុងការយល់ដឹង និងវិនិច្ឆ័យអំពីលទ្ធផលតាមផ្លូវច្បាប់នៃសកម្មភាពរបស់ខ្លួនជានិរន្តរ៍ ដោយសារមានវិបត្តិផ្នែកបញ្ញាស្មារតី ហើយត្រូវបានប្រកាសដាក់ឲ្យស្ថិតនៅក្រោមអាណាព្យាបាលទូទៅ ។

៣៣- ជវលេខ សំដៅដល់ការសរសេររហ័ស វិធីប្រើសញ្ញា ឬគំនូសសម្រាប់កត់ត្រា ឬសរសេរឲ្យបានរហ័សតាមទាន់សំដីដែលគេបាននិយាយ ។

៣៤- ដីកាកោះ សំដៅដល់លិខិតបង្គាប់របស់តុលាការ ដែលតម្រូវឲ្យបុគ្គលណាមួយ ត្រូវតែមកបង្ហាញខ្លួននៅតុលាការតាមកាលបរិច្ឆេទដែលបានកំណត់ ។

៣៥- ដីកាសម្រេច សំដៅដល់ការសម្រេចសេចក្តីដែលតុលាការ ឬចៅក្រមអាចធ្វើដោយមិនចាំបាច់ឆ្លងកាត់តាមការទាញហេតុផលដោយផ្ទាល់មាត់ ហើយមិនមែនជាសាលក្រមទេ ។

តភាគ

Read More


2020-03-27 15:35

សំណួរ-ចម្លើយ សទ្ទានុក្រម នីតិវិធីរដ្ឋប្បវេណី (ភាគ៦)

#Tages: សទ្ទានុក្រម នីតិវិធី រដ្ឋប្បវេណី

សំណួរ

២៦- តើគោលការណ៍ចំពោះមុខសំដៅដល់អ្វី ?

២៧- តើចៅក្រមដែលទទួលការប្រគល់សិទ្ធិសំដៅដល់អ្វី ?

២៨- តើចៅក្រមដែលទទួលបញ្ជាសំដៅដល់អ្វី ?

២៩- តើចំណុចវិវាទសំដៅដល់អ្វី ?

៣០- តើឆន្ទានុសិទ្ធិសំដៅដល់អ្វី ?

ចម្លើយ

២៦- គោលការណ៍ចំពោះមុខ សំដៅដល់គោលការណ៍ជាមូលដ្ឋាននៃដំណើរការរបស់តុលាការ ដែលទាមទារឲ្យមានការជម្រះក្តីដោយធ្វើការកោះហៅ និងសាកសួរជាចាំបាច់ ។ ក្នុងករណីណាក៏ដោយ តុលាការត្រូវគោរពគោលការណ៍ចំពោះមុខនៅគ្រប់កាលៈទេសៈ ។

២៧- ចៅក្រមដែលទទួលការប្រគល់សិទ្ធិ សំដៅដល់ចៅក្រមដែលត្រូវស្ថិតនៅក្នុងតុលាការណាមួយដែលទទួលការផ្ទេរសិទ្ធិពីតុលាការផ្សេងឲ្យបំពេញកិច្ចការអ្វីមួយក្នុងនាមតុលាការ ដែលបានផ្ទេរសិទ្ធិនោះ ។

២៨- ចៅក្រមដែលទទួលបញ្ជា សំដៅដល់ចៅក្រមជាសមាជិកនៃក្រមប្រឹក្សាជំនុំជម្រះដែលទទួលបានភារកិច្ចពីប្រធានក្រុមប្រឹក្សាជំនុំជម្រះ ដើម្បីបំពេញកិច្ចការអ្វីមួយក្នុងនាមក្រុមប្រឹក្សាជំនុំជម្រះនោះ ។

២៩- ចំណុចវិវាទ សំដៅដល់ចំណុចនៃទំនាស់ដែលត្រូវបំភ្លឺ ដើម្បីចេញសាលក្រម ។ ចំណុចវិវាទអាចជាចំណុចវិវាទលើអង្គហេតុ ឬចំណុច​វិវាទលើអង្គច្បាប់ ។

៣០- ឆន្ទានុសិទ្ធិ សំដៅដល់អំណាចដែលច្បាប់ប្រគល់ដល់ចៅក្រមឲ្យរើសយកមធ្យោបាយណាមួយ តាមការវាយតម្លៃរបស់ខ្លួនមកដោះស្រាយបញ្ហាណាមួយ ។

តភាគ

Read More


2020-03-27 15:34

សំណួរ-ចម្លើយ សទ្ទានុក្រម នីតិវិធីរដ្ឋប្បវេណី (ភាគ៥)

#Tages: សទ្ទានុក្រម នីតិវិធី រដ្ឋប្បវេណី

សំណួរ

២១- តើកូនបំណុលនៃការអនុវត្តដោយបង្ខំសំដៅដល់អ្វី ?

២២- តើកោសលវិច័យសំដៅដល់អ្វី ?

២៣- តើកំណត់ស្តីពីការសះជាសំដៅដល់អ្វី ?

២៤- តើក្រឡាបញ្ជីសំដៅដល់អ្វី ?

២៥- តើក្រុមប្រឹក្សាជំនុំជម្រះសំដៅដល់អ្វី ?

ចម្លើយ

២១- កូនបំណុលនៃការអនុវត្តដោយបង្ខំ សំដៅដល់បុគ្គលដែលទ្រព្យសម្បត្តិរបស់ខ្លួនជាកម្មវត្ថុនៃការអនុវត្តដោយបង្ខំ (ម.ព. ការអនុវត្តដោយបង្ខំ) ។

២២- កោសលវិច័យ សំដៅដល់ប្រតិបត្តិការរបស់អ្នកជំនាញដូចជា គ្រូពេទ្យលេខនាករ (អ្នកជំនាញខាងអក្សរសរសេរដៃ) ជាអាទិ៍ ដែលតុលាការបានចាត់ចែង ដើម្បីពិនិត្យពិចារណាមួយក្នុងគោលបំណងបំភ្លឺតុលាការ ។

២៣- កំណត់ស្តីពីការសះជា សំដៅដល់លិខិតដែលកត់ត្រាអំពីលទ្ធផលនៃការផ្សះផ្សា ដែលភាគីបានព្រមព្រៀងគ្នា និងនាំឲ្យមានការបញ្ចប់រឿងក្តី ។ កំណត់ហេតុស្តីពីការសះជាមានអានុភាពដូចគ្នានឹងសាលក្រមស្ថាពរដែរ ។

២៤- ក្រឡាបញ្ជី សំដៅដល់មន្ត្រីតុលាការដែលបំពេញមុខងារធានានូវដំណើរការ នៃលេខាធិការដ្ឋានរបស់យុត្តាធិការ ។ ក្រឡាបញ្ជីមានតួនាទីច្រើនយ៉ាង តែគេអាចប្រមូលផ្តុំជាពីប្រភេទគឺ ៖

  • ក្នុងឋានៈជាជំនួយការរបស់តុលាការ ក្រឡាបញ្ជីជួយការងារចៅក្រម និងចូលរួមក្នុងគ្រប់កិច្ចនៃនីតិវិធី ។
  • ក្នុងឋានៈជាអ្នកថែរក្សាឯកសារ ក្រឡាបញ្ជីជាអ្នកគ្រប់គ្រងថែរក្សាឯកសាររបស់យុត្តាធិការ និងផ្តល់នូវសម្រង់ ឬឯកសារចម្លងនានា ។

២៥- ក្រុមប្រឹក្សាជំនុំជម្រះ សំដៅដល់ក្រុមចៅក្រមដែលជំនុំជម្រះរឿងក្តីណាមួយនៅតាមសាលាជម្រះក្តី ។ ឧទាហរណ៍ ជាគោលការណ៍ ការជម្រះក្តីនៅសាលាឧទ្ធរណ៍ត្រូវធ្វើឡើង ដោយក្រុមប្រឹក្សាជំនុំជម្រះ ដែលមានចៅក្រម៣នាក់ ។

តភាគ

Read More


2020-03-26 14:53

សំណួរ-ចម្លើយ សទ្ទានុក្រម នីតិវិធីរដ្ឋប្បវេណី (ភាគ៤)

#Tages: សទ្ទានុក្រម នីតិវិធី រដ្ឋប្បវេណី

សំណួរ

១៦- តើការលក់ឡាយឡុងសំដៅដល់អ្វី ?

១៧- តើការអនុវត្តជាបណ្តោះអាសន្នសំដៅដល់អ្វី ?

១៨- តើការអនុវត្តជំនួសសំដៅដល់អ្វី ?

១៩- តើការអនុវត្តដោយបង្ខំសំដៅដល់អ្វី ?

២០- តើអ្នកតំណាងដែលច្បាប់​បានកំណត់សំដៅដល់អ្វី ?

ចម្លើយ

១៦- ការលក់ឡាយឡុង សំដៅដល់ការលក់ដោយដេញថ្លៃនូវវត្ថុដែលរឹបអូស ។ តាមរយៈការលក់នេះ បុគ្គលគ្រប់រូបអាចក្លាយជាលទ្ធករនៃវត្ថុដែលដាក់លក់ឡាយឡុង កាលណាគេបានឲ្យថ្លៃខ្ពស់ជាងគេ ក្នុងកាលបរិច្ឆេទនៃការលក់ឡាយឡុង ។ នៅក្នុងក្រមនីតិវិធីរដ្ឋប្បវេណី ការលក់ឡាយឡុងអាចធ្វើឡើងដោយស្រោមសំបុត្រ ឬដោយផ្ទាល់មាត់ ។

១៧- ការអនុវត្តជាបណ្តោះអាសន្ន សំដៅដល់មធ្យោបាយមួយដែលតុលាការអនុញ្ញាតឲ្យដើមចោទ ដែលឈ្នះក្តីអាចទទួលបានឆាប់នូវផលប្រយោជន៍លើទ្រព្យសម្បត្តិ ដែលសន្មតថាជាកម្មសិទ្ធិរបស់ខ្លួន ទោះបីជាសាលក្រម ឬសាលដីកាពុំទាន់ចូលជាស្ថាពរក៏ដោយ ។

១៨- ការអនុវត្តជំនួស សំដៅដល់វិធានការនៃការអនុវត្តដោយបង្ខំ ដែលតុលាការអនុវត្តចេញដីកាសម្រេច អនុវត្តឲ្យតតិយជនបំពេញសកម្មភាពជំនួសកូនបំណុលដោយ ប្រើសោហ៊ុយរបស់កូនបំណុល តាមពាក្យសុំរបស់ម្ចាស់បំណុល ។

១៩- ការអនុវត្តដោយបង្ខំ សំដៅដល់នីតិវិធីមួយដែលអនុញ្ញាតឲ្យបុគ្គលដែលមានសិទ្ធិទាមទារសិទ្ធិប្រាតិភោគ ដែលបានកំណត់ក្នុងក្រមរដ្ឋប្បវេណី ឬច្បាប់ផ្សេងទៀតធ្វើការទាមទារឲ្យសម្រេចសិទ្ធិនោះ ដោយការអនុញ្ញាតដោយបង្ខំ ។ ការអនុវត្តដោយបង្ខំត្រូវធ្វើឡើងដោយតុលាការអនុវត្ត ឬដោយអាជ្ញាសាលា ។

២០- អ្នកតំណាងដែលច្បាប់​បានកំណត់ សំដៅដល់បុគ្គលដែលទទួលសិទ្ធិតំណាងកំណត់ដោយច្បាប់ដូចជា អ្នកមានអំណាមេបា ឬអ្នកអាណាព្យាបាលជាដើម ។

តភាគ

Read More


2020-03-26 14:51

សំណួរ-ចម្លើយ សទ្ទានុក្រម នីតិវិធីរដ្ឋប្បវេណី (ភាគ៣)

#Tages: សទ្ទានុក្រម នីតិវិធី រដ្ឋប្បវេណី

សំណួរ

១១- តើការបង្អង់នីតិវិធីបណ្តឹងសំដៅដល់អ្វី ?

១២- តើការផ្តល់ជំនួយសង្គ្រោះលើបណ្តឹងសំដៅដល់អ្វី ?

១៣- តើការផ្អាកនីតិវិធីនៃបណ្តឹងសំដៅដល់អ្វី ?

១៤- តើការលក់ដោយបង្ខំសំដៅដល់អ្វី ?

១៥- តើការលក់សរុបសំដៅដល់អ្វី ?

ចម្លើយ

១១- ការបង្អង់នីតិវិធីបណ្តឹង សំដៅដល់ការតម្កល់មួយអន្លើនូវនីតិវិធីនៃបណ្តឹង ដោយសារមានមូលហេតុមួយចំនួនដូចជា សង្រ្គាម គ្រោះមហន្តរាយធម្មជាតិ រឿងក្តីព្រហ្មទណ្ឌ ដែលបង្អង់រឿងក្តីរដ្ឋប្បវេណីជាដើម ។

១២- ការផ្តល់ជំនួយសង្គ្រោះលើបណ្តឹង សំដៅដល់វិធានការអនុគ្រោះ ដែលតុលាការអនុញ្ញាតដោយដីកាឲ្យពន្យាពេលបង់ ឬអនុគ្រោះមិនបាច់ឲ្យបង់ប្រាក់ប្រដាប់ក្តី តាមពាក្យសុំរបស់បុគ្គលដែលពុំមានលទ្ធភាពបង់ ។

១៣- ការផ្អាកនីតិវិធីនៃបណ្តឹង សំដៅដល់ការព្យួរមួយគ្រាសិននូវនីតិវិធីនៃបណ្តឹង ដោយសារមានហេតុការណ៍មួយចំនួនដូចជា មរណភាព ការបាត់បង់សមត្ថភាពរបស់ភាគីជាអាទិ៍ ក្នុងគោលបំណងធានាសិទ្ធិរបស់ភាគីចំពោះនីតិវិធី ។

១៤- ការលក់ដោយបង្ខំ សំដៅដល់វិធានដែលប្រើប្រាស់ក្នុងនីតិវិធីនៃការអនុវត្តដោយបង្ខំ ដើម្បីលក់វត្ថុដែលរឹបអូសយកប្រាក់ទៅសងម្ចាស់បំណុល តាមលិខិតអនុវត្ត សាលក្រម សាលដីកា លិខិតយថាភូតរបស់សារការីជាអាទិ៍ (ម.ព ការអនុវត្តដោយបង្ខំ និងលិខិតអនុវត្ត) ។ ការលក់ដោយបង្ខំត្រូវសម្រេច ដោយដីកាសម្រេចរបស់តុលាការអនុវត្តតាមពាក្យសុំរបស់ម្ចាស់បំណុល ក្នុងករណីដែលមានលក្ខណៈត្រឹមត្រូវ ដើម្បីទទួលស្គាល់ពាក្យសុំនោះ ។

១៥- ការលក់សរុប សំដៅដល់វិធាននៃការលក់អចលវត្ថុដែលរឹបអូស ។ វិធាននេះប្រើប្រាស់ក្នុងនីតិវិធីអនុវត្តដោយបង្ខំ សម្រាប់ការលក់ឲ្យស្រេចតែម្តងនូវអចលនវត្ថុរឹបអូស ដែលមានច្រើនក្នុងគោលបំណងលក់ឲ្យបានថ្លៃខ្ពស់ ដើម្បីជាផលប្រយោជន៍ដល់ម្ចាស់បំណុលផង និងកូនបំណុលផង ។

តភាគ

Read More


2020-03-26 14:50

សំណួរ-ចម្លើយ សទ្ទានុក្រម នីតិវិធីរដ្ឋប្បវេណី (ភាគ២)

#Tages: សទ្ទានុក្រម នីតិវិធី រដ្ឋប្បវេណី

សំណួរ

៦- តើការចាត់ចែងរក្សាការពារមានប៉ុន្មានប្រភេទ ? អ្វីខ្លះ ?

៧- តើការរួមជួរអន្តរាគមន៍សំដៅដល់អ្វី ?

៨- តើការជំនុំជម្រះសាជាថ្មីសំដៅដល់អ្វី ?

៩- តើការទទួលបន្តនូវនីតិវិធីនៃបណ្តឹងសំដៅដល់អ្វី ?​

១០- តើការទាញហេតុផលដោយផ្ទាល់មាត់សំដៅដល់អ្វី ?

ចម្លើយ

៦- ការចាត់ចែងរក្សាការពារមានបីប្រភេទ គឺការរឹបអូសជាបណ្តោះអាសន្ន ការចាត់ចែងជាបណ្តោះអាសន្ន ចំពោះវត្ថុដែលជាកម្មវត្ថុនៃវិវាទ និងការចាត់ចែងជាបណ្តោះអាសន្នដែលកំណត់ឋានៈ (ស្ថានភាព) ជាបណ្តោះអាសន្ន ។

៧- ការរួមជួរអន្តរាគមន៍ សំដៅដល់នីតិវិធីដែលអនុញ្ញាតឲ្យតតិយជនដែលមានទំនាក់ទំនង និងមានផលប្រយោជន៍តាមផ្លូវច្បាប់ចូលរួមក្នុងបណ្តឹង ដើម្បីជួយភាគីណាមួយក្នុងគោលបំណងការពារផលប្រយោជន៍របស់ខ្លួន ។

៨- ការជំនុំជម្រះសាជាថ្មី សំដៅដល់ការជំនុំជម្រះសាឡើងវិញតាមការប្តឹងទាមទារចំពោះសាលក្រម ឬសាលដីកាស្ថាពរដោយមូលហេតុថា នីតិវិធីនៃសេចក្តីវិនិច្ឆ័យនោះមានកង្វះខាត ឬមិនប្រក្រតី ។

៩- ការទទួលបន្តនូវនីតិវិធីនៃបណ្តឹង សំដៅដល់ដំណើរការនីតិវិធីនៃបណ្តឹង ដោយអ្នកទទួលបន្តដែលមានលក្ខណសម្បត្តិបន្ទាប់ពីមានការផ្អាក ឬព្យួរនីតិវិធីនៃបណ្តឹង ។

១០- ការទាញហេតុផលដោយផ្ទាល់មាត់ សំដៅលើការបង្ហាញអំពីមធ្យោបាយតទល់ ឬការពារខ្លួនអំពីអង្គសេចក្តីដោយផ្ទាល់មាត់ ធ្វើឡើងដោយភាគីនៅចំពោះមុខតុលាការ ក្នុងសវនាការសាធារណៈ ។ ការទាញហេតុផលដោយផ្ទាល់មាត់ ជានីតិវិធីចាំបាច់ដែលត្រូវតែធ្វើមុននឹងតុលាការសម្រេចសេចក្តីដោយចេញសាលក្រម ។

តភាគ

Read More


About lawyers

Question: 1883

Article: 346


More

×

×

Tips to earn more points:

  • Get 2 point for each question.
  • Learn more how to earn point quickly with Point Center

Login

×

One more step

Please login to share your idea

Register Login