សំណួរ-ចម្លើយ ប្រកាសស្តីពីពន្ធលើប្រាក់ចំណូល (ភាគ២)

សំណួរ

៦- តើពាក្យ “សេវាគ្រប់គ្រង” សំដៅដល់អ្វី ?

៧- តើពាក្យ “សេវាបច្ចេកទេស” សំដៅដល់អ្វី ?

៨- តើប្រាក់ចំណូលមិនជាប់ពន្ធមានអ្វីខ្លះ ?

៩- ហេតុអ្វីមានការតម្រូវឲ្យមានការញែកដាច់ពីគ្នារវាងទ្រព្យសកម្មអាជីវកម្ម និងទ្រព្យឯកជន ?

១០- ទ្រព្យសកម្មអាជីវកម្មរបស់សហគ្រាសនីតិបុគ្គល តើត្រូវគោរពគោលការណ៍អ្វីខ្លះ ?

ចម្លើយ

៦- ពាក្យ “សេវាគ្រប់គ្រង” សំដៅដល់សេវាដែលមានចរិតគ្រប់គ្រងទាំងឡាយ ដែលបានធ្វើឡើងដើម្បីបំពេញមុខងារគ្រប់គ្រងក្នុងការប្រកបអាជីវកម្មជាអាទិ៍មាន ការជ្រើសរើសបុគ្គលិក ការបណ្តុះបណ្តាល ការគ្រប់គ្រងភ្នាក់ងារលក់ ។ល។

៧- ពាក្យ “សេវាបច្ចេកទេស” សំដៅដល់សេវាទាំងឡាយដែលមានចរិតជាបច្ចេកទេសដែលតម្រូវឲ្យមានជំនាញ ឬចំណេះដឹងបច្ចេកទេសក្នុងការអភិវឌ្ឍ ឬបង្កើតធាតុចូលនានានៅក្នុងអាជីវកម្មជាអាទិ៍មាន សេវា​ វិទ្យាសាស្ត្រ រូបសាស្រ្ត គីមីសាស្ត្រ វេជ្ជសាស្រ្ត ឱសថសាស្ត្រ នីតិសាស្ត្រ ធារាសាស្រ្ត បសុសាស្រ្ត សិល្បៈ អប់រំសិក្សាធិការ វិស្វកម្ម  ស្ថាបត្យកម្ម ការសិក្សាស្រាវជ្រាវ គណនេយ្យ សេដ្ឋកិច្ច  សុខុមាលភាព ថាមពលបរមាណូ រួមទាំងសេវាពិគ្រោះយោបល់ ។ល។

៨- ប្រាក់ចំណូលមិនជាប់ពន្ធមានដូចជា ៖

• ប្រាក់ចំណូលរបស់រាជរដ្ឋាភិបាល ឬប្រាក់ចំណូលរបស់ស្ថាប័នរាជរដ្ឋាភិបាល ។
• ប្រាក់ចំណូលរបស់ ៖

- អង្គការណាមួយ ដែលត្រូវបានរៀបចំឡើង និងដំណើរការសម្រាប់គោលដៅសុទ្ធសាធខាងសាសនា សប្បុរធម៌ វិទ្យាសាស្ត្រ អក្សរសាស្រ្តឬអប់រំ ហើយគ្មានចំណែកណាមួយនៃទ្រព្យ ឬប្រាក់ចំណូលត្រូវបានប្រើប្រាស់ជាផលប្រយោជន៍ឯកជន

- សមាគមណាមួយ ក្នុងករណីដែលប្រាក់ចំណូលរបស់សមាគមទាំងនោះ មិនត្រូវបានប្រើប្រាស់ផលប្រយោជន៍ឯកជនរបស់អ្នកចូលហ៊ុនឬរូបវន្តបុគ្គល ។

៩- ការតម្រូវឲ្យមានការញែកដាច់ពីគ្នារវាងទ្រព្យសកម្មអាជីវកម្ម និងទ្រព្យឯកជន មានលក្ខណៈសំខាន់ណាស់ពីព្រោះ ៖

• ចំណាយដែលជាមូលដ្ឋានសម្រាប់ការកំណត់ប្រាក់ចំណូលជាប់ពន្ធ ត្រូវតែជាចំណាយទាំងឡាយដែលទាក់ទិននឹងចំណែកនៃទ្រព្យសកម្មអាជីវកម្ម ។ តាមន័យនេះ ចំណាយទាំងឡាយដែលទាក់ទិននឹងទ្រព្យសកម្ម ប៉ុន្តែមិនបានកត់ត្រាខាងទ្រព្យសកម្មនៃតារាងតុល្យការ មិនត្រូវបានអនុញ្ញាតឲ្យកាត់កងទេ
• ការផ្ទេរទ្រព្យសកម្មអាជីវកម្មទៅទ្រព្យឯកជន ត្រូវបានចាត់ទុកថាជាការលក់ដែលបណ្តាលឲ្យមានតម្លៃលើសត្រូវជាប់ពន្ធ ឬតម្លៃខ្វះត្រូវកាត់ចេញពីប្រាក់ចំណូលជាប់ពន្ធ
• ប្រតិបត្តិការបញ្រ្ចាស គឺការផ្ទេរទ្រព្យសកម្មពីទ្រព្យឯកជនទៅទ្រព្យសកម្មអាជីវកម្ម គឺជាឧបហារិត ។ ឧបហារិតនេះ ត្រូវកត់ត្រាតាមតម្លៃពិតប្រាកដនាថ្ងៃដែលមានការផ្ទេរនេះ ។

១០- ទ្រព្យសកម្មអាជីវកម្មរបស់សហគ្រាសនីតិបុគ្គល ត្រូវគោរពគោលការណ៍ដូចជា ៖

• ទ្រព្យសកម្មអាជីវកម្ម គឺជាទ្រព្យរបស់សហគ្រាស ។ ជាគតិយុត្ត ទ្រព្យសកម្មអាជីវកម្មរបស់សហគ្រាសនីតិបុគ្គលត្រូវដាច់ដោយឡែកពីទ្រព្យរបស់អ្នកចូលហ៊ុនឬម្ចាស់ហ៊ុន
• សម្រាប់សហគ្រាសដែលបង្កើតឡើងដោយគ្មានមូលដ្ឋានច្បាប់ច្បាស់លាស់ ទ្រព្យសកម្មនានាដែលអ្នកចូលហ៊ុនបានយល់ព្រមដាក់ជាកម្មសិទ្ធិរួម ត្រូវតែកត់ត្រាខាងទ្រព្យសកម្មនៃតារាងតុល្យការ ។

តភាគ