សំណួរ-ចម្លើយ ពន្ធប៉ាតង់ (ភាគ១)

សំណួរ

១- តើពន្ធប៉ាតង់ជាអ្វី ?

២- តើមូលដ្ឋានគិតពន្ធប៉ាតង់ជាអ្វី ?

៣- តើពន្ធប៉ាតង់ត្រូវគណនាយ៉ាងដូចម្តេច ?

៤- តើពន្ធប៉ាតង់ត្រូវបង់នៅពេលណា ?

៥- តើត្រូវបង់ពន្ធប៉ាតង់នៅទីកន្លែងណា ?

ចម្លើយ

១- ពន្ធប៉ាតង់ ជាពន្ធកំណត់លើផលរបរសរុបប្រចាំឆ្នាំ ដែលត្រូវបង់ក្នុងអំឡុងពេលចាប់ពីថ្ងៃទី០១ ខែមករា ដល់ថ្ងៃទី៣១ ខែមីនាជារៀងរាល់ឆ្នាំ ។ សម្រាប់សហគ្រាស/ក្រុមហ៊ុន ដែលទើបចាប់ផ្តើមប្រកបអាជីវកម្មត្រូវបង់ពន្ធប៉ាតង់ពេញមួយឆ្នាំ ប្រសិនបើចាប់ផ្តើមប្រកបអាជីវកម្មក្នុងរយៈពេល៦ខែដើមឆ្នាំ ឬបង់ពន្ធប៉ាតង់ពាក់កណ្តាលឆ្នាំ ប្រសិនបើចាប់ផ្តើមប្រកបអាជីវកម្មក្នុងរយៈពេល៦ខែចុងឆ្នាំ ។ សហគ្រាស/ក្រុមហ៊ុនដែលមានសាខា-ឃ្លាំង-រោងចក្រ-រោងជាង សម្រាប់មុខរបរអាជីវកម្មតែមួយ នៅក្នុងខេត្ត/ក្រុងតែមួយ មិនចាំបាច់បង់ពន្ធប៉ាតង់ផ្សេងគ្នាទេ ប៉ុន្តែបើមានមុខរបរអាជីវកម្មខុសៗគ្នា ឬស្ថិតនៅក្នុងខេត្ត/ក្រុងផ្សេងគ្នា ត្រូវបង់ពន្ធប៉ាតង់ទៅតាមមុខរបរនីមួយៗ និងទៅតាមខេត្ត/ក្រុងដោយឡែកៗពីគ្នា ។

២- មូលដ្ឋានគិតពន្ធប៉ាតង់ត្រូវបានកំណត់ដូ​ចខាងក្រោម ៖

• សហគ្រាសជាអ្នកជាប់ពន្ធតាមរបបម៉ៅការ ពន្ធប៉ាតង់ត្រូវបានកំណត់លើផលរបរប៉ាន់ស្មានសរុបក្នុងឆ្នាំចំពោះអ្នកជាប់ពន្ធ ដែលទើបប្រកបអាជីវកម្មថ្មី និងកំណត់លើផលរបរសរុបពីឆ្នាំកន្លងទៅចំពោះអ្នកជាប់ពន្ធចាស់ ។ កម្រិតអតិបរមានៃប្រាក់ពន្ធប៉ាតង់ប្រចាំឆ្នាំត្រូវបង់មានចំនួន ១,១៤០,០០០(មួយលានមួយរយសែសិបពាន់)រៀល ។
• សហគ្រាសជាអ្នកជាប់ពន្ធតាមរបបស្វ័យប្រកាស ពន្ធប៉ាតង់ត្រូវបានកំណត់ចំនួន ១,១៤០,០០០រៀល ។

៣- ពន្ធប៉ាតង់ត្រូវគណនាដោយប្រើប្រាស់តារាងដូចខាងក្រោម ៖

ប្រាក់ពន្ធប៉ាតង់ខ្ពស់បំផុតគឺ ១,១៤០,០០០រៀល ។

ឧទាហរណ៍ ផ្ទះសំណាក់ ក ជាអជីវកម្មដ្ឋានចាស់ ដែលមានផលរបរសរុប ៩០០,០០០,០០០ រៀលក្នុងឆ្នាំ២០១១ ។ ពន្ធប៉ាតង់ឆ្នាំ២០១២ ត្រូវគណនាដូចខាងក្រោម ៖

=(៩០០,០០០,០០០ - ១០០,០០០,០០០) x ០.០០១ + ២៤០,០០០

=(៨០០,០០០,០០០ x ០.០០១) + ២៤០,០០០

=៨០០,០០០ + ២៤០,០០០

=១,០៤០,០០០ រៀល

៤- ពន្ធប៉ាតង់ត្រូវបង់នៅពេល ៖

• សហគ្រាសចាស់ ពន្ធប៉ាតង់ត្រូវបង់ក្នុងអំឡុងពេលចាប់ពីថ្ងៃទី០១ ខែមករា ដល់ថ្ងៃទី៣១ ខែមីនា ជារៀងរាស់ឆ្នាំ ។
• សហគ្រាសថ្មី ពន្ធប៉ាតង់ត្រូវបង់លើកដំបូងមានរយៈពេល១៥ថ្ងៃ បន្ទាប់ពីមានសកម្មភាពសេដ្ឋកិច្ចបឋម ឬកាលបរិច្ឆេទនៃការចុះបញ្ជីជាមួយក្រសួងពាណីជ្ជកម្ម ។

៥- ត្រូវបង់ពន្ធប៉ាតង់នៅទីកន្លែងដូចជា ៖

• សហគ្រាស ឬអ្នកជាប់ពន្ធធំ (គម្រោងវិនិយោគមានលក្ខណៈសម្បត្តិគ្រប់គ្រាន់ សាខាក្រុមហ៊ុនបរទេស ឬក្រុមហ៊ុនពហុជាតិ សហគ្រាសដទៃទៀតដែលមានផលរបរប្រចាំឆ្នាំចាប់ពី ១,០០០ លានរៀលឡើងទៅ) ពន្ធប៉ាតង់ត្រូវបង់នៅនាយកដ្ឋានគ្រប់គ្រងអ្នកជាប់ពន្ធធំ ។
• សហគ្រាសធុនតូច និងសហគ្រាសធុនមធ្យម ពន្ធប៉ាតង់ត្រូវបង់នៅសាខាពន្ធដារខេត្ត-ខណ្ឌ ដែលសហគ្រាសនោះស្ថិតនៅ ។ ចំពោះអាជីវកម្មចល័តត្រូវបង់ពន្ធប៉ាតង់នៅការិយាល័យរដ្ឋបាលសារពើពន្ធកន្លែងដែលចុះបញ្ជីអាជីវកម្ម ។