មូលហេតុអ្វីបានជាគេត្រូវទៅរៀបចំមង្គលការនៅផ្ទះខាងកូនក្រមុំ ?

បានជាគេរៀបមង្គលការនៅផ្ទះខាងកូនក្រមុំ ដោយយោលទៅតាមទស្សនៈខ្មែរយើងដែលអោយតំលៃទៅលើស្រ្តី ដោយចាត់ទុកស្រ្តីជាធំក្នុងគ្រួសារ នៅក្នុងសង្គមជាតិ ខុសប្លែកពីការរៀបអាពាហ៍ពិពាហ៍របស់ប្រពៃណីចិន ដែលគេរៀបមង្គលការនៅផ្ទះខាងស្រីផង និងនៅផ្ទះខាងប្រុសផង តែទីបំផុតត្រូវនាំកូនស្រី ទៅនៅផ្ទះកូនប្រុស ទៅតាមទស្សនៈរបស់គេ ដែលគេអោយតំលៃទៅលើកូនប្រុស ។ ហើយការរៀបមង្គលការរបស់ខ្មែរ ក៏ខុសប្លែកពីទំនៀមទំលាប់នៃជនជាតិឥណ្ឌាដែរដែលគេមានប្រពៃណី២ បែប គឺគេអាចអោយកូនស្រីទៅរៀបការនៅផ្ទះខាងប្រុសដែលគេហៅថាអាវាហមង្គលនិងទៅនាំកូនប្រុសទៅរៀបមង្គលការនៅផ្ទះខាងស្រី ដែលគេហៅថាវិវាហមង្គល ។