តើ ROAS និង ROI ខុសគ្នាដូចម្ដេច?

ROAS (Return on Ad Spend) និង ROI (Return on Investment) គឺជា Metric សំខាន់ពីរក្នុងការវាស់ស្ទង់ប្រសិទ្ធភាព Digital Marketing ប៉ុន្តែវាមានភាពខុសគ្នា។

តើ ROAS ជាអ្វី?
ROAS (Return on Ad Spend) គឺជាការវាស់ស្ទង់ចំណូលដែលបានមកពីការចំណាយលើការផ្សាយពាណិជ្ជកម្ម។ វាបង្ហាញថាអ្នករកចំណូលបានប៉ុន្មានដុល្លារសម្រាប់រាល់ដុល្លារដែលអ្នកបានចំណាយលើការផ្សាយពាណិជ្ជកម្ម។

• របៀបគណនា:

    ROAS = ចំណូលបានពីការផ្សាយពាណិជ្ជកម្ម / ការចំណាយលើការផ្សាយពាណិជ្ជកម្ម
    លទ្ធផលអាចបង្ហាញជាចំនួនដង (Ratio) ឬជាភាគរយ (គុណនឹង 100)។

• ឧទាហរណ៍: ប្រសិនបើអ្នកចំណាយ $1,000 លើការផ្សាយពាណិជ្ជកម្ម ហើយរកចំណូលបាន $5,000 ពីកាផ្សាយពាណិជ្ជកម្មនោះ។
  

    ROAS = $5,000 / $1,000 = 5
    ឬ ROAS = ( $5,000 / $1,000 ) * 100% = 500%
    នេះមានន័យថា សម្រាប់រាល់ $1 ដែលអ្នកចំណាយលើការផ្សាយពាណិជ្ជកម្ម អ្នករកចំណូលបាន $5 មកវិញ។ ROAS ខ្ពស់បង្ហាញពីប្រសិទ្ធភាពនៃការផ្សាយពាណិជ្ជកម្ម។

តើ ROI ជាអ្វី? 
ROI (Return on Investment) គឺជា Metric ទូលំទូលាយដែលវាស់ស្ទង់ប្រាក់ចំណេញ (Profit) ពីការវិនិយោគសរុប។ នៅក្នុង Digital Marketing, ROI វាស់ស្ទង់ប្រាក់ចំណេញពីការចំណាយលើការ Marketing ទាំងមូល (មិនផ្តោតតែលើថ្លៃ Ad) ដោយគិតបញ្ចូលទាំងថ្លៃចំណាយផ្សេងៗទៀតផងដែរ។ វាជួយឱ្យយល់ពីថា តើការវិនិយោគទៅលើ Marketing ទាំងមូលមានផលចំណេញឬអត់។

• របៀបគណនា:

    ROI = ( ( ចំណូលសរុប - ថ្លៃចំណាយសរុបដែលពាក់ព័ន្ធនឹងការវិនិយោគ ) / ថ្លៃចំណាយសរុបដែលពាក់ព័ន្ធនឹងការវិនិយោគ ) * 100%
    សម្រាប់ Marketing ROI គឺ ( ចំណូលបានពី Marketing - ថ្លៃចំណាយលើ Marketing ) / ថ្លៃចំណាយលើ Marketing ។ ដើម្បីឱ្យកាន់តែត្រឹមត្រូវ គួរគិតបញ្ចូលទាំងថ្លៃដើមទំនិញ (Cost of Goods Sold) និងថ្លៃចំណាយផ្សេងៗទៀត។

• ឧទាហរណ៍: អ្នកចំណាយ $10,000 លើការ Marketing ទាំងមូល (រួមទាំងថ្លៃ Ad, ថ្លៃបុគ្គលិក, ថ្លៃឧបករណ៍។ល។) ហើយរកចំណូលបាន $30,000 ពីយុទ្ធនាការ Marketing នោះ។ ឧបមាថា ថ្លៃដើមទំនិញដែលត្រូវលក់ដើម្បីបានចំណូល $30,000 គឺ $10,000 ។
  

    ចំណេញ (Profit) = ចំណូល - ថ្លៃដើមទំនិញ - ថ្លៃចំណាយលើ Marketing
    ចំណេញ = $30,000 - $10,000 - $10,000 = $10,000
    ROI = ( $10,000 / $10,000 ) * 100% = 100%
    នេះមានន័យថា ការវិនិយោគលើ Marketing បានផ្ដល់ប្រាក់ចំណេញ 100% ។

ភាពខុសគ្នាគន្លឹះ:

• ROAS វាស់ស្ទង់ ចំណូល (Revenue) ដែលបានពីការចំណាយលើ ការផ្សាយពាណិជ្ជកម្ម (Ad Spend) ប៉ុណ្ណោះ។ ROI វាស់ស្ទង់ ប្រាក់ចំណេញ (Profit) ពី ការវិនិយោគសរុប (Total Investment) ដែលរួមបញ្ចូលទាំងថ្លៃចំណាយលើ Marketing និងថ្លៃចំណាយប្រតិបត្តិការផ្សេងៗទៀត។
• ROAS ផ្តោតលើប្រសិទ្ធភាពនៃការផ្សាយពាណិជ្ជកម្មជាក់លាក់មួយ ឬក្រុម Ad Campaign ។ ROI ផ្ដល់នូវទិដ្ឋភាពទូលំទូលាយនៃប្រសិទ្ធភាពនៃការវិនិយោគទាំងមូលរបស់ Marketing ឬសូម្បីតែអាជីវកម្មទាំងមូល។

គោលបំណង: ROAS ជួយអ្នកបង្កើនប្រសិទ្ធភាពការចំណាយលើ Ad ដើម្បីទទួលបានចំណូលខ្ពស់បំផុត។ ROI ជួយអ្នកវាយតម្លៃពីប្រាក់ចំណេញសរុប និងភាពឋិតថេរយូរអង្វែងនៃការវិនិយោគ Marketing ។

សរុបមក ROAS ផ្ដល់នូវទិដ្ឋភាពលម្អិតអំពីការអនុវត្ត Ad Campaign ខណៈពេលដែល ROI ផ្ដល់នូវទិដ្ឋភាពធំទូលាយជាងអំពីប្រាក់ចំណេញសរុបពីការវិនិយោគ Marketing ទាំងមូល។ Metric ទាំងពីរនេះសំខាន់ ហើយគួរប្រើរួមគ្នាដើម្បីវាយតម្លៃប្រសិទ្ធភាព Digital Marketing បានពេញលេញ។