សំណួរ-ចម្លើយ ច្បាប់ស្តីពីការប្រឆាំងអំពើពុករលួយ (ភាគ២៤)

សំណួរ

១១៦- តើមន្ត្រីរាជការយកម៉ោងការងារទៅបម្រើការងារឯកជន តើជាប់ពីបទពុករលួយដែរ ឬទេ ?

១១៧- គ្រូបង្រៀនដែលយកសាលារៀន និងម៉ោងរដ្ឋទៅបង្រៀនក្រៅម៉ោង តើជាអំពើពុករលួយដែរឬទេ ?

១១៨- ការប្រកាសទ្រព្យសម្បត្តិលើកដំបូងមិនបញ្ជាក់ពីប្រភព តើមូលហេតុអ្វីបានជាមិនឱ្យបញ្ជាក់ ?

១១៩- តើប្រធានមន្ទីរតាមបណ្តារាជធានី ខេត្ត តម្រូវឱ្យប្រកាសដែរឬទេ ?

១២០- ការរកស៊ីដែលប្រពន្ធជាអ្នកគ្រប់គ្រង និងឈរឈ្មោះ តើប្ដីត្រូវប្រកាសពីចំណូលនៃការរកស៊ីនេះដូចម្តេច ?

ចម្លើយ

១១៦- មន្ត្រីរាជការយកម៉ោងការងារទៅបម្រើការងារឯកជន គឺក្រុមជនបង្គោលជាអ្នកកំណត់ថាជាអំពើពុករលួយ ឬមិនពុករលួយ ។

១១៧- គ្រូបង្រៀនដែលយកសាលារៀន និងម៉ោងរដ្ឋទៅបង្រៀនក្រៅម៉ោង ក្រុមជនបង្គោលជាអ្នកកំណត់ថាជាអំពើពុករលួយ ឬមិនពុករលួយ ។

១១៨- ការប្រកាសទ្រព្យសម្បត្តិលើកដំបូងមិនបញ្ជាក់ពីប្រភព មានមូលហេតុដូចជា ៖

• មូលហេតុទី១ ៖ គឺគោលការណ៍មិនប្រតិសកម្មនៃច្បាប់ស្តីពីការប្រឆាំងអំពើពុករលួយ។ ច្បាប់នេះមិនបានគ្របដណ្តប់លើសកម្មភាព ឬទ្រព្យសម្បត្តិទាំងឡាយណាដែលកើតមានមុនការប្រកាសឱ្យប្រើនៃច្បាប់នេះ ។
• មូលហេតុទី២ ៖ គឺខ្លឹមសារនៃមាត្រា៣៦ នៃច្បាប់ស្តីពីការការប្រឆាំងអំពើពុករលួយ ដែលចែងអំពីការមានទ្រព្យសម្បត្តិដោយខុសច្បាប់ ។ មានកំណើននៃទ្រព្យសម្បត្តិខុសច្បាប់ លុះត្រាតែមានការចាប់ផ្តើមណាមួយ។ បើប្រកាសលើកដំបូងនេះតម្រូវឱ្យបញ្ជាក់ពីប្រភពហិរញ្ញប្បទាន គឺមិនមានមូលដ្ឋានណាមួយសម្រាប់គិតគូរ ព្រោះយើងមិនធ្លាប់បានប្រកាស ។
• មូលហេតុទី៣ ៖ គឺកត្តានយោបាយដែលសារមួយបញ្ជាក់ថារាជរដ្ឋាភិបាលបានយកចិត្តទុកដាក់ និងទទួលស្គាល់នូវទ្រព្យសម្បត្តិរបស់បុគ្គលគ្រប់រូបដែលកើតមានការប្រកាសឱ្យប្រើនៃច្បាប់ ស្តីពីការប្រឆាំងអំពើពុករលួយ ។

១១៩- ក្នុងដំណាក់ដំបូងនេះមន្ត្រីរាជការ ដែលត្រូវបានតែងតាំងដោយប្រកាសមិនតម្រូវឱ្យប្រកាសទ្រព្យសម្បត្តិ និងបំណុលទេ ។ ប្រធានមន្ទីរ ក៏ដូចជាមន្ត្រីឯទៀតដែលតែងតាំងដោយប្រកាស និងអាចត្រូវប្រកាសទ្រព្យសម្បត្តិ និងបំណុលពេលក្រោយ បន្ទាប់ពីអង្គភាពប្រឆាំងអំពើពុករលួយបានពិគ្រោះយោបល់ជាមួយក្រុមប្រឹក្សាជាតិប្រឆាំងអំពើពុករលួយ ។

១២០- ករណីនេះប្តីមិនចាំបាច់ប្រកាសពីចំណូល ដែលបានមកពីការរកស៊ីនេះទេ ។ ចំណូលនេះជាទ្រព្យសម្បត្តិរបស់ប្រពន្ធ ។

តភាគ