វិញ្ញាសា វប្បធម៌ទូទៅនៃមរតកខ្មែរ (វិញ្ញាសាទី៦)

សំណួរ

១. តើស្ពានច្បារអំពៅ ឬស្ពានព្រះមន្នីវង្ស ត្រូវបានស្ថាបនាសាងសង់ជាលើកដំបូងនៅឆ្នាំណា ?

២. តើស្ពានច្បារអំពៅ ឬស្ពានព្រះមន្នីវង្សថ្មី ត្រូវបានដាក់សម្ពោធឱ្យប្រើប្រាស់នៅថ្ងៃខែឆ្នាំណា ? ក្រោមអធិបតីភាពរបស់ថ្នាក់ដឹកនាំរូបណា ? ចូរបញ្ជាក់ពីសំណង់ស្ពាននេះ ។

៣. តើស្ពានព្រែកកា្តមត្រូវបានសម្ពោធឱ្យប្រើប្រាស់នៅថ្ងៃខែឆ្នាំណា ? ស្ពាននេះមានប្រវែងប៉ុន្មាន ? និងបញ្ជាក់ទីតាំងស្ពាន ។

៤. ដើម្បីជំនះរបាំងរូបទឹក តើប្រទេសកម្ពុជាបានស្ថាបនាស្ពានឆ្លងកាត់អ្វីខ្លះ ?

៥. ស្ពានកោះពស់ ដែលត្រូវបានប្រសិទ្ធនាមថា ជាស្ពានតេជោមកត ដែលតភ្ជាប់ពីដី គោកនៃខេត្តព្រះសីហនុទៅកាន់កោះពស់នៅក្នុងសមុទ្រជាលើកដំបូងនោះតើត្រូវបានសម្ពោធដាក់ឱ្យប្រើប្រាស់នៅថ្ងៃខែឆ្នាំណា ? ក្រោមអធិបតីភាពថ្នាក់ដឹកនាំរូបណា ? ចូររៀបរាប់បញ្ជក់ពីស្ពាននេះ ។

ចម្លើយ

១. ស្ពានច្បារអំពៅ ឬស្ពានព្រះមន្នីវង្សចាស់ត្រូវបានកសាងជាលើកដំបូងនៅឆ្នាំ ១៩២៩ នៅក្នុងសម័យអាណានិគមបារាំង ។

២. ស្ពានច្បារអំពៅ ឬស្ពានព្រះមន្នីវង្សថ្មីត្រូវបានសម្ពោធប្រកាសឱ្យប្រើប្រាស់នៅថ្ងៃ ពុធ ទី ២៧ ខែ ឧសភា ឆ្នាំ ២០០៩ ។ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គសេនាបតីតេជោ ហ៊ុន សែន ។

• ស្ពានព្រះមុនីវង្សថ្មីតម្លៃជាង ១០លានដុល្លារ ។ ការសាងសង់ស្ពានព្រះមុនីវង្សថ្មី និងស្ពានអាកាសនេះ គឺជាយុទ្ធសាស្រ្តបញ្ជៀសការកកស្ទះចរាចរនៅក្នុងតំបន់រង្វង់មូល ក្បាលថ្នល់ដែលជាច្រកចេញចូលពីទីក្រុងភ្នំពេញទៅផ្លូវជាតិលេខមួយ និងទៅផ្លូវជាតិលេខ២ ។
• ស្ពានព្រះមុនីវង្សថ្មីត្រូវបានផ្តើម សាងសង់ កាលពីខែមករាឆ្នាំ ២០០៦ ក្នុងគម្លាត ៣០ម៉ែត្រពីស្ពានព្រះមុនីវង្សចាស់ ។
• ស្ពានព្រះមុនីវង្សថ្មីនេះមានប្រវែង ២៧០ម៉ែត្រទទឹង ១៤ម៉ែត្រ ។

៣. ស្ពានព្រែកក្តាមត្រូវបានសម្ពោធឱ្យប្រើប្រាស់ជាផ្លូវការ នៅព្រឹកថ្ងៃទី ៣១ ខែឧសភា ឆ្នាំ ២០១០ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ។ ស្ពាននេះមានប្រវែងបណ្តោយ ៩៨១ ម៉ែត្រ ទទឹង ១៣,៥០ម៉ែត្រនិងកម្ពស់ខ្ពស់បំផុត ១០ ម៉ែត្រ ហើយមានចម្ងាយប្រហែលជា ៣៥ គីឡូម៉ែត្រ ខាងជើងរាជធានីភ្នំពេញដែលចំណាយអស់ទឹកប្រាក់ជាង ២៨.៨លានដុល្លារអាមេរិក ។ស្ពានព្រែកក្តាមមានទីតាំងស្ថិតនៅត្រើយខាងលិចក្នុងភូមិទូលងោក ឃុំ កំពង់ហ្លួង ស្រុកពញាឮ ខេត្តកណ្តាល និងនៅត្រើយខាងកើតភូមិ ព្រែកក្តាម ឃុំកោះចិន ស្រុកពញាឮ ខេត្ត

៤. នៅពេលប្រទេសកម្ពុជាយើង ដើម្បីជំនះឧបសគ្គរបាំងរូបដែលពាក់ព័ន្ធនឹងទឹក យើងក៏បានស្ថាបនាស្ពានធ្វើពីឈើ ដែក បេតុងតូចធំជាច្រើនដូចជា ស្ពានឆ្លងកាត់តំបន់មួយចំនួនដូចជា ៖

• តាមដងទន្លេសាប មានស្ពានព្រែកព្នៅ ស្ពានព្រែកក្តាម ស្ពានជ្រោយចង្វា និងស្ពានជ្រោយចង្វាទី២ ឬស្ពានមិត្តភាពកម្ពុជាចិន (កំពុងសាងសង់) ។
• តាមដងទន្លេមេគង្គ មានស្ពានគីសូណា (ទន្លេបិទក្នុងខេត្តកំពង់ចាម)ស្ពានព្រែកតាមាក់ ។
• តាមដងទន្លេកុង មានស្ពានសេកុង ស្ថិតនៅខេត្តស្ទឹងត្រែង
• តាមដងដៃសមុទ្រ មានស្ពានស្រែអំបិល ត្រពាំងរូង អណ្តូងទឹក តាកៃ និងស្ពានកោះកុង ។ ក្រៅពីស្ថាបនាស្ពានគេក៏បានស្ថាបនាកប៉ាល់ កាណូត នាវាតូចធំ (នាវាទេសចរណ៍ នាវាដឹកនាំនិញ..) ។

៥. នៅថ្ងៃអង្គារទី ១២ ខែកក្កដា ២០១១ នេះ លោកនាយករដ្ឋមន្រ្តី ហ៊ុន សែន បានធ្វើដំណើរទៅសម្ពោធស្ពានក្នុងគម្រោងអភិវឌ្ឍន៍កោះពស់ ដើម្បីបើកឱ្យប្រើប្រាស់ជាផ្លូវការ ។ លោកនាយករដ្ឋមន្រ្តី ហ៊ុន សែន និងលោកជំទាវគត្តិព្រឹទ្ធបណ្ឌិត ប៊ុនរ៉ានី ហ៊ុន សែន មើលប្លង់រូបគំរូ អភិវឌ្ឍន៍កោះពស់ នៅខេត្តព្រះសីហនុ ។ ស្ពានឈ្មោះថា តេជោមរកត ឬស្ពានកោះពស់ ដែលជាហេដ្ឋារចនាសម្ព័ន្ធមូលដ្ឋានគ្រឹះនៃការអភិវឌ្ឍកោះពស់ឱ្យ ក្លាយជារមណីដ្ឋានលំដាប់ពិភពលោក ដែលចំណាយថវិកាសាងសង់ប្រមាណ ២០លានអឺរ៉ូ ឬស្មើនឹងជាង ៣០លានដុល្លារ របស់ក្រុមហ៊ុនវិនិយោគកម្ពុជាកោះពស់ (Cambodia lnvestment Group Limiteg) ត្រូវបានបើកឱ្យដំណើរការហើយ នៅថ្ងៃទី ១២ ខែកក្កដា ឆ្នាំ ២០១១ ។

• ស្ពាននេះស្ថិតនៅក្នុងសង្កាត់លេខ ៣ ក្រុងព្រះសីហនុ មានបណ្តោយ ៩០០ម៉ែត្រ និងទទឹង ១២ម៉ែត្រ មានកម្ពស់ ៣២ម៉ែត្រ កន្លះពីផ្ទៃទឹកសមុទ្រ ដែលតភ្ជាប់កោះពស់ទៅនឹងដីគោក ។
• ដំណើរការសាងសង់ស្ពាននេះមានរយៈពេល ៣០ខែ គិតចាប់ពីខែមករា ឆ្នាំ ២០០៨ ដល់ខែមីនា ឆ្នាំ ២០១០
• សាងសង់ដោយក្រុមហ៊ុនសាជីវកម្មសំណង់រដ្ឋស៊ីណូហ៊ីដ្រូ នៃសាធារណរដ្ឋប្រជាមានិតចិន
• ត្រួតពិនិត្យប្លង់ដោយក្រសួងសាធារណការ និងដឹកជញ្ជូន និងត្រួតពិនិត្យបច្ចេកទេសសាងសង់ដោយវិស្វករជនជាតិរុស្សីរបស់ក្រុមហ៊ុនកោះពស់ ។
• ស្ពាននេះមាន តួនាទីយ៉ាងសំខាន់ក្នុងការបង្កភាពងាយស្រួលដល់ការតភ្ជាប់ចរាចរណ៍ ដឹកជញ្ជូន ទំនាក់ទំនងពីតំបន់ដីគោកនៃខេត្តព្រះសីហនុ និងពីតំបន់ដទៃទៅកាន់កោះពស់ ដើម្បីគោលដៅដំបូង គឺអភិវឌ្ឍកោះពស់ឱ្យក្លាយជាមជ្ឈមណ្ឌលទេសចរណ៍លំដាប់ពិភពលោក ។ ជួយបង្កលក្ខណៈឱ្យកំពង់ផែស្វយ័តក្រុងព្រះសីហនុ ពង្រីកសេវាកម្មផ្នែកនាវាចរណ៍បន្ថែមលើសេវាកម្មលើកដាក់ទំនិញថែមទៀត និងសម្រាប់បង្កើនចំណូលថវិការដ្ឋផងដែរ ។