សំណួរ-ចម្លើយ ការគ្រប់គ្រងហិរញ្ញវត្ថុអន្តរជាតិ (ភាគ៥)

សំណួរ

២១- តើគុណសម្បត្តិ និង គុណវិបត្តិនៃរចនាសម្ព័ន្ធចាត់តាំងតាមខ្សែរយៈផ្ទាល់មានអ្វីខ្លះ ?

២២- តើរចនាសម្ព័ន្ធចាត់តាំងតាមខ្សែរយៈផ្ទាល់ និងប្រយោល មានន័យដូចម្តេច?

២៣- តើគុណសម្បត្តិ និង គុណវិបត្តិនៃរចនាសម្ព័ន្ធចាត់តាំងតាមខ្សែរយៈផ្ទាល់និងប្រយោល មានអ្វីខ្លះ?

២៤- តើរចនាសម្ព័ន្ធចាត់តាំងតាមតួនាទី ឬមុខងារមានន័យដូចម្តេច ?

២៥- តើគុណសម្បត្តិ និង គុណវិបត្តិនៃរចនាសម្ព័ន្ធចាត់តាំងតាមតួនាទី ឬមុខងារ មានអ្វីខ្លះ?

ចម្លើយ

២១- គុណសម្បត្តិ និង គុណវិបត្តិ នៃរចនាសម្ព័ន្ធចាត់តាំងតាមខ្សែរយៈផ្ទាល់មានដូចតទៅ ៖

+ គុណសម្បត្តិ ៖

• និយោជិកម្នាក់ៗរាយការណ៍ឬទទួលបញ្ជានិងប្រតិបត្តិបញ្ជាទៅតាមខ្សែរយៈផ្ទាល់របស់ខ្លួនប៉ុណ្ណោះ
• ងាយស្រួលក្នុងការដាក់ចេញនូវសេចក្តីសម្រេចផ្សេងៗ នេះគឺជាគុណសម្បត្តិពិសេសដែល​បង្ករ​លក្ខណៈអោយអនុវត្តបាននូវរបបប្រធានយ៉ាងពេញលេញ
• ការទទួលខុសត្រូវ និង ការធានាត្រូវបានកំណត់ច្បាស់លាស់ ។

+ គុណវិបត្តិ ៖

• ការងារមិនអាចដំណើការបានល្អ បើអ្នកគ្រប់គ្រងមិនមានសមត្ថភាពគ្រប់គ្រង​ឯកទេស​មិនមាន​ទស្សនៈគ្រប់ជ្រុងជ្រោយនិងជាប្រធានដ៏ពូកែជាងគេបំផុតទេនោះ
• អ្នកគ្រប់គ្រងមានភារៈកិច្ចច្រើនមុខផ្សេងៗគ្នា ហើយច្រើនតែស្តែងឡើងនូវភាពច្របូកច្របល់ ក្នុងការធ្វើសេចក្តីសម្រេច
• នៅពេលដែលមានការទាក់ទងពីផ្នែកមួយទៅផ្នែកមួយទៀត លុះត្រាតែមានការអនុញ្ញាតតាម ខ្សែរយៈផ្ទាល់
• នៅពេលដែលផលិតកម្មមានភាពស្មុគ្រស្មាញខ្លាំងមិនអាចឆ្លើយតបទៅតាមពេលវេលាហើយធ្វើអោយការគ្រប់គ្រងមិនមានប្រសិទ្ធិភាពខ្ពស់ ។

​​​២២- រចនាសម្ព័ន្ធចាត់តាំងតាមខ្សែរយៈផ្ទាល់ និង ប្រយោល   ក្នុងគំរូរចនាសម្ព័ន្ធចាត់តាំងតាម​ខ្សែរយៈ​ផ្ទាល់ ត្រូវបានបន្ថែមដោយក្រុមអ្នកឯកទេសដែលពួកគេបំពេញតួនាទីជាអ្នកអោយយោបល់ ឬជា​សេនា​ធិការអម ។ ផែកចាត់តាំងបែបនេះបំពេញមុខងារផ្ទាល់ចំពោះគោលដៅរបស់​អង្គភាព ។ ចំណែក​ឯសេ​នា​ធិការវិញជាអ្នកផ្តល់យោបល់លើឯកទេសទាំងឡាយដែលអាចធ្វើអោយខ្សែរយៈចាត់តាំងផ្ទាល់របស់តួនាទីទទួលបាននូវប្រសិទ្ធិភាពខ្ពស់។

២៣- គុណសម្បត្តិ និង គុណវិបត្តិ នៃរចនាសម្ព័ន្ធចាត់តាំងតាមខ្សែរយៈផ្ទាល់និងប្រយោល មានដូចតទៅ ៖

+ គុណសម្បត្តិ ៖

• អ្នកប្រតិបត្តិនៅតែស្ថិតក្រោមការគ្រប់គ្រងតាមខ្សែរយៈផ្ទាល់ដដែល
• អ្នកគ្រប់គ្រងទទួលបាននូវការជួយឧបត្ថម្ភជាច្រើនពីស្ថាប័នដែលជាសេនាធិការ
• ជួយធ្វើអោយការចាត់ចែងរបស់អ្នកគ្រប់គ្រងដែលមិនអាចមានសមត្ថភាព ឯកទេសគ្រប់​គ្រាន់​ក្នុង​​ការបញ្ជាទៅជាមានប្រសិទ្ធិភាព។

+ គុណវិបត្តិ ៖

• អាចមានការប៉ះទង្គិចក្នុងរឿងតែមួយរវាងរចនាសម្ព័ន្ធចាត់តាំងតាមខ្សែរយៈផ្ទាល់ និងស្ថាប័ន​ដែលជាសេនាធិការ
• ទំនាស់អាចកើតមានឡើងដោយសារក្រុមអ្នកឯកទេស ជាសេនាធិការចង់ជះអំណាចខ្លាំង​ពេក​ទៅ​លើអ្នកត្រួតត្រាតាមខ្សែរយៈផ្ទាល់
• ក្រុមអ្នកឯកទេសដែលជាសេនាធិការអាចនិងត្រូវបានផ្នែកគ្រប់គ្រងតាមខ្សែរយៈផ្ទាល់ស្តីបន្ទោសដោយសារគេយកសេចក្តីស្នើរ ឬយោបល់របស់ខ្លួនទៅអនុវត្តមិនបានជោគជ័យ។

២៤- រចនាសម្ព័ន្ធចាត់តាំងតាមតួនាទី ឬមុខងារ គឺជាអ្នកគ្រប់គ្រងម្នាក់មាននាក់ត្រួតត្រា​ច្រើនមានន័យថា​អ្នកគ្រប់គ្រងលើឯកទេសផ្សេងៗគ្នា មានសិទ្ធិអំណាចត្រួតត្រាលើអ្នកប្រតិបត្តិទាំងអស់​អោយតែទាក់​ទង​ទៅ​នឹងវិស័យឯកទេសរបស់ខ្លួន។

២៥- គុណសម្បត្តិ និង គុណវិបត្តិ នៃរចនាសម្ព័ន្ធចាត់តាំងតាមតួនាទី ឬមុខងារមានដូចតទៅ ៖

+ គុណសម្បត្តិ ៖

• ប្រធានទទួលខុសត្រូវដោយឆ្លងកាត់ការប្រើប្រាស់អ្នកឯកទេសពូកែៗតាមមុខងារ តួនាទី នីមួយៗរបស់គេក្នុងការចាត់ចែងការងារ
• អ្នកប្រតិបត្តិបានទទួលនូវការដឹកនាំពីអ្នកគ្រប់គ្រងលើលឯកទេសផ្សេងៗគ្នាជាច្រើន
• ងាយស្រួលក្នុងការត្រួតពិនិត្យនូវការងារដែលដាក់អោយធ្វើ។

+ គុណវិបត្តិ ៖

• ច្រើនតែមានការភ័ន្តច្រលំដោយទទួលបញ្ជាមិនត្រឹមតែអ្នកត្រួតត្រាតាមខ្សែរយៈផ្ទាល់ប៉ុណ្ណោះទេថែមទាំងតាមអ្នកឯកទេសនៃមុខងារនីមួយៗទៀតផង
• របបប្រធានត្រូវទទួលរងនូវការរំលោភ ព្រោះមិនអាចគួបផ្សំបាននូវការបញ្ជា​ទាំងឡាយរបស់ខ្លួន​ជាមួយអ្នក​គ្រប់គ្រងតាមមុខងារនីមួយឡើយ
• មានការលំបាកក្នុងការវិនិច្ឆ័យនូវការទទួលខុសត្រូវសំរាប់ការបរាជ័យនៅក្នុងសកម្មភាពការងារ ។

តភាគ