សំណួរ-ចម្លើយ អនុក្រឹត្យស្តីពីការចុះបញ្ជីផ្តល់បណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ (ភាគ២)

សំណួរ

៦- តើអក្សរដើមសំដៅដល់អ្វី ?

៧- តើលំដាប់អក្សរសំដៅដល់អ្វី ?

៨- តើលេខចុះបញ្ជីសំដៅដល់អ្វី ?

៩- តើយានជំនិះឬយានសំដៅដល់អ្វី ?

១០- តើរថយន្តគ្រួសារសំដៅដល់អ្វី ?

ចម្លើយ

៦- អក្សរដើម សំដៅដល់ឈ្មោះដែលបញ្ជាក់ថាម្ចាស់កម្មសិទ្ធិយានជំនិះមានអាសយដ្ឋានអចិន្ត្រៃយ៍នៅរាជធានី ខេត្តណាមួយ ឬជាកម្មសិទ្ធិរបស់ក្រសួង ស្ថាប័ន អង្គទូត និងអង្គការនានា ។ ចំពោះផ្លាកលេខពិសេសផ្ទាល់ខ្លួន អក្សរដើម “កម្ពុជា” ។

៧- លំដាប់អក្សរ សំដៅដល់លំដាប់អក្សរឡាតាំងនៃលេខចុះបញ្ជី រួមមាន ៖ លំដាប់អក្សរ “A” រហូតដល់ “Z” និងលំដាប់អក្សរ “AA​” រហូតដល់ “ZZ” ។

៨- លេខចុះបញ្ជីសំដៅដល់ ៖

• លេខឡាតាំង ដែលដាក់នៅខាងក្រោយលំដាប់អក្សរ​ និងលេខកូដយានជំនិះមិនលើសពីបួនខ្ទង់
• លេខឬ/និងអក្សរឡាតាំង មិនលើសពី៨​(ប្រាំបី)ខ្ទង់ឬ/និងតួ ។

៩- យានជំនិះឬយាន សំដៅដល់យានសម្រាប់ដឹកមនុស្ស​ ឬទំនិញនៅលើផ្លូវ ឬសម្រាប់សណ្តោង​ ឬត្រូវគេសណ្តោងទោះមាន ឬគ្មានម៉ាស៊ីន ។

១០- រថយន្តគ្រួសារ សំដៅដល់រថយន្តដែលមានផ្ទុកមនុស្សមិនលើសពី៩(ប្រាំបួន)នាក់ ដោយគិតទាំងអ្នកបើកបរ ។ រថយន្តប្រភេទនេះអាចត្រូវបានប្រើប្រាស់ជាលក្ខណៈគ្រួសារ ។

សំណួរ-ចម្លើយ អនុក្រឹត្យស្តីពីការចុះបញ្ជីផ្តល់បណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ (ភាគ៣)

សំណួរ

១១- តើយានយន្តុបករណ៍សំដៅដល់អ្វី ?

១២- តើយានយន្តកសិកម្មកែច្នៃសំដៅដល់អ្វី ?

១៣- តើយានជំនិះក្រោមរបបគយនាំចូលបណ្តោះអាសន្នសំដៅដល់អ្វី ?

១៤- តើយានជំនិះត្រូវបានចែកចេញជាប៉ុន្មានក្រុម ?

១៥- តើម្ចាស់គ្រប់គ្រងនិងម្ចាស់កម្មសិទ្ធិយានជំនិះត្រូវបានចែកចេញជាប៉ុន្មានក្រុម ?

ចម្លើយ

១១- យានយន្តុបករណ៍ សំដៅដល់យានយន្តពិសេសដែលមានឧបករណ៍គ្រឿងចក្របំពាក់បន្ថែម គ្មានផ្ទុកមនុស្ស ឬគ្មានផ្ទុកទំនិញនៅក្រៅកាប៊ីន ដូចជារថយន្តលាយស៊ីម៉ង់ត៍ ឬរថយន្តសម្រាប់បម្រើការងារសាងសាង់ផ្លូវ ស្ពានជាអាទិ៍ ។

១២- យានយន្តកសិកម្មកែច្នៃ សំដៅដល់យានយន្តឧបករណ៍កែច្នៃសម្រាប់បម្រើការងារកសិកម្ម ដូចជាយានយន្តច្រូតស្រូវ យានយន្តបោកបែនស្រូវ និងយានយន្តកិនស្រូវជាអាទិ៍ ។

១៣- យានជំនិះក្រោមរបបគយនាំចូលបណ្តោះអាសន្ន សំដៅដល់យានដែលត្រូវបានអនុញ្ញាតឲ្យនាំចូលនិងប្រើប្រាស់ជាបណ្តោះអាសន្ន ក្នុងរយៈពេលកំណត់តាមបទប្បញ្ញត្តិជាធរមាន ។

១៤- យានជំនិះត្រូវបានចែកចេញជា៦ក្រុមគឺ ៖

• ក្រុមទី១ ៖ ទោចក្រយានយន្ត ត្រីចក្រយានយន្ត ទោចក្រយានយន្តសណ្តោងរ៉ឺម៉ក និងម៉ូតូកង់បួន
• ក្រុមទី២ ៖ រថយន្តគ្រួសារ និងរថយន្តធុនស្រាល
• ក្រុមទី៣ ៖ រថយន្តធុនធ្ងន់ និងក្បាលរថយន្តសណ្តោង
• ក្រុមទី៤ ៖ រ៉ឺម៉ក និងសឺមីរ៉ឺម៉ក
• ក្រុមទី៥ ៖ យានយន្តុបករណ៍
• ក្រុមទី៦ ៖ ត្រាក់ទ័រ និងយានយន្តកសិកម្មកែច្នៃ ។

១៥- ម្ចាស់គ្រប់គ្រងនិងម្ចាស់កម្មសិទ្ធិយានជំនិះត្រូវបានចែកចេញជា៩ក្រុមគឺ ៖

• ក្រុមទី១ ៖ ព្រះបរមរាជវាំង
• ក្រុមទី២ ៖ ស្ថាប័នកំពូល
• ក្រុមទី៣ ៖ ក្រសួង ស្ថាប័នរដ្ឋ
• ក្រុមទី៤ ៖ កងយោធពលខេមរភូមិន្ទ
• ក្រុមទី៥ ៖ កងកម្លាំងនគរបាលជាតិ
• ក្រុមទី៦ ៖ គណៈកម្មាធិការជាតិរៀបចំការបោះឆ្នោត
• ក្រុមទី៧ ៖ ស្ថានទូត អង្គការសហប្រជាជាតិ អង្គការអន្តរជាតិ អង្គការមិនមែនរដ្ឋាភិបាលបរទេស និងអង្គការមិនមែនរដ្ឋាភិបាលកម្ពុជា
• ក្រុមទី៨ ៖ ម្ចាស់កម្មសិទ្ធិយានជំនិះជារូបវន្តបុគ្គល នីតិបុគ្គល ឬសហកម្មសិទ្ធិយានជំនិះ
• ក្រុមទី៩ ៖ រូបវន្តបុគ្គល ឬនីតិបុគ្គល តាមរបបព្យួរពន្ធ ឬក្រោមរបបគយនាំចូលបណ្តោះអាសន្ន ។

តភាគ