ភ្លើងឆេះព្រៃ៖ ក្រិកនៅបន្តឆេះខ្លោច ចំណែក​តួកគី​បាន​ធូរស្រាល ដោយទឹកភ្លៀង

នៅប្រទេស​ក្រិក ដីព្រៃ​រាប់ពាន់​ហិចតា​ត្រូវ​លេបត្របាក់​ដោយ​ភ្លើងឆេះព្រៃ​ដ៏សន្ធោសន្ធៅ អស់ ១១​ថ្ងៃមកហើយ។ នៅ​ថ្ងៃ​សៅរ៍ទី ៧​សីហា ភ្លើងឆេះព្រៃ​បាន​រាលដាល​ចូលក្បែរ​តំបន់ ជាយ​រដ្ឋធានី អាថែន ចំណែក​ភ្លើងឆេះព្រៃភ្នំ​នៅ​ឧបទ្វីប Peloponnèse បាន​បង្ខំ ឲ្យប្រជាជន​ និង​អ្នកទេសចរ​ជាង ៥០០០​នាក់​ ត្រូវ​ជម្លៀសចេញពី ផ្ទះសម្បែង និង​សណ្ឋាគារ។ ប្រធានាធិបតីបារាំង លោក​អេម៉ានុយអែល ម៉ាក្រុង បាន​សំដែង​សាមគ្គីភាព​ជាមួយប្រជាជន​ក្រិក បន្ទាប់ពី​បាន​បញ្ជូន​យន្តហោះពន្លត់អគ្គិភ័យ ៣គ្រឿង រួមទាំង អ្នកពន្លត់ភ្លើង ចំនួន ៨០នាក់ ទៅកាន់តំបន់ភាគខាងជើង​ទីក្រុង​អាថែន កាលពីថ្ងៃ​ព្រហស្បតិ៍។

នៅ​កោះ​ Eubée ភាគខាងជើង រដ្ឋធានី​អាថែន ខណៈដែល ពន្លឺ​អណ្តាត​ភ្លើងឆេះព្រៃ ដ៏​សន្ធោសន្ធៅ ចាំងចូល​ទៅក្នុង​ទឹកសមុទ្រ ប្រជាជន​ក្រិក​ជាង ១៣០០​នាក់ ត្រូវ​គេ​ជម្លៀស​ចេញ​តាម​ទូក យ៉ាងប្រផិតប្រផើយបំផុត កាលពីយប់​ថ្ងៃសុក្រ។ នៅព្រឹកថ្ងៃ​សៅរ៍ អាជ្ញាធរ​ក្រិក​នៅបន្ត​ជម្លៀសអ្នកភូមិ ជាង ៣០០​គ្រួសារទៀត បន្ទាប់​ពីភ្លើងឆេះព្រៃ នៅតែ​បន្ត​ឆេះរាលដាល​តំបន់ជាប់មាត់សមុទ្រ។

ជាមួយ អាកាសធាតុ​ក្តៅស្ងួត​ហួតហែង ពី​៤០ ទៅ​៤៥​អង្សារ ក្រិក និង​ប្រទេស​នៅ​តំបន់​សមុទ្រ​មេឌីទែរ៉ាណេ​ដូចជាតួកគី​ជាដើម បាន​រងគ្រោះ​ដោយសារ​ភ្លើងឆេះព្រៃធ្ងន់ធ្ងរ កម្រនឹង​ជួប។ ចាប់តាំង​ពីកើតមាន ភ្លើងឆេះ ព្រៃ ​១១​ថ្ងៃជាប់ៗគ្នា គេរកឃើញ​មាន​ភ្លើងឆេះព្រៃ ជាង​៥០កន្លែង ក្នុង​ចំណោម ៩៩​កន្លែង នៅ​ទូទាំងប្រទេស ដែលនៅតែ​សកម្មឆេះនៅឡើយ។

របាយការណ៍​របស់​អង្គការ​សហប្រជាជាតិ ដែល​ទីភ្នាក់ងារ​ព័ត៌មាន​បារាំង AFP ទទួល​បាន​នៅ​សប្តាហ៍នេះ បាន​បង្ហាញថា តំបន់​នៅ​សមុទ្រ​មេឌីទែរ៉ាណេ​បាន​ក្លាយ​ជា​ចំណុច​ក្តៅខ្លាំង ដោយសារ​កត្តា​ប្រែប្រួល​អាកាសធាតុ។

នៅក្រិក ចំនួន​ជនរងគ្រោះ​ស្លាប់​ដោយសារ​ភ្លើងឆេះព្រៃលើកនេះ មាន​តែ២នាក់ ដែលក្នុងនោះ ១នាក់ ជាអ្នកស្ម័គ្រចិត្តពន្លត់អគ្គិភ័យ (របួស ជាង ២០នាក់) ពោល​តិចជាង ភ្លើងឆេះព្រៃ កាលពី​៣ឆ្នាំមុន ដែល​បាន​សម្លាប់​ជាង​មនុស្ស​១០០នាក់។ ប៉ុន្តែ ទំហំដីព្រៃ ដែល​ត្រូវ​ភ្លើងលេបត្របាក់​លើកនេះ គឺ​មាន​ដល់​ទៅ ៧ម៉ឺន​ហិចតា គឺ​ជិត ១០ដង បើប្រៀបធៀប​នឹងរយៈពេលដូចគ្នា កាលពី​ឆ្នាំ ២០២០។

សម្រាប់​នាយករដ្ឋមន្រ្តី​ក្រិក លោក Kyriakos Mitsotakis រដូវក្តៅ​នៅ​ឆ្នាំនេះ កត់សំគាល់​ដោយ​ភ្លើងឆេះព្រៃ​ដ៏សន្ធោសន្ធៅ​ដែល បាន​បំបែកឯតទគ្គកម្ម នៅក្រិក។ នៅទីស្នាក់ការកណ្តាល​របស់​ក្រុមពន្លត់អគ្គិភ័យ នៅទីក្រុង​អាថែន កាលពីថ្ងៃ​សៅរ៍ នាយករដ្ឋមន្រ្តីក្រិក​បាន​សន្យា​ជួសជុស​ការខូចខាតឡើងវិញ នៅក្រោយ ភ្លើងឆេះព្រៃ ចប់ជាស្ថាពរ។ លោក​បានប្រកាស​​សន្យាផងដែរ កញ្ចប់​ថវិកា​ជាង​១លាន​អឺរ៉ូ (១,៥លាន​អឺរ៉ូ)​សម្រាប់​ជួយ​បន្ទាន់ តំបន់ដែលរងគ្រោះ​ដោយសារ​ភ្លើងឆេះព្រៃលើកនេះ៕