ចង់ប្តូរការងារ ឬ កំពុងស្វែងរកការងារ ផ្វើសារឥឡូវនេះ
សូមកុំនិយាយដើមគេ ព្រោះពាក្យមួយម៉ាត់ សម្លាប់គេមួយជីវិត
“សូមកុំនិយាយដើមគេឱ្យសោះ ពីព្រោះពាក្យយើងមួយម៉ាត់អាចសម្លាប់គេមួយជីវិត”។ នេះគឺជាប្រសាសន៍របស់លោក គួច ម៉េងលី ដែលបានចារឹកនៅក្នុងសៀវភៅ “ទស្សនអាជីវកម្ម” របស់លោក។
វាស្ទើរតែក្លាយជាទម្លាប់ ឬជាប្រពៃណីទៅហើយដែលបុគ្គលមួយចំនួនធំនៅក្នុងសង្គមចូលចិត្តនិយាយដើមគេ។ ការធ្វើខ្លួនបែបនេះ គឺមិនមែនជាការប្រពៃនោះឡើយ។ មុននឹងរិះគន់នរណាម្នាក់ យើងចាំបាច់ត្រូវសួរខ្លួនឯងម្តងហើយម្តងទៀតថា “តើរឿងនោះចាំបាច់ឬទេ? តើរឿងនោះសំខាន់ឬទេ? តើរឿងនោះពិតដែរឬទេ? តើនិយាយទៅធ្វើឱ្យប៉ះពាល់គេទេ? ចុះការនិយាយដើមគេនោះមានផលប្រយោជន៍ដល់អ្នកដែរឬទេ?” បើសិនជាចម្លើយឆ្លើយថា “អត់” សូមកុំនិយាយ! ដូច្នេះដើម្បីធ្វើខ្លួនជាមនុស្សថ្លៃថ្នូរ យើងត្រូវអប់រំចិត្តជារឿយៗបែបនេះថា “ធ្វើជាមនុស្ស យើងកុំជិះជាន់គេ កុំវាយប្រហារ កុំទិតៀន កុំប្រើពាក្យសម្តីអសុរោះ កុំនិយាយដើមគេ ពីព្រោះសម្តីមួយម៉ាត់ អាចសម្លាប់គេមួយជីវិត”។
មនុស្សយើងមួយចំនួនគឺមានទម្លាប់អាក្រក់មួយដែលគេហៅថាចរឹតព្រៃមកពីធម្មជាតិ គឺទម្លាប់ចូលចិត្តនិយាយដើមគ្នា និយាយនូវពាក្យចាក់ដោតស៊កសៀតបង្កបង្កាច់ជាការស្អប់ ឈ្នានីសគ្នាទៅវិញទៅមក ពិសេសនៅកន្លែងការងារ។ សួរថាតើវាមានប្រយោជន៍ដែរឬទេ? យើងពិតជាអាចកែប្រែ និងជម្រុះចោលនូវទម្លាប់មិនល្អទាំងនេះបាន ហើយថែមទាំងអាចកែប្រែមកជាបុគ្គលដែលចេះកែលម្អគ្នា ចេះលើកទឹកចិត្តគ្នា ចេះលើកលែង ចេះអនុគ្រោះ អភ័យសន្តោស និងចេះឈ្វេងយល់ពីស្ថានភាពនៃជីវិតពិតប្រាកដរបស់អ្នកដទៃ ព្រមទាំងចេះផ្តល់ក្តីស្រឡាញ់ឱ្យមនុស្សជុំវិញខ្លួនយើងឱ្យបានច្រើនថែមទៀតផង ប្រសិនបើយើងម្នាក់ប្រកាន់ទុកនូវពាក្យមួយឃ្លាថា “មើលមនុស្សក្នុងផ្លូវល្អ កុំកម្រនូវសេចក្ដីស្រឡាញ់”។
សូមរម្លឹកថា ដើម្បីបញ្ចៀសខ្លួនកុំឱ្យនិយាយដើមអ្នកដទៃ យើងត្រូវសួរខ្លួនឯង៥សំណួរដដែលៗថា៖
ទី១ តើចាំបាច់ទេ?
ទី២ តើសំខាន់ទេ?
ទី៣ តើប៉ះទង្គិចដល់គេទេ?
ទី៤ តើពិតដែរទេ?
ទី៥ តើមានប្រយោជន៍ទេ?
នៅក្នុងជីវិតរស់នៅប្រចាំថ្ងៃ បើយើងនិយាយដើមគេមួយម៉ាត់ នោះមុខជាគេស្អប់យើងមិនខាន។ និយាយដើមគេមួយម៉ាត់ គេនឹងបាត់បង់ទំនុកចិត្តចំពោះយើង។ ការនិយាយមិនល្អពីគេ មិនត្រឹមតែមិនបានផលល្អនោះទេ ប៉ុន្ដែថែមទាំងអាចបង្កគ្រោះថ្នាក់ចំពោះគេ និងខ្លួនឯងទៀតក៏ថាបាន។ ដូច្នេះយើងគួររៀននិយាយល្អពីគ្នាទៅវិញទៅមក ព្រោះថាបើអ្នកនិយាយល្អពីនរណាម្នាក់ អ្នកខ្លួនឯងល្អជាងគេទៅទៀត ផ្ទុយទៅវិញប្រសិនបើអ្នកនិយាយអាក្រក់ពីអ្នកណាម្នាក់ អ្នកខ្លួនឯងអាក្រក់ជាងគេទៅទៀត៕
អត្ថបទថ្មីៗទាក់ទងបទពិសោធន៍ផ្សេងៗ
Commission on transportation Service VS transportation Service ខុសគ្នាម៉េច( សកម្មភាពអាជីវកម្មសម្បង)?
ដោយ : Mon Piya 18 days ago
ដោយ : Thanakbuth Nut 7 months ago
