សំណួរ-ចម្លើយ សទ្ទានុក្រមវិទ្យាសាស្រ្តនយោបាយ និងការទូត (ភាគ១៦)

សំណួរ

៧៦- តើហ្វាស៊ីសនិយមសំដៅដល់អ្វី ?

៧៧- តើអង្គការលើកលែងទោសអន្តរជាតិសំដៅដល់អ្វី ?

៧៨- តើអធិការបតីសំដៅដល់អ្វី ?

៧៩- តើអនុសញ្ញាអន្តរជាតិសំដៅដល់អ្វី ?

៨០- តើអនុស្សរណៈនៃការយោគយល់គ្នាសំដៅដល់អ្វី ?

ចម្លើយ

៧៦- ហ្វាស៊ីសនិយម សំដៅដល់លទ្ធិឬប្រព័ន្ធនយោបាយដែលនាំទៅដល់ការបង្កើតរបបផ្តាច់ការជាតិនិយមជ្រុល ការក្តាប់អំណាចដោយក្រុមអ្នកជំនួញ ដែលដឹកនាំដោយមូសូលីនី នៅក្នុងឆ្នាំ១៩២២ នៅប្រទេសអីតាលី ។

៧៧- អង្គការលើកលែងទោសអន្តរជាតិ សំដៅដល់អង្គការនេះធ្វើយុទ្ធនាការអន្តរជាតិក្នុងការគាំទ្រ ចំពោះអ្នកទាំងឡាយណាដែលជាប់ឃុំឃាំងដោយជំនឿខាងសាសនា និងនយោបាយទូទាំងពិភពលោក ។ អង្គការនេះបានអនុវត្តនូវគោលនយោបាយសំខាន់ៗចំនួនបីគឺ ៖

• ដោះលែងអ្នកទោសមនសិការ
• បញ្ឈប់ការធ្វើទារុណកម្មរាល់ទម្រង់ទាំងអស់ រួមទាំងទោសប្រហារជីវិត
• ស្វែងរកយុត្តិធម៌និងភាពត្រឹមត្រូវក្នុងការកាត់សេចក្តីចំពោះអ្នកទោសនយោបាយទាំងអស់ ។

អង្គការនេះមានទីតាំងនៅក្រុងឡុងដ៏ប្រទេសអង្គគ្លេស​ មានតំណាងនៅអង្គការសហប្រជាជាតិ ហើយបានទទួលពានរង្វាន់សិទ្ធិមនុស្សអង្គការសហប្រជាតិក្នុងឆ្នាំ ១៩៧៨ ។ អង្គការនេះទទួលស្គាល់ជាផ្លូវការដោយសហភាពអឺរ៉ុប ក្រុមប្រឹក្សានៃអឺរ៉ុប អង្គការនៃរដ្ឋអាមេរិក និងអង្គការឯកភាពអាហ្រ្វ៊ិក និងក្នុងឆ្នាំ១៩៧៧ អង្គការនេះបានទទួលពានរង្វាន់ណូប៊ែលសន្តិភាព ។

៧៨- អធិការបតី សំដៅដល់ប្រមុខរដ្ឋាភិបាលនៃប្រទេសមួយចំនួន ។ ឧទាហរណ៍ ប្រមុខដឹកនាំរដ្ឋាភិបាលនៃប្រទេសអាល្លឺម៉ង់មានងារជាអធិការបតី ។

៧៩- អនុសញ្ញាអន្តរជាតិ ជាទូទៅ ន័យនៃពាក្យអនុសញ្ញាអន្តរជាតិមានលក្ខណៈដូចគ្នានឹងន័យរបស់ពាក្យសន្ធិសញ្ញាដែរ ។ លក្ខណៈវិនិច្ឆ័យនៃអនុសញ្ញាគឺ ៖

• អនុសញ្ញាមានន័យនិងចាត់ទុកដូចជាច្បាប់សន្មត (ច្បាប់មានលក្ខណៈទូទៅនិងមានភាពប្រាកដប្រជាដែលត្រូវ​បានប្រជាជាតិទាំងឡាយលើសាកលលោកសុខចិត្តទទួលយកថា ជាកាតព្វកិច្ចខាងផ្លូវច្បប់) ។
• អនុសញ្ញាត្រូវបើកឲ្យមានការចូលរួមពីសំណាក់សហគមន៍អន្តរជាតិទាំងមូល ឬពីបណ្តារដ្ឋនានាមួយចំនួនធំ ។

៨០- អនុស្សរណៈនៃការយោគយល់គ្នា សំដៅដល់លិខិតូបករណ៍អន្តរជាតិទាំងឡាយណា ដែលមានទម្រង់ជាលិខិតទោល ហើយមិនតម្រូវឲ្យមានការផ្តល់សច្ចាប័ន ។

តភាគ