សំណួរ-ចម្លើយ ច្បាប់ភូមិបាល (ភាគ១០)

សំណួរ

៤៦- តើអនុវិស័យរដ្ឋបាលដីធ្លីមានអ្វីខ្លះ ?

៤៧- តើអនុវិស័យបែងចែកដីធ្លីមានអ្វីខ្លះ ?

៤៨- តើអនុវិស័យរៀបចំដីធ្លីមានអ្វីខ្លះ ?

៤៩- តើកម្មសិទ្ធិមានអ្វីខ្លះ ?

៥០- តើប្រព័ន្ធសុរិយដីនៅកម្ពុជាគឺជាអ្វី ?

ចម្លើយ

៤៦- អនុវិស័យរដ្ឋបាលដីធ្លីមានដូចជា ៖

• ការចុះបញ្ជី
• ប្រព័ន្ធព័ត៌មានវិទ្យា
• ប្រព័ន្ធវាយតម្លៃ
• ភូមិសាស្រ្ត
• ការដោះស្រាយវិវាទដីធ្លី ។

៤៧- អនុវិស័យបែងចែកដីធ្លីមានដូចជា ៖

• សម្រាប់សង្គមកិច្ច ៖ សម្បទាន អំណោយ និងផលុបភោគ ។
• សម្រាប់សេដ្ឋកិច្ច ៖ សម្បទាន ជួលអចិន្រ្តៃយ៍ និងកិច្ចសហប្រតិបត្តិការឯកជន ជាមួយសាធារណៈ ។

៤៨- អនុវិស័យរៀបចំដីធ្លីមានដូចជា ៖

• ផែនការរៀបចំដីធ្លី
• ប្លង់គោលប្រើប្រាស់ដីធ្លី
• និងផែនការប្រើប្រាស់ដីធ្លី ។

៤៩- កម្មសិទ្ធិមានដូចជា ៖

• កម្មសិទ្ធិឯកត្តបុគ្គល
• កម្មសិទ្ធិសមូហភាព
• អឌ្ឍសិទ្ធភាព
• សហកម្មសិទ្ធិ
• សហកម្មសិទ្ធិពិសេស
• កម្មសិទ្ធិអវិភាគ
• កម្មសិទ្ធិអវិភាគពិសេស ។

៥០- ប្រព័ន្ធសុរិយដីនៅកម្ពុជា គឺជាប្រព័ន្ធកត់ត្រាក្បាលដីនៅក្នុងសៀវភៅគល់បញ្ជីដីធ្លីដោយអាជ្ញាធរ ។ កម្ពុជាបានបង្កើតប្រព័ន្ធនេះឡើងដំបូងនៅសម័យដែលបារាំងបានចូលមកធ្វើអាណានិគមន៍ ចាប់តាំងពីឆ្នាំ១៩២០ ដែលនៅពេលនោះយើងមានក្រមរដ្ឋប្បវេណីលើកដំបូង ដែលមានមួយផ្នែកបញ្ញត្តិលើវិស័យអចលវត្ថុ គឺវិស័យដីធ្លីនេះឯង ហើយច្បាប់នេះបន្តអនុវត្តរហូតមកដល់សម័យសង្គមរាស្រ្តនិយម សម័យសាធារណៈរដ្ឋ លន់ ណុល ។ បន្ទាប់មកសម័យខ្មែរក្រហមលែងមានកម្មសិទ្ធិទៀតហើយក្រោយសម័យខ្មែរក្រហមរយៈពេល ១០ឆ្នាំ ពី១៩៧៩ ដល់១៩៨៩ ។ ចាប់ពីឆ្នាំ១៩៨៩ រដ្ឋកម្ពុជាបានផ្តល់កម្មសិទ្ធិឲ្យប្រជាពលរដ្ឋសាជាថ្មី ហើយប្រព័ន្ធចុះបញ្ជីក្បាលដីចេះតែធ្វើបន្តបន្ទាប់រហូតមកដល់សព្វថ្ងៃ (អនុក្រិត្យ០៣, ០២៥, ច្បាប់ភូមិបាល១៩៩២, រដ្ឋធម្មនុញ្ញឆ្នាំ១៩៩៣ មានត្រា ៤៤ច្បាប់ភូមិបាល ២០០១ និងលិខិតបទដ្ឋានផ្សេងៗទៀត) ។

តភាគ