ដូចម្តេចដែលហៅថា ទោសបន្ថែម ? ចែកចេញប៉ុន្មាន ?

ទោសបន្ថែម គឺជាទោសដែលចៅក្រមមិនអាចយកទៅសម្រេចដាក់តែឯងបានទេ ពោលគឺថាចៅក្រមនឹងសម្រេចទោសបន្ថែមណាមួយបានលុះត្រាតែបានសម្រេចមូលទោសណាមួយសិន ពីព្រោះទោសបន្ថែមគ្រាន់តែជាកម្មវិបាករបស់មូលទោសតែប៉ុណ្ណោះ ។ និយាយម្យ៉ាងទៀតថា ទោសបន្ថែមជាទោសដែលតុលាការប្រកាសបន្ថែមលើមូលទោស និងមានចែងយ៉ាងជាក់លាក់ដោយបញ្ញត្តិដែលបង្ក្រាបបទល្មើស ( មាត្រា ៥៣ និង ៥៥ នៃក្រមព្រហ្មទណ្ឌ) ។ ទោសបន្ថែម មានគោលដៅបំពេញបន្ថែមឲ្យមូលទោស ដើម្បីបង្ការការប្រព្រឹត្តបទល្មើសសាជាថ្មី ។ ដោយផ្អែកតាមលក្ខខណ្ឌនៃការប្រកាសទោស (មាត្រា ៥៤និង ១៦៩ នៃក្រមព្រហ្មទណ្ឌ) ទោសបន្ថែមអាចចែកចេញជាពីរប្រភេទគឺ ៖

• ទោសបន្ថែមដែលអាចប្រកាសតាមជម្រើសរបស់ចៅក្រម
• ទោសបន្ថែមដែលត្រូវប្រកាសជាកាតព្វកិច្ច

ទោសបន្ថែម និងអាចប្រកាសទោសបានលុះត្រាតែទោសនោះ ត្រូវបានចែងដោយជាក់លាក់ចំពោះបទឧក្រិដ្ឋបទមជ្ឈឹម ឬបទលហុដែលត្រូវចោទប្រកាន់ ។ ក្នុងករណីច្បាប់កំណត់ថា ទោសបន្ថែមត្រូវតែប្រកាសជាកាតព្វកិច្ចនោះតុលាការត្រូវតែប្រកាសទោសបន្ថែមជាដាច់ខាត (មាត្រា ៥៤ នៃក្រមព្រហ្មទណ្ឌ) ។