សំណួរ-ចម្លើយ សេដ្ឋកិច្ច (ភាគ៤២)

សំណួរ

៣៦- តើកម្មវិធីផ្គត់ផ្គង់ទឹកជនបទ អាចចូលរួមចំណែកអ្វីខ្លះ ក្នុងការកាត់បន្ថយភាពក្រីក្រនៅកម្ពុជា ?

៣៧- តើសព្វថ្ងៃប្រជាពលរដ្ឋនៅជនបទកំពុងប្រើប្រាស់ទឹកដែលមានប្រភពពីអ្វីខ្លះ ? តើយើងអាចកែប្រែទឹកពីប្រភពទាំងនោះយ៉ាងដូចម្តេច ដើម្បីទទួលបានទឹកស្អាតសម្រាប់បរិភាគ ?

៣៨- តើផ្លូវជនបទបានចូលរួមចំណែកលើកកម្ពស់កម្រិតជីវភាពរស់នៅប្រចាំរបស់ប្រជាពលរដ្ឋយ៉ាងណាខ្លះ ?

៣៩- ដើម្បីឆ្លើយតបនឹងតម្រូវការរបស់ជនជាតិដើមភាគតិច តើរដ្ឋាភិបាលកម្ពុជាមានគោលនយោបាយដូចម្តេចខ្លះ ?

៤០- តើអនាម័យរបស់មនុស្សមានប៉ុន្មានយ៉ាង ?

ចម្លើយ

៣៦- កម្មវិធីផ្គត់ផ្គង់ទឹកជនបទអាចចូលរួមចំណែក ក្នុងការកាត់បន្ថយភាពក្រីក្រនៅកម្ពុជាមានដូចជា ៖

• កម្មវិធីផ្គត់ផ្គង់ទឹកជនបទ ចូលរួមចំណែកយ៉ាងសំខាន់ក្នុងការកាត់បន្ថយភាពក្រីក្ររបស់ប្រជាជន
• មានទឹកស្អាតប្រើប្រាស់ ប្រជាពលរដ្ឋមានសុខភាពល្អ មានអនាម័យក្នុងការរស់នៅដោយមានទឹកគ្រប់គ្រាន់ក្នុងការប្រើប្រាស់បង្គន់អនាម័យ
• ប្រជាពលរដ្ឋជៀសវាងបាននូវជម្ងឺឆ្លងគ្រប់ប្រភេទ ព្រមទាំងមិនខាតពេលវេលា និងប្រាក់កាសក្នុងការដើរទៅរកទិញថ្នាំសង្កូវយកមកព្យាបាលជម្ងឺ
• មានសុខភាពល្អ ប្រជាជនអាចរកចំណូលបង្កើនជីវភាពគ្រួសារបានច្រើន អាចរៀនសូត្រ និងពញ្ជូនកូនចៅឲ្យទៅរៀនសូត្របានខ្ពស់
• អាចបង្កើនពេលវេលាសម្រាប់ធ្វើផលិតកម្មផ្សេងៗ
• កម្មវិធីផ្គត់ផ្គង់ទឹកជនបទ អាចជួយឲ្យមានប្រភពទឹកស្អាតនៅជិតផ្ទះប្រជាជន ជាជាងចំណាយពេលច្រើនទៅរកប្រភពទឹកឆ្ងាយ ។

៣៧- សព្វថ្ងៃប្រជាពលរដ្ឋនៅជនបទកំពុងប្រើប្រាស់ទឹកដែលមានប្រភពពី ទន្លេ បឹង ស្រះ ត្រពាំង ទឹកភ្លៀង អណ្តូងជីកដោយដៃ ។ល។ តើយើងអាចកែប្រែទឹកពីប្រភពទាំងនោះឲ្យក្លាយជាទឹកស្អាតបាន​ ដោយយើងយកទឹកនោះមកដាំឲ្យពុះដើម្បីសម្លាប់មេរោគ ។ យើងអាចប្រើប្រាស់ធុងចម្រោះ ដើម្បីធ្វើទឹកទាំងនោះឲ្យស្អាត ។  យើងអាចប្រើអាងត្រងទឹកភ្លៀងដែលមានបច្ចេកទេសល្អ ។

៣៨- ផ្លូវជនបទបានចូលរួមចំណែកលើកកម្ពស់កម្រិតជីវភាពរស់នៅប្រចាំរបស់ប្រជាពលរដ្ឋដូចជា ៖

• ធ្វើដំណើរបានងាយស្រួល
• ភ្ជាប់ទំនាក់ទំនងប្រជាពលរដ្ឋបានគ្រប់ទីកន្លែងពីជនបទ ទៅទីក្រុង
• សង្រ្គោះអ្នកមានជម្ងឺ ទៅមន្ទីរពេទ្យបានទាន់ពេលវេលា
• សិស្សានុសិស្សទៅសាលារៀនបនទាន់ពេលវេលា
• ដឹកជញ្ជូនផលិតផលកសិកម្មទៅកាន់ទីផ្សារបានឆាប់រហ័ស
• ចំណេញពេលវេលាប្រចាំថ្ងៃ
• តម្លៃធ្វើដំណើរចុះថោក
• កាត់បន្ថយការខូ​ចខាតរថយន្យ ។ល។

៣៩- ដើម្បីឆ្លើយតបនឹងតម្រូវការរបស់ជនជាតិដើមភាគតិច រដ្ឋាភិបាលកម្ពុជាមានគោលនយោបាយទូទៅ ដោយលើកឡើងពីសិទ្ធិស្របច្បាប់របស់ជនជាតិដើមភាគតិច សិទ្ធិក្នុងការប្រើប្រាស់ធនធានធម្មជាតិ តាមលក្ខណៈប្រពៃណី និងការកសាងសមត្ថភាពជនជាតិភាគតិច ដើម្បីឲ្យពួកគាត់មានលទ្ធភាពឆ្លងផុតពីភាពមិនចេះអក្សរ មានចំណេះដឹង និងជំនាញគ្រប់គ្រាន់ក្នុងការលើកកម្ពស់ជីវភាព និងការជួយគាំទ្រពីគ្រប់ក្រសួងស្ថាប័នពាក់ព័ន្ធ និងអាជ្ញាធរមូលដ្ឋានគ្រប់លំដាប់ថ្នាក់ ។ ជាមួយគ្នានេះដែរ រាជរដ្ឋាភិបាលក៏មាន គោលនយោបាយតាមវិស័យ ដែលលើកឡើងពីការថែរក្សាវប្បធម៌ ប្រពៃណី ជំនឿ ទំនៀមទម្លាប់ និងភាសារបស់ជនជាតិដើមភាគតិច ការធ្វើស្រែចំការតាមលក្ខណៈប្រពៃណីរបស់ពួកគាត់ ការកាន់កាប់ដី និងប្រពៃណីជាលក្ខណៈសមូហភាព រួមទាំងការប្រើប្រាស់ដែរ ។ ការលើកកម្ពស់សុខមាលភាព ការកសាងសមត្ថភាព ការយល់ដឹងពីសិទ្ធិរបស់ខ្លួនតាមផ្លូវច្បាប់ ការចូលរួមក្នុងការកសាង និងថែរក្សាហេដ្ឋារចនាសម្ព័ន្ធជនបទ របស់ជនជាតិដើមភាគតិច ។ល។

៤០- អនាម័យរបស់មនុស្ស ២ យ៉ាងគឺ ៖

• អនាម័យផ្ទាល់ខ្លួន ៖ សម្អាតខ្លួនប្រាណ លាងដៃ ដុសធ្មេញ
• អនាម័យបរិស្ថាន ៖ បន្ទោបង់ក្នុងបង្គន់ សម្រាម ។

តភាគ