តើការសម្រេចចិត្តអំពីការលក់រាយមានអ្វីខ្លះ ?

ការសម្រេចចិត្តអំពីការលក់រាយមានដូចជា ៖

            ក្រុមហ៊ុនដែលស្ថិតនៅក្នុងអាជីវកម្មលក់រាយ

• ការសម្រេចចិត្តទី១​ ៖ តើត្រូវដំណើរការលក់រាយតាមហាង ឬមិនតាមហាង ។ ជាអាទិភាពអ្នកលក់រាយ បច្ចុប្បន្ននេះគឺគេដំណើរការនៅតាមហាងលក់រាយ​ ។
• ការសម្រេចចិត្តទី២ ៖ គឺកំណត់ប្រភេទនៃហាងលក់រាយដែលត្រូវដំណើរការ ។

អ្នកលក់រាយមិនតាមហាងអាចដំណើរការបាន​

ក- ប្រតិបត្តិការតាមម៉ាស៊ីនលក់ទំនិញ

ខ- ប្រតិបត្តិការទិញជាក្លឹបដែលគេបានជ្រើសរើសសមាជិកសម្រាប់ក្លឹបមួយ ហើយផ្តល់ឱកាសឲ្យបញ្ជាទិញតាមរយៈក្លឹប ។ ទំនិញទាំងនោះត្រូវយកមកពីផលិតករផ្សេងៗគ្នា ។

គ- លក់ផ្ទាល់ គឺអ្នកលក់ត្រូវបានជួលដោយផលិតករផ្សេងៗឲ្យលក់ទំនិញ ។

ចំពោះអ្នកលក់រាយដែលមានហាងត្រូវដំណើរការដូចខាងក្រោម ៖

ក- ហាងពិសេសយកចិត្តទុកដាក់លើការលក់ផលិតផលមួយ ឬមួយចំនួនតូច ។

ខ- អាគារលក់ធំៗលក់ស្រឡាយផលិតផលផ្សេងៗគ្នាតាមស្តង់ផ្សេងៗគ្នា ។

គ- ផ្សារទំនើបលក់ជាសំខាន់គឺ ចំណីអាហារ និងគ្រឿងទេស ហើយកន្លែងខ្លះ បច្ចុប្បន្ននេះលក់គ្រឿងអគ្គីសនី គ្រឿងអេឡិចត្រូនិច និងគ្រឿងប្រណិត ។

ឃ- ហាងងាយទិញគឺតូបតូចៗលក់ជាប្រចាំ និងលក់មុខទំនិញងាយទិញ ។

ង- ហាងទំនើបលក់ទំនិញចម្រុះនៅក្នុងទីតាំងទូលាយរួមមួយ ។

ច- ហាងលក់ចុះថ្លៃលក់នូវទំនិញតាមថ្លៃទាប ។

ឆ- ហាងពិពណ៌កាតាឡុក កន្លែងដែលអតិថិជនអាចមើលកាតាឡុក និងទិញទំនិញដែលមាននៅក្នុងឃ្លាំងជិតៗនោះ ។

• ការសម្រេចចិត្តទី៣ ៖ គឺការឆ្ពោះទៅរកចំណែកទីផ្សារ ដែលក្រុមហ៊ុនប្រាថ្នាឈានទៅដល់ ។ អ្នកលក់ជាច្រើនគ្មានគំនិតច្បាស់លាស់ថា តើគេត្រូវបម្រើអ្នកណា ដូច្នេះគេត្រូវខិតខំបម្រើមនុស្សគ្រប់រូប ។ គំនិតច្បាស់លាស់នៃចំណែកទីផ្សាររបស់ក្រុមហ៊ុនអាចជួយក្នុងការបង្កើនយុទ្ធសាស្រ្ត Marketing មានប្រសិទ្ធិភាព ។

ទិដ្ឋភាពដ៏សំខាន់នៃយុទ្ធសាស្រ្ត Marketing លក់រាយគឺ គោលគំនិតនិងជំហរនៃការលក់រាយ ។ ប្រភេទនៃហាងលក់រាយដែលបញ្ជាក់ពីខាងលើមានលក្ខណៈទូទៅពេក ។ គោលគំនិតនៃការលក់រាយ គឺត្រូវជាក់លាក់ដំដៅទៅរកអតិថិជនជាក់លាក់ ។ គោលគំនិតដែលបំពាក់ត្រូវតែដោយឡែកតែមួយគួរជឿជាក់ និងសំខាន់ចំពោះចំណែកទីផ្សារ គោលដៅដែលបានជ្រើសរើស ។ Marketing mix ត្រូវរៀបចំដោយផ្សាភ្ជាប់ជាមួយគោលគំនិតលក់រាយ ។

រួមមានការសម្រេចចិត្តដែលទាក់ទងដល់ ៖

ក- ក្រុមផលិតផលដែលលក់រាយ ឬសេវាដែលត្រូវបម្រើអតិថិជន

ខ- កម្រិតថ្លៃទូទៅនៃផលិតផលដែលត្រូវលក់

គ- ទីតាំងនៃហាងទំនិញលក់រាយ

ឃ- ការតុបតែង និងការតាំងនៃហាងលក់ទំនិញរាយ

ង- កម្មវិធីទំនាក់ទំនង Marketing ដែលរួមមានការផ្សាយពាណិជ្ជកម្ម និងទំនាក់ទំនងសាធារណៈសមស្រប ។