​តើលក្ខណៈពិសេសនៃមុខងារសាធារណៈមានប៉ុន្មានយ៉ាង ? ចូរបកស្រាយ ។

          ១. បេសកម្មរបស់មុខងារសាធារណៈ ​​ជាបេសកម្មបម្រើសេវាសាធារណៈ ។ មន្រ្តីរាជការត្រូវគោរពគោលការណ៍ទាំងឡាយក្នុងការបម្រើសេវាសាធារណៈ ព្រមទាំងចេះសម្របសម្រួលក្នុងក្របខណ្ឌច្បាប់មានភាពទន់ភ្លន់ និងប្រកបដោយសីលធម៌ចំពោះប្រជាពលរដ្ឋ ។ បេសកម្មម្យ៉ាងទៀត គឺជាការធ្វើឲ្យសម្រេចជោគជ័យនូវគោលនយោបាយ និងទិសដៅដែលកំណត់ដោយរាជរដ្ឋាភិបាល ។

          ២. មធ្យោបាយមុខងារសាធារណៈ គឹជាអំណាចសាធារណៈ និងឥណទានសាធារណៈ ។ អ្នករាជការជាអ្នកអនុវត្តបទបញ្ជាដែលរាជរដ្ឋាភិបាលដាក់មកឲ្យ ព្រមទាំងមានបុព្វសិទ្ធិនៃអំណាចសាធារណៈ សម្រាប់ប្រើក្នុងការងាររបស់ខ្លួន  ។ អ្នករាជការជាអ្នកទទួលចាយឥណទានសាធារណៈ ដែលបានមកពីការយកពន្ធដារសព្វសោពើ និងប្រភពចំណូលផ្សេងៗទៀតក្នុងក្របខណ្ឌហិរញ្ញវត្ដុ និងថវិការ ។

          ៣. ប្រសិទ្ធិភាពនៃសកម្មភាពរបស់មុខងារសាធារណៈ

• ការត្រួតពិនិត្យខាងក្នុងៈ ការត្រួតពិនិត្យពីភាពត្រឹមត្រូវតាមច្បាប់ ពោលគឺមើលពីភាពគោរពច្បាប់ បទបញ្ជាធ្វើតាមនីតិវិធីមានភាពទៀងទាត់ មិនខ្ជះខ្ជាយ​ និងអាចដាក់ទណ្ឌកម្មចំពោះអ្នកនៅក្រោមបង្គាប់ ពោលគឺជាការត្រួតពិនិត្យរបស់ថ្នាក់ដឹកនាំ លើទង្វើរបស់អ្នកក្រោមបង្គាប់បន្តបន្ទាប់ ។
• ការត្រួតពិនិត្យខាងក្រៅៈ ការត្រួតពិនិត្យផ្នែកហិរញ្ញវត្ថុ ពោលគឺការត្រួតពិនិត្យពីចំណាយចំណូល របស់ស្ថាប័ន ដោយក្រសួងសេដ្ឋកិច្ច និងអគ្គសវនកម្មជាតិ ។ល។