តើអភិបាលខេត្ត-ក្រុង ដែលជាអាជ្ញាធរដែនដីមានតួនាទី ភារកិច្ច សិទ្ធិអំណាច និងទទួលខុសត្រូវដែនដីយ៉ាងដូចម្តេច?

តាមគោលការណ៏ ច្បាប់ទឹកដីនៃព្រះរាជាណាចក្រកម្ពុជា ត្រូវកំណត់បែងចែកជាខេត្ត-ក្រុងដោយរដ្ឋធម្មនុញ្ញ នៃព្រះរាជាណាចក្រកម្ពុជា។ អភិបាលខេត្ត-ក្រុង ក្រោមការគ្រប់គ្រង និងដឹកនាំផ្ទាស់ពីរដ្ឋមន្រ្តីក្រសួងមហាផ្ទៃ ក្នុងការគ្រប់គ្រងដែនដី គ្រប់គ្រងមនុស្ស ទ្រព្យសម្បត្តិ សាធារណៈ ថែរក្សាសន្តិសុខសណ្តាប់ធ្នាប់សង្គម ជំរុញការអភិវឌ្ឍន៏លើគ្រប់វិស័យ ដើម្បីលើកតម្កើងជីវភាពរស់នៅរបស់ប្រជារាស្រ្ត។ អភិបាលខេត្ត-ក្រុងជាតំណាងនៃផលប្រយោជន៏ជាតិ ក្នុងដែនដីរបស់ខេត្ត-ក្រុង។

អភិបាលខេត្ត-ក្រុង ត្រូវទទួលខុសត្រូវនិងធានាការគ្រប់គ្រង និងដឹកនាំ វិស័យការងាររដ្ឋបាល និងនយោបាយរបស់រាជរដ្ឋាភិបាល ព្រមទាំងការងារសំខាន់ៗនៅក្នុងខេត្ត-ក្រុងរបស់ខ្លួនរួមមានៈ

• ប្រមូលពត៏មានទូទៅជូនរាជរដ្ឋាភិបាល និងក្រសួងមហាផ្ទៃ
• ផ្សព្វផ្សាយអនុវត្ត ជំរុញ និងតាមដានការអនុវត្តច្បាប់បទបញ្ញត្តិ និងសេចក្តីសម្រេចផ្សេងៗ។
• មានអំណាចបញ្ជាលើនគរបាលជាតិ
• មានអំណាចគ្រប់គ្រងលើមន្ត្រីរាជការតាមខ្សែបណ្តោយ និងតាមខ្សែទទឹង ដែលបំពេញការងារនៅតាមមន្ទីរនានាក្នុងខេត្ត-ក្រុង ស្របតាមមាត្រា២២ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា។
• មានអំណាចសម្របសម្រួល ជំរុញ និងត្រួតពិនិត្យលើមន្ត្រីរាជការ លើបណ្តាមន្ទីរជំនាញនានារបស់រដ្ឋ តាំងនៅក្នុងខេត្ត-ក្រុង លើកលែងតែការងារជំនាញឯកទេសរបស់តុលា និងអយ្យការអមតុលាការ ខេត្ត-ក្រុង អភិបាលខេត្ត-ក្រុង ពុំមានអំណាចត្រួតពិនិត្យទេស្របតាមមាត្រា១ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា។ ដោយឡែកវិស័យការងាររដ្ឋបាល និងនយោបាយ ត្រូវសិ្ថតនៅក្រោមការដឹកនាំរបស់អភិបាលខេត្ត-ក្រុង។ ដូច្នោះរបាយការណ៏ប្រចាំខែ ស្តីពីសកម្មភាពការងាររបស់តុលាការ និងអយ្យការអមតុលាការ ខេត្ត-ក្រុងដែលផ្ញើមកក្រសួងយុត្តិធម៏ជាខ្សែបណ្តោយត្រូវចម្លងជូនអភិបាលខេត្ត-ក្រុងដើម្បីជ្រាបជាពត៏មាន។