វិញ្ញាសា វប្បធម៌ទូទៅនៃមរតកខ្មែរ (វិញ្ញាសាទី២៦)

សំណួរ

១. ព្រះសម្មាសម្ពុទ្ធទ្រង់បានទូន្មានថា មនុស្សគ្រប់រូបគប្បីចិញ្ចឹមជីវិតឱ្យបានត្រឹមត្រូវមានអាជីពត្រឹមត្រូវ ឬមុខរបរសុចរិត ហើយវៀរចាកការចិញ្ចឹមជីវិតខុស មានជំនួញទាំង៥ប្រការ តើជំនួញនោះមានអ្វីខ្លះ

២. បន្ទាប់ពីការដាក់ប្រាសាទព្រះវិហារចូលជាសម្បត្តិបេតិកភណ្ឌពិភពលោកមក តើកម្ពុជានឹងដាក់ប្រាសាទអ្វីចូលជាបន្តទៀត ? តើប្រាសាទនោះមានទីតាំងស្ថិតនៅត្រង់ណា ? ចូរបញ្ជាក់ ។

៣. តើអាគាររដ្ឋសភាថ្មីត្រូវបានសម្ពោធឱ្យប្រើប្រាស់នៅថ្ងៃខែឆ្នាំណា ?

៤. តើភោគទ្រព្យទេសចរណ៍នៅកម្ពុជាមានអ្វីខ្លះ ? ចូររៀបរាប់ ។

ចម្លើយ

១. ព្រះសម្មាសម្ពុទ្ធទ្រង់បានទូន្មានថា មនុស្សគ្រប់រូបគប្បីចិញ្ចឹមជីវិតឱ្យបានត្រឹមត្រូវ មានអាជីពត្រឹមត្រូវ ឬមុនរបរសុចរិត ហើយវៀរចាកការចិញ្ចឹមជីវិតខុស មានជំនួញទាំង ៥ប្រការ ជំនួញទាំងនោះគឺ ៖

• ជំនួញសាស្រ្តវុធ
• ជំនួញមនុស្ស
• ជំនួញសត្វដែលគេពិឃាតយកសាច់
• ជំនួញទឹកស្រវឹង
• ជំនួញថ្នាំពុល ។ ការចិញ្ចឹមជីវិតដោយបរិសុទ្ធប្រកបដោយសីលគឺអាជីពកម្មត្រឹមត្រូវដែលមិនឱ្យអ្នកដទៃក្តៅក្រហាយដោយសារមុខរបររបស់ខ្លួន ឈ្មោះថាមុខរបរសុចរិត ។

២. បន្ទាប់ពីការដាក់ប្រាសាទព្រះវិហារចូលជាសម្បត្តិបេតិកភណ្ឌពិភពលោកមក កម្ពុជានឹងត្រៀមដាក់ប្រាសាទ “សំបូរព្រៃគុក” ចូលជាបន្តទៀត ។ ប្រាសាទនោះមានទីតាំងស្ថិតនៅក្នុងភូមិ សំបូរ ឃុំសំបូរ ស្រុក ប្រាសាទសំបូរ ដែលមានចម្ងាយ ៣៥គីឡូម៉ែត្រ ពីទីរួមខេត្ត កំពង់ធំ តាមផ្លូវជាតិលេខ ៦៤ បត់ស្តាំតាមផ្លូវកូនត្នោត ។

៣. អាគាររដ្ឋសភាថ្មីត្រូវបានសម្ពោធនៅថ្ងៃ សៅរ៍ ទី៧ ខែ កក្កដា ឆ្នាំ ២០០៧ ក្រោមអធិបតីភាពព្រះករុណា ព្រះបាទនរោត្តម មុនីនាថ សីហមុនី ។

៤. ភោគទ្រព្យទេសចរណ៍នៅកម្ពុជាមាន ៖

• ភោគទ្រព្យទេសចរណ៍ធម្មជាតិ ៖ មានព្រៃឈើ សត្វព្រៃភ្នំជ្រលងភ្នំ ទឹកជ្រោះ ទឹកផុស ទឹកពុះ (តេទឹកពុះ នៅខេត្តកំពង់ស្តឺ) ដងទន្លេសាប ទន្លេមេគង្គ ...។
• ភោគទ្រព្យទេសចរណ៍ប្រវត្តិសាស្រ្តនិងវប្បធម៌ ៖ មណ្ឌលអង្គរ មានប្រាសាទអង្គរវត្ត អង្គរធំ និងប្រាសាទដទៃទៀត ជាតំបន់ទាក់ទាញទេសចរណ៍យ៉ាងសំខាន់ជាងគេនៅកម្ពុជា ។ ប្រាសាទទាំងនេះកំពុងទទួលការថែរក្សាជួសជុលក្រោមកិច្ចសហកាជាមួយអាជ្ញាធរខេត្ត អាជ្ញាធរអប្សរា និងអង្គការយូនីស្កូ ។ សារមន្ទីរជាតិ គុកទួលស្លែងនិងជើងឯក តំបន់អន្លង់វែងក៏ជាតំបន់ទេសចរណ៍ប្រវត្តិសាស្រ្តនិងវប្បធម៌នៃប្រទេសកម្ពុជាផងដែរ ។