សំណួរ-ចម្លើយ អនុក្រឹត្យស្តីពី ការអនុវត្តកម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម២ឆ្នាំ (ភាគ១)

សំណួរ

១- តើប័ណ្ណសមធម៌សំដៅដល់អ្វី ?

២- តើប័ណ្ណអាទិភាពសំដៅដល់អ្វី ?

៣- តើមូលដ្ឋានសុខភិបាលសាធារណៈសំដៅដល់អ្វី ?

៤- តើប្រាក់ឧបត្ថម្ភត្រូវផ្តល់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ ក្នុងគ្រួសារក្រីក្រដែលមកទទួលសេវាពិនិត្យសុខភាពនៅមូលដ្ឋានសុខាភិបាលសាធារណៈមានដំណាក់អ្វីខ្លះ ?

៥- តើលក្ខខណ្ឌដើម្បីទទួលបានរបបគោលនយោបាយមានអ្វីខ្លះ ?

ចម្លើយ

១- ប័ណ្ណសមធម៌ សំដៅដល់ប័ណ្ណដែលចេញដោយក្រសួងផែនការ តាមរយៈការកំណត់អត្តសញ្ញាណគ្រួសារក្រីក្រ តាមជុំប្រមូលទិន្នន័យ ឬតាមការស្នើសុំ ។

២- ប័ណ្ណអាទិភាព សំដៅដល់ប័ណ្ណដែលចេញដោយមន្ទីរពេទ្យ សម្រាប់ទទួលសេវាសុខភាពសាធារណៈ និងប័ណ្ណដែលចេញដោយមណ្ឌលសុខភាព សម្រាប់ស្រ្តីក្រីក្រមានផ្ទៃពោះ និងកូនអាយុក្រោម២ឆ្នាំ ។

៣- មូលដ្ឋានសុខភិបាលសាធារណៈ សំដៅដល់មន្ទីរពេទ្យជាតិ មជ្ឈមណ្ឌលជាតិគាំពារមាតា និងទារក និងមន្ទីរពេទ្យបង្អែក មណ្ឌលសុខភាព និងប៉ុស្តិ៍សុខភាព ។

៤- ប្រាក់ឧបត្ថម្ភត្រូវផ្តល់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ ក្នុងគ្រួសារក្រីក្រដែលមកទទួលសេវាពិនិត្យសុខភាពនៅមូលដ្ឋានសុខាភិបាលសាធារណៈមានដំណាក់ដូចជា ៖

• ដំណាក់កាលទី១ ៖ ផ្តល់ការឧបត្ថម្ភចំនួន ៤០,០០០រៀលក្នុង១ដង សម្រាប់ការមកទទួលសេវាពិនិត្យផ្ទៃពោះដែលផ្តល់ជាអតិបរមាចំនួន៤ដង មុនពេលសម្រាលកូន
• ដំណាក់កាលទី២ ៖ ផ្តល់ជូនការឧបត្ថម្ភចំនួន២០០,០០០រៀលតែ១ដងគត់ នៅពេលសម្រាលកូន
• ដំណាក់កាលទី៣ ៖ ផ្តល់ការឧបត្ថម្ភចំនួន៤០,០០០រៀលក្នុង១ដង ដែលផ្តល់ជាអតិបរមាចំនួន១០ដងក្នុងនោះ៣ដង នៅពេលមកទទួលសេវាពិនិត្យសុខភាពក្រោយពេលសម្រាលកូន និង៧ដងនៅពេលយកកូនមកទទួលថ្នាំបង្ការរហូតដល់អាយុ២ឆ្នាំ ។

៥- លក្ខខណ្ឌដើម្បីទទួលបានរបបគោលនយោបាយមានដូចជា ៖

• ស្រ្តីមានផ្ទៃពោះ ត្រូវមានប័ណ្ណសមធម៌ ឬប័ណ្ណអាទិភាព
• ស្ត្រីមានផ្ទៃពោះ បានពិនិត្យផ្ទៃពោះនៅមូលដ្ឋានសុខាភិបាលសាធារណៈយ៉ាងតិច១ដង ដោយមានភ្ជាប់មកជាមួយនូវសៀវភៅសុខភាពមាតា ដែលចេញដោយមូលដ្ឋានសុខាភិបាលសាធារណៈ
• កុមារដែលម្តាយ បានចុះឈ្មោះចូលក្នុងកម្មវិធីរួច កុមារនោះ ត្រូវបានចុះឈ្មោះជាស្វ័យប្រវត្តិ ដោយមានភ្ជាប់មកជាមួយនូវប័ណ្ណសុខភាពកុមារ
• កុមារដែលម្តាយ មិនបានចុះឈ្មោះក្នុងកម្មវិធី អាចចុះឈ្មោះបានលុះត្រាតែមានប័ណ្ណសុខភាពកុមារ និងប័ណ្ណសមធម៌របស់គ្រួសារកុមារ ។