សំណួរ-ចម្លើយ ច្បាប់ការទូត (ភាគ៤)

សំណួរ

១៦- តើការភ្ជាប់ទំនាក់ទំនងការទូតមានកម្រិតអ្វីខ្លះដែលត្រូវបំពេញ ?

១៧- តើមានភ្នាក់ងារផ្នែកអ្វីខ្លះចាត់ថាជាសមាជិកបេសកកម្មការទូតនោះ ?

១៨- ក្នុងក្របខណ្ឌនៃច្បាប់ការទូត តើគេអាចបែងចែកសមាជិកការទូតទាំងនេះទៅតាមលំដាប់ថ្នាក់ជាប៉ុន្មានក្រុម ?

១៩- តើជាទូទៅស្ថានបេសកកម្មការទូត ដែលត្រូវបង្កើតឡើងប្រចាំប្រទេសនីមួយៗដែលមានមុខងារអ្វីខ្លះ ?

២០- តើមុខងារការពារប្រយោជន៍របស់ជាតិមានអ្វីខ្លះ ?

ចម្លើយ

១៦- ការភ្ជាប់ទំនាក់ទំនងការទូតមានកម្រិត២យ៉ាងដែលត្រូវបំពេញគឺ ៖

• ការបើកស្ថានទូត តំណាងរដ្ឋដាក់ទូតមានឋានៈជាឯកអគ្គរដ្ឋទូតគឺថាភ្ជាប់ទំនាក់ទំនងការទូតនេះមានកម្រិតខ្ពស់ ។
• ការបើកស្ថានបេសកកម្ម តំណាងរដ្ឋដាក់ទូតមានឋានៈទាបជាងឯកអគ្គរាជទូត ដូចជាឋានៈត្រឹមប្រេសិត ឬក៏ភារធារីដោយសារបុព្វហេតុផ្សេងៗ ។

១៧- ភ្នាក់ងារដែលអាចចាត់ទុកថា ជាសមាជិកការទូតនោះមាន មន្ត្រីបម្រើការការងារនៅក្នុងស្ថានបេសកកម្មនីមួយៗ គេឲ្យឈ្មោះថា សមាជិកបេសកកម្ម ។

១៨- ក្នុងក្របខណ្ឌនៃច្បាប់ការទូត គេអាចបែងចែកសមាជិកការទូតទាំងនេះទៅតាមលំដាប់ថ្នាក់ជា៤ក្រុមគឺ ៖

• ប្រមុខបេសកកម្មការទូត មានឯកអគ្គរដ្ឋទូតឬឯកអគ្គរាជទូត ។
• សមាជិកនៃក្រុមបុគ្គលិកមន្ត្រីការទូត ដូចជាទីប្រឹក្សា លេខាធិការឬអនុព័ន្ធ ។
• សមាជិកនៃក្រុមបុគ្គលរដ្ឋបាលនិងបច្ចេកទេស ដូចជាអ្នករត់សំបុត្រ មានបុគ្គលិក គណនេយ្យ ។
• សមាជិកនៃក្រុមបុគ្គលិកមន្រ្តីបម្រើ ដូចជាអ្នកយាម អ្នកបម្រើ ភេសជ្ជៈ ។

១៩- ជាទូទៅស្ថានបេសកកម្មការទូត ដែលត្រូវបង្កើតឡើងប្រចាំប្រទេសនីមួយៗដែលមានមុខងារដូចជា ៖

• មុខងារតំណាង
• មុខងារការពារប្រយោជន៍របស់ជាតិ
• មុខងារចរចា
• មុខងារផ្តល់ព័ត៌មាន
• មុខងារជំរុញទំនាក់ទំនងល្អ ។

២០- មុខងារការពារប្រយោជន៍របស់ជាតិមានដូចជា ៖

• ការពារផលប្រយោជន៍របស់ជាតិ
• ការពាររដ្ឋរបស់ខ្លួននៅក្នុងរដ្ឋជាម្ចាស់ផ្ទះ ។

តភាគ