សំណួរ-ចម្លើយ ពន្ធលើប្រាក់បៀវត្ស (ភាគ៣)

សំណួរ

១១-​ តើពាក្យប្រាក់បៀវត្សសំដៅទៅលើអ្វី ?

១២- តើពាក្យប្រាក់បៀវត្សប្រភពកម្ពុជាមានន័យដូចម្តេច ?

១៣- តើពាក្យអ្នកជាប់ពន្ធនិវាសនជនសំដៅទៅលើអ្វី ?

១៤- តើពាក្យនិយោជករួមមានអ្វីខ្លះ ?

១៥- តើពាក្យនិយោជិតសំដៅលើអ្វី ?

១៦- តើការលើកលែងពន្ធលើប្រាក់បៀវត្សរបស់មន្ត្រីការទូត និងមន្រ្តីការបរទេសដទៃទៀតត្រូវបានកំណត់អ្វីខ្លះ ? ចូររៀបរាប់ ។

១៧- តើបំណុលពន្ធនិងកាតព្វកិច្ចកាត់ទុកពន្ធត្រូវបានកំណត់អ្វីខ្លះ ?

ចម្លើយ

១១- ពាក្យប្រាក់បៀវត្សសំដៅដល់បៀវត្ស លាភបការ ប្រាក់បំណាច់ បុព្វលាភ ប្រាក់ម៉ោងបន្ថែម ប្រាប់ប៉ះប៉ូវនានា និងអត្ថប្រយោជន៍បន្ថែម ដែលបានទូទាត់ឲ្យដល់និយោជិត ឬដែលបានទូទាត់ដើម្បីប្រយោជន៍ផ្ទាល់ឬប្រយោលដល់និយោជិត ចំពោះការបំពេញសកម្មភាពបម្រើការងារ ។

១២- ពាក្យប្រាក់បៀវត្សប្រភពកម្ពុជា មានន័យថា ប្រាក់បៀវត្សដែលបានទទួលក្នុងក្របខណ្ឌនៃការបំពេញសកម្មភាពបម្រើការងារ នៅក្នុងព្រះរាជាណាចក្រកម្ពុជា ។ ដោយឡែក ចំពោះប្រាក់បៀវត្សដែលអនវាសនជនបានទទួលក្នុងការផ្តល់ជំនួនបច្ចេកទេសត្រូវចាត់ទុកថាមានប្រភពនៅក្នុងប្រទេស ដែលអ្នកទូទាត់ប្រាក់បៀវត្សនោះស្នាក់នៅ ។

១៣- ពាក្យអ្នកជាប់ពន្ធនិវាសនជន សំដៅទៅដល់ ៖

• រូបវ័ន្តបុគ្គលដែលមាននិវាសនដ្ឋាន ឬមានកន្លែងស្នាក់នៅជាគោលដើមនៅក្នុងព្រះរាជាណាចក្រកម្ពុជា ឬដែលមានវត្តមាននៅក្នុងព្រះរាជាណាចក្រកម្ពុជាលើសពី ១៨២ថ្ងៃ ក្នុងរយៈពេល១២ខែ ណាមួយ ដែលបានបញ្ចប់ក្នុងឆ្នាំជាប់ពន្ធចរន្ត ។
• នីតិបុគ្គល ឬក្រុមហ៊ុនសហកម្មសិទ្ធិ ដែលត្រូវបង្កើតឬត្រូវបានគ្រប់គ្រងនៅក្នុងព្រះរាជាណាចក្រកម្ពុជា ឬដែលមានកន្លែងប្រកបអាជីវ​កម្មជាគោលដើមនៅក្នុងព្រះរាជាណាចក្រកម្ពុជា ។

១៤- ពាក្យនិយោជក រួមមានស្ថាប័នរដ្ឋនីតិបុគ្គល ក្រុមហ៊ុនអាជីវកម្មនិវាសនជន គ្រឹះស្ថានអចិន្ត្រៃនៅក្នុងព្រះរាជាណាចក្រកម្ពុជា អង្គការមិនស្វែងរកប្រាក់ចំណេញ ឬរូបវ័ន្តនិវាសនជនដែលប្រកបអាជីវកម្ម ។

១៥- ពាក្យនិយោជិត សំដៅដល់រូបវ័ន្តបុគ្គលដែលទទួលបានប្រាប់បៀវត្សពីសកម្មភាពបម្រើការងារ រួមបញ្ចូលទាំងអ្នកទទួលខុសត្រូវ ឬអភិបាលរបស់សហគ្រាស មន្រ្តីរាជការ មន្ត្រីជ្រើសតាំងដោយការបោះឆ្នោត លើកលែងតែសមាជិករដ្ឋសភា និងព្រឹទ្ធសភា ។

១៦- ការលើកលែងពន្ធលើប្រាក់បៀវត្សរបស់មន្ត្រីការទូត និងមន្រ្តីការបរទេសដទៃទៀតត្រូវបានកំណត់ដូចខាងក្រោម ៖

ក ការលើកលែងពន្ធលើប្រាក់បៀវត្សចំពោះ ៖

• ប្រាក់បៀវត្សដែលមន្ត្រីនិងនិយោជិតបេសកកម្មទូត ឬកុងស៊ុលរបស់រដ្ឋាភិបាលបរទេសណាមួយ ដែលកាន់កាប់លិខិតឆ្លងដែនការទូត ឬផ្លូវការរបស់ប្រទេសនោះ បានទទួលក្នុងក្របខណ្ឌនៃការបំពេញមុខងារជាផ្លូវការនៅក្នុងព្រះរាជាណាចកម្រកម្ពុជា ។
• ប្រាក់បៀវត្សដែលតំណាងមន្ត្រី និងនិយោជិតបរទេសរបស់អង្គការអន្តរជាតិ និងរបស់ភ្នាក់ងារខាងប្រតិបត្តិការបច្ចេកទេស នៃរដ្ឋាភិបាលដទៃទៀត បានទទួលក្នុងក្របខណ្ឌនៃការបំពេញមុខងារជាផ្លូវការ នៅក្នុងព្រះរាជាណាចក្រកម្ពុជា ។

ខ ការលើកលែងពន្ធក្នុងចំណុចនេះត្រូវឈរលើគោលការណ៍បដិការ រវាងរដ្ឋាភិបាលដែលពាក់ព័ន្ធ ។ ប្រាក់ចំណូលរបស់និយោជិតត្រូវបានលើកលែងពន្ធមាន ៖

• ប្រាក់សំណងដោយពិតប្រាកដនូវចំណាយវិជ្ជាជីវៈ ដែលបានចាយដោយនិយោជិត តាមសេចក្តីបង្គាប់និងសម្រាប់ជាប្រយោជន៍នៃនិយោជក ហើយដែលបំពេញលក្ខណៈ៣ដូចខាងក្រោម ៖

- បានចាយក្នុងប្រយោជន៍ផ្ទាល់ និងដាច់ខាតរបស់សហគ្រាស

- មិនបង្ហាញលក្ខណៈហួសប្រមាណឬស្តុកស្តម្ភហួសហេតុ

- បានបង្ហាញភ័ស្តុតាងដោយយកវិក័យបត្ររាយលំអិត និង​បានទូទាត់ស្រេចបាច់ហើយ ដែលបានធ្វើក្នុងនាមអ្នកបានទទួលប្រាប់សំណងនូវចំណាយពិតប្រាកដ ។

• ប្រាក់បំណាច់នៃការបញ្ឈប់លែងឲ្យធ្វើការ ក្នុងកម្រិតដែលបានបញ្ញត្តិក្នុងច្បាប់ការងារ ។
• លាភបការបន្ថែមមានលក្ខណៈខាងសង្គមកិច្ច ក្នុងករណីដែលបានបញ្ញត្តិក្នុងច្បាប់ការងារ ។
• ការផ្គត់ផ្គង់ឲ្យដោយឥតគិតថ្លៃ ឬយកថ្លៃទាបជាថ្លៃដើមនូវឯកសណ្ឋាន ឬបរិក្ខាសម្រាប់វិជ្ជាជីវៈពិសេស ។
• ប្រាក់បំណាច់ម៉ៅការសម្រាប់ចំណាយបេសកកម្ម និងការធ្វើដំណើរ ។ ប្រាក់បំណាច់នេះមិនត្រូវត្រួតគ្នាជាមួយប្រាក់សំណងពិតប្រាកដ នូវចំណាយដូចមានចែងខាងលើឡើយ ។

១៧- បំណុលពន្ធនិងកាតព្វកិច្ចកាត់ទុកពន្ធត្រូវបានកំណត់ដូចតទៅ ៖

• ពន្ធនេះ គឺជាបំណុលកាតព្វកិច្ចកាត់ទុករបស់រូបវ័ន្តបុគ្គល ដែលបានទទួលប្រាក់បៀវត្ស រួមទាំងរូបវ័ន្តបុគ្គលបរទេសផង វៀរលែងតែមានបទប្បញ្ញត្តិផ្ទុយដែលមានចែងក្នុងកិច្ចព្រមព្រៀងអន្តរជាតិ ។
• ពន្ធលើប្រាក់បៀវត្សត្រូវប្រមូលតាមរបៀបកាត់ទុកជាមុនរៀងរាល់ខែដោយនិយោជននៅរាល់ពេលបើកប្រាក់ ។ ការបង់ពន្ធដែលបានកាត់ទុក ប្រាក់ពន្ធកាត់ទុកដែលទាក់ទងដល់ការបើកប្រាក់បៀវត្ស ធ្វើឡើងក្នុងខែណាមួយត្រូវបង់យ៉ាងយឺតបំផុតត្រឹមថ្ងៃទី២០ នៃខែបន្ទាប់ ជូនទៅរដ្ឋ​បាលសារពើពន្ធនៅទីកន្លែងនៃលំនៅដ្ឋាន ឬគ្រឹះស្ថានជាគោលដើមនៃអ្នកទទួលភារៈកាត់ទុកប្រាក់ពន្ធនោះ ។

តភាគ