សំណួរ-ចម្លើយ នីតិវិធីនៃការអនុវត្តហ៊ីប៉ូតែក (ភាគ២)

សំណួរ

៦- តើសារការីនិងមេធាវីខុសគ្នាយ៉ាងដូចម្តេច ?

៧- តើប្រភេទលិខិតសារការីក្នុងការបង្កើតហ៊ីប៉ូតែកមានអ្វីខ្លះ ?

៨- តើអត្ថន័យនៃហ៊ីប៉ូតែកមានអ្វីខ្លះ ?

៩- តើការបង្កើតហ៊ីប៉ូតែកដោយរបៀបណា ?

១០- តើការបង្កើតហ៊ីប៉ូតែកលើសិទ្ធិជួលអចិន្រ្តៃយ៍ មានសារៈប្រយោជន៍អ្វីខ្លះដល់ម្ចាស់បំណុលហ៊ីប៉ូតែក និង អ្នកបង្កើតហ៊ីប៉ូតែក?​

ចម្លើយ

៦- ភាពខុសគ្នារវាងសារការីនិងមេធាវីគឺ ៖

+ សារការី (Notary)

• ជាអ្នកវិជ្ជាជីវៈសេរី និងជាមន្ត្រីសាធារណៈ
• កិច្ចសន្យាដែលធ្វើដោយសារការី គឺជាលិខិតយថាភូតដែលមានតម្លៃស្មើនឹងសាលក្រមស្ថាពរ ។ បើកូនបំណុលមិនអនុវត្តកាតព្វកិច្ចម្ចាស់បំណុលអាចអនុវត្តដោយបង្ខំ ដោយមិនចាំបាច់ឆ្លងកាត់នីតិវិធីតុលាការនោះទេ ។
• តាក់តែងលិខិតមតកសាសន៍ (លិខិតបណ្តាំ)
• មិនអាចតំណាងដោយអាណត្តិ ឬការពារក្តីនៅតុលាការ

+ មេធាវី (Lawyer)

• ជាអ្ន​កវិជ្ជាជីវៈសេរី
• កិច្ចសន្យាដែលធ្វើដោយមេធាវី គឺជាលិខិតឯកជន មិនមានតម្លៃស្មើនឹងសាលក្រមស្ថាពរទេ ។ បើកូនបំណុលមិនអនុវត្តកាតព្វកិច្ចម្ចាស់បំណុលមិនអាចយកទៅអនុវត្តដោយបង្ខំបានទេ គឺត្រូវតែឆ្លងកាត់នីតិវិធីតុលាការដើម្បីសម្រេចសេចក្តី ។
• មិនអាចតាក់តែងមតកសាសន៍ (លិខិតបណ្តាំ)
• ជាអ្នកតំណាងដោយអាណត្តិ និងការពារក្តីនៅតុលាការ

៧- ប្រភេទលិខិតសារការីក្នុងការបង្កើតហ៊ីប៉ូតែកអាចមានដូចជា ៖

• កិច្ចសន្យាខ្ចីបរិភោគ និងបង្កើតហ៊ីប៉ូតែកដោយលិខិតយថាភូតរបស់សារការី

- សារការីទទួលរៀបចំតាក់តែង និងបញ្ជាក់លើលិខិត

- កិច្ចសន្យានេះ ជាកិច្ចសន្យាដោយលិខិតយថាភូតរបស់សារការី

• កិច្ចសន្យាខ្ចីបរិភោគ និងបង្កើតហ៊ីប៉ូតែកដោយលិខិតបញ្ជាក់របស់សារការី

- សារការីគ្រាន់តែផ្ទៀងផ្ទាត់ និងបញ្ជាក់ហត្ថលេខា ឬ/និង ស្នាមម្រាមដៃគូភាគី

- កិច្ចសន្យាខ្លួនវានៅតែជាលិខិតឯកជនដដែល ។

៨- អត្ថន័យនៃហ៊ីប៉ូតែកមានដូចជា ៖

• ម្ចាស់បំណុលហ៊ីប៉ូតែកមានសិទ្ធិទទួលការសងចំពោះសិទ្ធិលើបំណុលរបស់ខ្លួន ដោយមានអាទិភាពជាងម្ចាស់បំណុលផ្សេងទៀត ចំពោះអចលនវត្ថុដែលបានដាក់ជាប្រាតិភោគនៃកាតព្វកិច្ចដោយកូនបំណុល ឬតតិយជនមិនផ្ទេរការកាន់កាប់ ។
• សិទ្ធិជួលអចិន្ត្រៃយ៍ និងផលុបភោគ ក៏អាចយកមកធ្វើជាកម្មវត្ថុនៃហ៊ីប៉ូតែកបានដែរ។ ក្នុងករណីនេះ បញ្ញត្តិនៃ (ហ៊ីប៉ូតែក) នេះត្រូវយកមកអនុវត្តដូចគ្នាផងដែរ ។
• ក្នុងករណីដែលច្បាប់ពិសេសទទួលស្គាល់ការយកទ្រព្យសម្បត្តិផ្សេងក្រៅពីអចលនវត្ថុ មកធ្វើជាកម្មវត្ថុនៃហ៊ីប៉ូតែក បញ្ញត្តិនៃច្បាប់ ពិសេសនោះត្រូវយកមកអនុវត្ត ។

៩- ហ៊ីប៉ូតែកនឹងត្រូវបានបង្កើតឡើង ដោយការព្រមព្រៀងគ្នារវាងម្ចាស់បំណុល និងកូនបំណុល ឬតតិយជនដែលយកអចលនវត្ថុរបស់ខ្លួនមកដាក់ជាប្រាតិភោគ ។

១០- ការបង្កើតហ៊ីប៉ូតែកលើសិទ្ធិជួលអចិន្រ្តៃយ៍ មានសារៈប្រយោជន៍ដូចជា ៖

+ ចំពោះម្ចាស់បំណុលហ៊ីប៉ូតែក

• គ្មានបន្ទុកក្នុងការគ្រប់គ្រងសិទ្ធិជួលអចិន្រ្តៃយ៍ វាមាន័យថា គ្មានការផ្ទេរនូវសិទ្ធិជួលអចិន្ត្រៃយ៍
• មានសិទ្ធិទទួលសំណងជាអាទិភាព វាមានន័យថាម្ចាស់បំណុលអាចប្តឹងទៅតុលាការដើម្បីលក់ដោយបង្ខំនូវវត្ថុដែលជាកម្មវត្ថុ ហើយទទួលនូវការចែកចំណែកពីថ្លៃលក់នោះបាន ។

+ ចំពោះអ្នកបង្កើតហ៊ីប៉ូតែក

• អាចបន្តនូវការកាន់កាប់ ប្រើប្រាស់ និងអាស្រ័យផលនូវសិទ្ធិជួលអចិន្ត្រៃយ៍នោះ ហើយអាចបង្កើតចំណូលដើម្បីសងបំណុល
• អាចបង្កើតហ៊ីប៉ូតែកច្រើន លើសិទ្ធិជួលអចិន្ត្រៃយ៍បាន។ ករណីនេះលំដាប់អាទិភាព គឺលំដាប់នៃការចុះបញ្ជី (មាត្រា​៨៥១ នៃក្រមរដ្ឋប្បវេណី) ។

តភាគ