វិញ្ញាសាផែនដី សម្រាប់ត្រៀមប្រឡងសញ្ញាបត្រមធ្យមសិក្សាទុតិយភូមិ (វិញ្ញាសាទី៤៤)

សំណួរ

១. ហេតុអ្វីបានជាគេត្រូវអភិរក្សធនធានរ៉ែ ?

២. តើផែនដីជាឃ្លាំងធនធានដ៏មានប្រយោជន៍ ។ ចូរពន្យល់ ។

៣. តើរ៉ែលោហៈត្បូងដមានតម្លៃ និងថ្មរចនា មាននៅតំបន់ណាខ្លះនៃប្រទេសកម្ពុជា ?

៤. ចូររាប់ឈ្មោះមណ្ឌលរ៉ែសែនសំខាន់ៗនៅកម្ពុជា មណ្ឌលទាំងនោះមានកំណប់រ៉ែអ្វីខ្លះ ?

៥. តើការធ្វើអាជីវកម្មរ៉ែ ផ្ដល់ផលប៉ះពាល់ទៅលើបរិស្ថានជីវសាស្រ្ដដូចម្ដេចខ្លះ ? ចូរពន្យល់ ។

ចម្លើយ

១. បានជាគេត្រូវអភិរក្សធនធានរ៉ែ ព្រោះរ៉ែជាធនធានធម្មជាតិមិនកើតឡើយវិញ ។ រ៉ែកើនឡើងយឺតៗបំផុតដោយប្រើពេលរាប់លានឆ្នាំដើម្បីបង្កើតពំនូករ៉ែនៅក្នុងសំបកផែនដី ។

២. ផែនដីជាឃ្លាំងធនធានដ៏មានប្រយោជន៍ព្រោះ ៖

• ធនធានមិនកើតឡើងវិញ មានរ៉ែគ្រប់ប្រភេទ
• ធនធានកើតឡើងវិញមាន ដី ទឹក ខ្យល់ មនុស្ស សត្វ និងរុក្ខជាតិ ។

៣. រ៉ែលោហៈត្យូងមានតម្លៃ និងថ្មរចនា មាននៅក្នុងតំបន់ ៖

• ប៉ៃលិន មានត្បូងដកណ្ដៀង ទទឹម និងពេជ្រខ្មែរ ដែលត្រូវទទួលរងការធ្វើអាជីវកម្មយ៉ាងធ្ងន់ធ្ងរ ។
• ខេត្តរតនគីរី មានពេជ្រខ្មែរ មាស និងត្បូងកណ្ដៀង គេជីកយកតែក្នុងរដូវប្រាំងក្នុងទ្រង់ទ្រាយតូចប៉ុណ្ណោះ ។
• ថ្មកែវ នៅខេត្តពោធិ៍សាត់ សម្រាប់ផលិតគ្រឿងចម្លាក់ខ្មែរ ។

៤. មណ្ឌលរ៉ែសំខាន់នៅកម្ពុជាមាន ៥ គឺ​៖

• មណ្ឌលប៉ៃលិន ត្បូងទទឹម និងកណ្ដៀង
• មណ្ឌលបកែវ (រតនគីរី) ត្បូង និងមាស
• មណ្ឌលកំពង់ធំ រ៉ែដែក (នៅភ្នំដែក) មាស(កប់ក្នុងដីល្បាប់) និងសំនំប៉ាហាំង(នៅជុំវិញភ្នំជី និងភ្នំលឿង)
• មណ្ឌលកំពត និងបាត់ដំបង ថ្មកំបោរ និងផូស្វាត
• មណ្ឌលពោធិ៍សាត់ ថ្មកែវ(ភ្នំតាសាយ) សម្រាប់រចនាជាវត្ដុសិល្បៈ ។

៥.​ ការធ្វើអាជីវកម្មរ៉ែ ផ្ដល់ផលប៉ះពាល់ទៅលើបរិស្ថានជីវសាស្រ្ដដោយផ្ទាល់នឹងដោយប្រយោល ៖

• ប៉ះពាល់ទៅលើបរិស្ថានជីវសាស្រ្ដដោយផ្ទាល់ រួមមាន ការវិនាស បាត់បង់នៃសត្វនិងរុក្ខជាតិដែលបណ្ដាលមកពីសកម្មភាពជីកយករ៉ែឬការប៉ះនឹងដីពុល ឬទឹកពុលពីអណ្ដូងរ៉ែ ។
• ប៉ះពាល់ទៅលើបរិស្ថានជីវសាស្រ្ដដោយប្រយោល រួមមាន ការប្រែប្រួលនៅក្នុងវដ្ដអាហារ ជីវម៉ាសសរុប នានាភាពប្រភេទ និងក្នុងលំនឹងស្ថានប្រព័ន្ធ ដោយសារការផ្លាស់ប្ដូរបរិមាណ ឬគុណភាពទឹកក្នុងដី ឬទឹកលើផ្ទៃដី ។

វិញ្ញាសាទី៤៥