សំណួរ-ចម្លើយ ត្រៀមប្រឡងគយ (ភាគ១២)

សំណួរ

៥៦- តើកាលៈទេសៈអ្វីខ្លះ ដែលតម្រូវឲ្យមានការតម្កល់និមុត្តិធានា ?

៥៧- តើការដាក់ទំនិញចូលកន្លែងសន្និធិគយត្រូវអនុលោមតាមនីតិវិធីដូចម្តេចខ្លះ ?

៥៨- ដើម្បីក្លាយជាដើមសារគយ តើត្រូវមានលក្ខណៈសម្បត្តិអ្វីខ្លះ ?

៥៩- តើមានលក្ខខណ្ឌអ្វីខ្លះ ដែលរដ្ឋមន្រ្តីក្រសួងសេដ្ឋកិច្ចនិងហរិញ្ញវត្ថុមានសិទ្ធិលុបអាជ្ញាបណ្ណសន្និធិគយបណ្តោះអាសន្ន ?

៦០- តើនីតិបុគ្គលដែលត្រូវចាត់ទុកជាជើងសារគយត្រូវមានលក្ខណៈអ្វីខ្លះ ?

ចម្លើយ

៥៦- កាលៈទេសៈដែលត្រូវតម្កល់និមុត្តិធានាមានដូចជា ៖

• ការយកទំនិញចេញពីដែនគយមុនពេលបង់ពន្ធ ឬអាករ
• ដឹកជញ្ជូនទំនិញក្នុងរង្វង់ដែនគយ ឬឆ្លងកាត់ដែនគយក្រោមរបបឆ្លងកាត់
• ការប្រកបធុរកិច្ចជាជើងសារគយ ប្រតិបត្តិករភណ្ឌាគារគយមានដែនកំណត់ និងប្រតិបត្តិករទីកន្លែងសន្និធិគយបណ្តោះអាសន្ន
• ការយកទំនិញចេញពីគយដោយរងចាំសេចក្តីសម្រេចតវ៉ាលើទំនិញ ដែលត្រូវបានឃាត់ទុកជាបណ្តោះអាសន្ន
• កាលៈទេសៈផ្សេងៗទៀតដែលរដ្ឋបាលគយបានកំណត់ ។

៥៧- ការដាក់ទំនិញចូលកន្លែងសន្និធិគយត្រូវអនុលោមតាមនីតិវិធីដូចខាងក្រោម ៖

• ទំនិញទំាងឡាយត្រូវបង្ហាញជូនមន្រ្តីគយមុនដាក់ទំនិញចូល
• ត្រូវតម្កល់ប្រតិវេទន៍បម្រួញ និងមានចុះហត្ថលេខាដោយប្រតិបត្តិការកន្លែងសន្និធិគយ
• ប្រតិវេទន៍ដែលបានកំណត់ត្រូវមាន ៖

- លេខនិងកាលបរិច្ឆេទចុះបញ្ជិកា

- បរិមាណ ប្រភេទ សញ្ញា និងលេខភណ្ឌិកា

- ទម្ងន់ទាំសម្បក

- នាមរបស់អ្នកនាំចូល ឬអ្នកនាំចេញ

- ប្រទេសផ្គត់ផ្គង់ ឬនាំចេញ និងប្រភេទនាំចូល

- របៀបនិងមធ្យោបាយដឹកជញ្ជូន

- ឯកសារយោងដែលចង្អុលបង្ហាញអំពីប្រភេទ លេខ កាលបរិច្ឆេទនៃឯកសារដឹកជញ្ជូននាពេលនាំចូល ឬឯកសារផ្សេងទៀតនាពេលនាំចេញ ។

៥៨- ដើម្បីក្លាយជាជើងសារគយត្រូវមានលក្ខណៈសម្បត្តិដូចជា ៖

• មានសញ្ជាតិខ្មែរ ឬជានិរាសនជនដែលមានលំនៅដ្ឋាននៅកម្ពុជា
• មានអាយុយ៉ាងតិច១៨ឆ្នាំ
• មានសញ្ញាបត្រយ៉ាងតិចត្រឹមមធ្យមសិក្សាទុតិយភូមិ
• មានលិខិតថ្កល់ទោសដែលចេញដោយស្ថាប័នមានសមត្ថកិច្ច
• មានធនធានហិរញ្ញវត្ថុគ្រប់គ្រាន់ដើម្បីធ្វើធុរកិច្ច
• មានប្រវត្តិអនុលោមភាពសារពើពន្ធស្អាតស្អំ
• បានប្រឡងជាប់ជាជើងសារគយ មានលក្ខណៈសម្បត្តិគ្រប់គ្រាន់ក្រោមការរៀបចំ និងចាត់ចែងដោយទីចាត់ការគយនិងរដ្ឋាករ ។

៥៩- រដ្ឋមន្រ្តីក្រសួងសេដ្ឋកិច្ចនិងហរិញ្ញវត្ថុមានសិទ្ធិលុបអាជ្ញាបណ្ណសន្និធិគយបណ្តោះអាសន្នក្នុងករណីដូចជា ៖

• លែងជាម្ចាស់ ឬលែងជាអ្នកជួលទីកន្លែងសន្និធិគួបណ្តោះអាសន្ននោះ
• ស្នើសុំលុបអាជ្ញាបណ្ណជាលាយលក្ខអក្សរទៅរដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ
• ត្រូវបានក្ស័យធន
• ជាកម្មវត្ថុនៃភាពដែលមិនអាចសងបំណុលរបស់ខ្លួនបាន
• ខកខានមិនបានអនុវត្តតាមច្បាប់ ឬបទញ្ញត្តិនានាដែលពាក់ព័ន្ធនឹងការនាំចេញនាំចូលទំនិញ
• បានប្រព្រឹត្តិអំពើមិនត្រឹមត្រូវក្នុងការបំពេញធុរកិច្ចរបស់ខ្លួនជាមួយនឹងអាជ្ញាធរមានសមត្ថកិច្ច ជើងសារគយ អ្នកនាំចេញនាំចូល និងអ្នកដឹកជញ្ជូន
• គ្មានសមត្ថភាពដើម្បីធ្វើប្រតិបត្តិការទីកន្លែងសន្និធិបណ្តោះអាសន្ន ។

៦០- នីតិបុគ្គលដែលត្រូវចាត់ទុកជាជើងសារគយមានលក្ខណៈសម្បត្តិដូចជា ៖

• ក្រុមហ៊ុន

- ត្រូវបង្កើតក្រុមហ៊ុន និងមានបញ្ជិកានៅក្រសួងពាណិជ្ជកម្ម

- មានធនធានហិរញ្ញវត្ថុគ្រប់គ្រាន់ដើម្បីធ្វើធុរកិច្ច

- មានប្រវត្តិអនុលោមសារពើពន្ធស្អាតស្អំ

- មានវិញ្ញាបនបត្រចុះបញ្ជីអាករលើតម្លៃបន្ថែម

• ជាសមាជិកក្រុមប្រឹក្សាភិបាលរបស់ក្រុមហ៊ុន ត្រូវមានលិខិតថ្កោលទោសដែលចេញដោយក្រសួងយុត្តិធម៌
• ជាសមាជិកក្រុមប្រឹក្សាក្រុមហ៊ុន ត្រូវមានប្រវត្តិអនុលោមភាពសារពើពន្ធស្អាតស្អំ
• ជាសមាជិកក្រុមប្រឹក្សាភិបាល ត្រូវមានសញ្ជាតិខ្មែរឬជានិរាសនជនដែលមានលំនៅដ្ឋាននៅកម្ពុជា ។

តភាគ