សំណួរ-ចម្លើយ ច្បាប់ស្តីពីរបបសន្តិសុខសង្គម (ភាគ២)

សំណួរ

៦- តើតាវកាលិកផ្នែកប្រាក់សោធនតាមរបបភាគទានជាកាតព្វកិច្ចរួមមានអ្វីខ្លះ ?

៧- តើសិទ្ធិវន្តនៃសោធនឧត្តរជីវីរួមមានសហព័ទ្ធនិងកូននៅក្នុងបន្ទុកផ្ទាល់របស់សាមីជនដែលត្រូវបំពេញលក្ខខណ្ឌអ្វីខ្លះ ?

៨- តើសិទ្ធិទទួលបានសោធនឧត្តរជីវីត្រូវផុតរលត់ក្នុងករណីអ្វីខ្លះ ?

៩- ​តើធនធានផ្នែកប្រាក់សោធនមានប្រភពមកពីណា ?

១០- តើសោធនឧត្តរជីវីត្រូវបានបែងចែកជាប៉ុន្មាន ?

ចម្លើយ

៦- តាវកាលិកផ្នែកប្រាក់សោធនតាមរបបភាគទានជាកាតព្វកិច្ចរួមមាន ៖

• សោធនជរាភាព
• សោធនទុព្វលភាព
• ​សោធនឧត្តរជីវី
• វិភាជន៍បូជាសព ។

៧- សិទ្ធិវន្តនៃសោធនឧត្តរជីវីរួមមានសហព័ទ្ធនិងកូននៅក្នុងបន្ទុកផ្ទាល់របស់សាមីជនដែលត្រូវបំពេញលក្ខខណ្ឌដូចជា ៖

• មិនមានប្រកបការងារ ឬមុខរបរមានប្រាក់ចំណូលលើបន្ទាត់នៃភាពក្រីក្រ ។
• ចំពោះសហព័ទ្ធ ត្រូវចុះសំបុត្រអាពាហ៍ពិពាហ៍មុនកាលបរិច្ឆេទដែលសាមីជនធ្លាក់ខ្លួនឈឺ ឬគ្រោះថ្នាក់ជាយថាហេតុ ដែលបណ្តាលឲ្យទទួលមរណភាព ។
• ចំពោះកូនត្រូវមានលក្ខណសម្បត្តិដូចខាងក្រោម ៖

- មិនទាន់រៀបអាពាហ៍ពិពាហ៍

- មានអាយុមិនលើសពី១៨ (ដប់ប្រាំបី) ឆ្នាំ

៨- សិទ្ធិទទួលបានសោធនឧត្តរជីវីត្រូវផុតរលត់ក្នុងករណីដូចជា ៖

• សិទ្ធិវន្តទទួលមរណភាព
• សហព័ទ្ធរៀបអាពាហ៍ពិពាហ៍ជាថ្មីស្របតាមនីតិវិធីច្បាប់ដែលមានជាធរមាន ។ ក្នុងករណីនេះ សាមីជនត្រូវជូនដំណឹងមក ប.ស.ស. យ៉ាងយូរ៣០ (សាមសិប) ថ្ងៃ បន្ទាប់ពីកាលបរិច្ឆេទនៃការរៀបអាពាហ៍ពិពាហ៍ថ្មី ។

៩- ធនធានផ្នែកប្រាក់សោធនមានប្រភពមកពី ៖

• ការបង់ភាគទានពីរដ្ឋ​ និងនិយោជក និងសមាជិក ប.ស.ស.
• ផលដែលបានមកពីការវិនិយោគ
• អំណោយឬអច្ច័យទាននិងប្រភពស្របច្បាប់ដទៃផ្សេងទៀត ។

១០- សោធនឧត្តរជីវីត្រូវបានបែងចែកដូចជា ៖

• សម្រាប់សហព័ទ្ធ៥០% (ហាសិបភាគរយ)
• សម្រាប់កូន៥០% (ហាសិបភាគរយ)
• ក្នុងករណីដែលសិទ្ធិវន្តមានតែសហព័ទ្ធ ឬកូនត្រូវទទួលបាន១០០% (មួយរយភាគរយ) ។

តភាគ