សំណួរ
១. តើអាស៊ានមានបាវចនាដូចម្តេច ?
២. ដើម្បីដោះស្រាយទំនាស់ តើសហគមន៍អាស៊ានប្រកាន់យកគោលការណ៍អ្វីខ្លះ ?
៣. ដើម្បីចូលជាសមាជិកអាស៊ាន តើប្រទេសនីមួយៗត្រូវគោរពលក្ខខណ្ឌអ្វីខ្លះ ?
៤. ដើម្បីក្លាយជាសមាជិកពេញសិទ្ធិរបស់សមាគមអាស៊ានតើប្រទេសនីមួយៗត្រូវឆ្លងកាត់ប៉ុន្មានដំណាក់កាល ?
៥. តើប្រទេសដែលសមាជិកអាស៊ានមានភារកិច្ចចំពោះមុខអ្វីខ្លះ ?
ចម្លើយ
១. បាវចនាអាស៊ានគឺចក្ខុវិស័យមួយ អត្តសញ្ញាណមួយ សហគមន៍មួយ ។
២. ប្រទេសដែលជាសមាជិកអាស៊ាន ត្រូវមានកិច្ចសហប្រតិបត្តិការមិត្តភាពដូចខាងក្រោម ៖
- ប្រើប្រាស់វេទិកាមួយសម្រាប់ដោះស្រាយការខ្វែងយោបល់គ្នាក្នុងរង្វង់តំបន់ ។
- គោរពគ្នាទៅវិញទៅមកនូវឯករាជ្យ អធិបតេយ្យ ភាពសមភាពបូរណភាពដែនដី និងអត្តសញ្ញាណជាតិរបស់សមាជិកទាំងអស់ ។
- គោរពសិទ្ធិរបស់រដ្ឋនីមួយៗក្នុងការរស់នៅឱ្យរួចផុតពីការជ្រៀតជ្រែកនិងមិនធ្វើវិច្ឆេទកម្ម ឬការបង្ខិតបង្ខំពីខាងក្រៅ ។
- ដោះស្រាយទំនាស់ ឬជម្លោះដោយសន្តិវិធី ។
- បោះបង់ចោលរាល់ការគំរាមកំហែង ឬការប្រើកម្លាំង ។
- សហការគ្នាល្អរវាងសមាជិកទាំងអស់លើផ្នែកនយោបាយសន្តិសុខ សេដ្ឋកិច្ច វប្បធម៌ សង្គម បរិស្ថាន ។ ល ។
៣ . លក្ខខណ្ឌសម្រាប់សមាជិកភាពក្នុងសមាគមអាស៊ានគឺ ៖
- ប្រទេសនោះត្រូវស្ថិតនៅក្នុងតំបន់អាស៊ីអាគ្នេយ៍
- ជារដ្ឋអធិបតេយ្យភាពពិតប្រាកដហើយត្រូវផ្តល់សច្ចាប័នដោយអង្គការនីតិប្បញ្ញតិ
- ត្រូវមានស្ថានទូតនៅគ្រប់បណ្តាប្រទេសសមាជិកសមាគមអាស៊ាន
- ទទួលស្គាល់ យល់ព្រមចុះហត្ថលេខា និងគោរពតាមរាល់សន្ធិសញ្ញា កិច្ចព្រមព្រៀង និងអនុស្សារណៈដែលមានកន្លែងមកនិងដៅអនាគត
- ត្រូវបង់វិភាគទាន ៖
- ១លានដុល្លារសម្រាប់មូលនិធិអាស៊ានតែមួយដងប៉ុណ្ណោះ
- ៥ ម៉ឺនដុល្លារសម្រាប់មូលនីធិវិទ្យាសាស្រ្តអាស៊ានតែមួយដង
- ៦០ ម៉ឺនដុល្លារសម្រាប់ចំណាយប្រចាំថ្ងៃឆ្នាំ និងដំណើរការលេខាធិការអាស៊ាន ។
- ចូលរួមរាល់កិច្ចប្រជុំអាស៊ានដែលមានជិត ៣០០ដងក្នុងមួយឆ្នាំ
- សម្រួលទិដ្ឋាការចេញចូលដោយមិនបាច់ធ្វើពាក្យសុំសម្រាប់រយៈពេលពីរសប្តាហ៍រហូតដល់ពីរខែ ។
៤. ដើម្បីក្លាយជាសមាជិកអាស៊ានត្រូវឆ្លងកាត់បីដំណាក់កាល គឺ
- ឋានៈជាភ្ញៀវពិសេស
- ឋានៈជាអ្នកសង្កេតការណ៍
- ការក្លាយជាសមាជិកផ្លូវការ ។
៥. ភារកិច្ចចំពោះមុខរបស់សមាជិកអាស៊ាន គឺ
- អភិវឌ្ឍន៍សេដ្ឋសេរី និងប្រឹងប្រែងជំរុញល្បឿននៃដំណើរកំណែទម្រង់ និងទំនើបកម្មសម្រាប់លើកស្ទួយវឌ្ឍនភាពសេដ្ឋកិច្ច ។
- ទំនាក់ទំនងល្អរវាងប្រទេសអាស៊ាន និងមហាអំណាចសេដ្ឋកិច្ចពិភពលោក ដូចជាជប៉ុន សហរដ្ឋអាមេរិក សហគមន៍អឺរ៉ុប និងអូស្រ្តាលីជាដើម ។
- លើកទឹកចិត្តប្រទេសអ្នកមានឱ្យជួយប្រទេសក្រីក្រ ។
