សំណួរ-ចម្លើយ សេដ្ឋកិច្ច (ភាគ៧)

សំណួរ

៣១- ដូចម្តេចហៅថាស្វ័យភាពហិរញ្ញវត្ថុ ?

៣២- តើកត្តាសំខាន់អ្វីខ្លះដែលជាប្រភពនៃកំណើនសេដ្ឋកិច្ច ?

៣៣- តើការវិនិយោគមានសារៈសំខាន់អ្វីខ្លះចំពោះការអភិវឌ្ឍសេដ្ឋកិច្ចនៅកម្ពុជា ?

៣៤- តើគោលនយោបាយពន្ធគឺជាអ្វី ?

៣៥- ដូចម្តេចហៅថាគោលនយោបាយសារពើពន្ធ ?

ចម្លើយ

៣១- ស្វ័យភាពហិរញ្ញវត្ថុ (Financial Autonomy) គឺជាការគ្រប់គ្រងចាត់ចែងកិច្ចការហិរញ្ញវត្ថុ និងអាចទ្រទ្រង់ចំណូលចំណាយផ្នែកហិរញ្ញវត្ថុដោយខ្លួនឯង ដោយមិនពឹងពាក់ជំនួយពីអ្នកដ៏ទៃ ។

៣២- កត្តាដែលជាប្រភទនៃកំណើនសេដ្ឋកិច្ចមានដូចខាងក្រោម ៖

• ធនធានធម្មជាតិ (Natural resource)
• ការវិនិយោគនៅក្នុងមូលធនរូបវ័ន្ដ ( Investment in physical capital)
• ចំនួនប្រជាជនច្រើន (Large population)
• ការវិនិយោគក្នុងធនធានមនុស្ស (Investment in human capital)
• បច្ចេកវិទ្យា (Technology)
• ក្របខ័ណ្ឌស្ថាប័ន ( Institutional framework) ។

៣៣- ការវិនិយោគមានសារៈសំខាន់ចំពោះការអភិវឌ្ឍសេដ្ឋកិច្ចនៅកម្ពុជាដូចជា ៖

ក. បង្កើតឱ្យមានការងារធ្វើ

ខ. ការប្រើប្រាស់លើទំនិញនិងសេវាកើនឡើង

គ.​ ចំណូលពន្ធកើនឡើង

ឃ. សេដ្ឋកិច្ចកើនឡើង ។

៣៤- គោលនយោបាយពន្ធ គឺជាឧបករណ៍រដ្ឋបាល ដែលត្រូវបានគេបង្កើតឡើង ដើម្បីយកពន្ធនិងប្រមូលពន្ធ តាមរយៈការអនុវត្តពន្ធផ្សេងៗគ្នា និងពន្ធមូលដ្ឋាន សម្រាប់អនុវត្តគោលនយោបាយដែលបានបង្កើតឡើង ។

៣៥- គោលនយោបាយសារពើពន្ធ សំដៅលើការយកពន្ធនិងវិធីរកចំណូលផ្សេងៗទៀត និងចំណាយរបស់រដ្ឋ ដោយបែងចែកធនធានសេដ្ឋកិច្ចក្នុងគោលបំណងជំរុញឲ្យមានកំណើនសេដ្ឋកិច្ចប្រកបដោយចីរភាពនិងសមធម៌ ។ ដើម្បីលើកកម្ពស់ប្រសិទ្ធភាពគោលនយោបាយសារពើពន្ធរដ្ឋត្រូវអនុវត្តសកម្មភាពសំខាន់ៗដូចជា ៖

• ប្រសិទ្ធភាពនៃការគ្រប់គ្រង និងគៀងគរចំណូល
• ការធ្វើវិចារណៈកម្មចំណាយ គឺបែងចែកចំណាយថវិការដ្ឋរវាងការប្រើប្រាស់ និងការវិនិយោគសាធារណៈឲ្យបានសមស្រប ។ គោលនយោបាយសារពើពន្ធរបស់ប្រទេសនីមួយៗ គួរតែមានគោលដៅជាគោលការណ៍ចំនួនបួនគឺ ៖ (១) ការបែងចែកធនធាន (២)ស្ថេរភាពវូបនីយកម្ម (៣)កំណើន (៤) ការបែងចែកនៃប្រាក់ចំណូលនៃទ្រព្យសម្បត្តិឲ្យស្មើគ្នា ។ តាមរយៈពន្ធ និងចំណាយសាធារណៈរដ្ឋាភិបាលដើរតួនាទីសំខាន់ក្នុងការបែងចែក បណ្តាធនធាននៅក្នុងសេដ្ឋកិច្ច និងជំរុញខ្សែសង្វាក់ផលិតកម្មឲ្យកើនឬមិនកើនឡើង ។

តភាគ