សំណួរ-ចម្លើយ ក្រមរដ្ឋប្បវេណី និងក្រមនីតិវិធីរដ្ឋប្បវេណី (ភាគ២៤)

សំណួរ

១១៦- តើការផ្ទេរការកាន់កាប់ដោយបញ្ជាគឺជាអ្វី ?

១១៧- តើអ្វីទៅជាការសន្មត និងការសន្មតកើតមាននៅពេលណាបើយោងតាមមាត្រា២៣៤ នៃក្រមរដ្ឋប្បវេណី ?

១១៨- តើអ្វីទៅហៅថាការបន្តការកាន់កាប់ ?

១១៩- តើអ្វីទៅហៅថាសិទ្ធិប្រាតិភោគប្រត្យក្ស ?

១២០- តើអ្វីទៅហៅថាការ​បង្ហាញឆន្ទៈ ?

ចម្លើយ

១១៦- ការផ្ទេរការកាន់កាប់ដោយបញ្ជា គឺសំដៅទៅលើករណីដែលអ្នកកាន់កាប់ដោយប្រយោលបានបង្កើតនូវទំនាក់ទំនងគតិយុត្តតាមការព្រមព្រៀងថាផ្ទេរការកាន់កាប់ទៅឲ្យតតិយជន និងមានករណីយកិច្ចត្រូវជូនដំណឹងអំពីហេតុនោះទៅឲ្យអ្នកកាន់កាប់ដោយចំពោះ (មាត្រា២២៩ កថាខណ្ឌទី៤) ។

១១៧- ការសន្មត សំដៅដល់ការសន្មតអំពីអត្ថិភាពនៃលក្ខខណ្ឌចំពោះការទទួលស្គាល់អាជ្ញាយុកាលនៃលទ្ធកម្មអំឡុងពេលខ្លីចំពោះការកាន់កាប់ដោយមានឆន្ទៈយកជាកម្មសិទ្ធិ ដោយសន្តិវិធី និងដឹងលឺជាសាធារណៈ ដោយសុចរិត និងគ្មានកំហុស (មាត្រា២៣៤ កថាខណ្ឌទី១​ និងមាត្រា២៣៤ កថាខណ្ឌទី២) ។

១១៨- ការបន្តរការកាន់កាប់ គឺអ្នកកាន់កាប់បន្តរអាចអះអាងចំពោះការកាន់កាប់របស់ខ្លួន និងការកាន់កាប់របស់អ្នកមុនបាន ។ ប៉ុន្តែករណីដែលអ្នកកាន់កាប់បានទទួលបន្តរនូវវិការៈនៃការកាន់កាប់របស់អ្នកមុន ទោះបីជាការកា​ន់កាប់របស់ខ្លួនគ្មានវិការៈក៏ដោយ គឺរាប់បញ្ជូលថាជាការកាន់កាប់ដោយមានវិការៈ (មាត្រា២៣៥) ។

១១៩- សិទ្ធិប្រាតិភោគប្រត្យក្ស គឺជាសិទ្ធិក្តាប់ទុកនូវតម្លៃនៃវត្ថុដែលជាកម្មសិទ្ធិរបស់កូនបំណុល ឬតតិយជន ដើម្បីធានាសិទ្ធិលើបំណុល ។

១២០- ការ​បង្ហាញឆន្ទៈ គឺជាការបង្ហាញឆន្ទៈរបស់ភាគី ក្នុងគោលបំណងបង្កើតនូវអានុភាពគតិយុត្ត ។ ជាគោលការណ៍ការបង្ហាញឆន្ទៈត្រូវតែធ្វើឡើងដោយសេរី និងពិតប្រាកដ ។

តភាគ