វិញ្ញាសាផែនដី ប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា ( វិញ្ញាសាទី៦៣ )

សំនួរ

១. តើធ្យូងថ្មមានប៉ុន្មានប្រភេទ ? អ្វីខ្លះ ? ចូររៀបរាប់ ?

២. តើឥន្ធនៈផុស៊ីលមានអត្ថប្រយោជន៍អ្វីខ្លះ ?

៣. តើការប្រើប្រាស់ឥន្ធនៈផុស៊ីលផ្តល់ផលប៉ះពាល់អ្វីខ្លះដល់បរិស្ថាន ?
៤. តើគេចែកធនធានថាមពលជាប៉ុន្មានប្រភេទ ? អ្វីខ្លះ ? ចូរលើកឧទា​ហរណ៍បញ្ជាក់ ?

៥. តើប្រភពថាមពលចម្បងៗមានអ្វីខ្លះ ?

ចម្លើយ

១. ធ្យូងថ្មមាន ៤ប្រភេទគឺ ៖

• ធ្យូងតូបជាសារធាតុទន់កើតឡើងពីការពុកផុយនៃរុក្ខជាតិសរសៃមានពណ៌ត្នោតក្រមៅ ។
• ធ្យូងលីញីតកើតឡើងពីសម្ពាធនៃកម្ទេចកំណដែលចាក់បង្គរពីលើធ្យូងតូប ។ ធ្យូងលីញីតមានពណ៌ត្នោត ទន់ និងវាយភាពឈើ ។
• ធ្យូងប៊ីទូមនៅពេលដែលសម្ពាធចេះតែបន្តទៅលើធ្យូងលីញីតធ្វើឲ្យវាក្លាយជាធ្យូងប៊ីទូម ។ ធ្យូងប៊ីទូមស្ថិតនៅជ្រៅទៅក្នុងផែនដី មានពណ៌ត្នោតក្រមៅ ឬខ្មៅហើយទន់និងសម្បូរជាងគេក្នុងចំណោមប្រភេទធ្យូង ។
• ធ្យូងអង់ត្រាស៊ីត​នៅពេលមានសម្ពាធកាន់តែខ្ពស់ទៅលើធ្យូងប៊ីទូម បង្កើតើបានប្រភេទធ្យូងអង់ត្រាស៊ីត ។ ធ្យូងអង់ត្រាស៊ីតរឹង ហើយស្រួយ និងស្ទើរតែជាកាបូនសុទ្ធ ។

២. ឥន្ធនៈផូស៊ិលមានអត្ថប្រយោជន៍ដូចជា ៖ ឥន្ធនៈផូស៊ីលគឺជាប្រភពថាមពលដ៏សំខាន់សម្រាប់ឧស្សាហកម្ម គមនាគមន៍ កសិកម្ម និងគេហដ្ឋាន ។ល។

៣. ការប្រើប្រាស់ឥន្ធនផូស៊ីលផ្តល់ផលប៉ះពាល់ដល់បរិស្ថានដូចជា ៖ ចំហេះឥន្ធនៈផុស៊ីលបញ្ចេញឧស្ម័នពុល ( កាបូនឌីអុកស៊ីត CO2 ) និងស្បា​ន់ធ័រ S ) នាំឲ្យកង្វក់បរិយាកាស និងធ្វើឲ្យប្រែប្រួលអាកាសធាតុ ។ ម៉្យាងទៀត ឧស្ម័នទាំងនេះបានផ្សំជាមួយចំហាយទឹកនៅក្នុងបរិយាកាសបង្កើតបានជាអាស៊ីតខ្សោយ ហើយនៅលាយឡំជាមួយទឹកភ្លៀងនៅពេលធ្លាក់មកលើផ្ទៃផែនដីបង្កើតទៅជាភ្លៀងអាស៊ីតដែលមានគ្រោះថ្នាក់យ៉ាងខ្លាំងដល់ជិវីតនៅលើផែនដី ។

៤. គេចែកធនធានថាមពលជា ២ប្រភេទគឺ ៖ ធនធានថាមពលកើតឡើងវិញ ( ថាមពលព្រះអាទិត្យ ខ្យល់ ទឹក កម្តៅដី និងថាមពលជីវម៉ាស់ ) និងធនធានថាមពលមិនកើតឡើងវិញ ( ឥន្ធនៈ ផូស៊ីល ថាមពលនុយក្លេអ៊ែ .... ) ។

៥. ប្រភពថាមពលចម្បងៗមាន ៖ ឥន្ធនៈផូស៊ីល ឥន្ធនៈជីវម៉ាស់ ខ្យល់ ទឹក ព្រះអាទិត្យ កម្តៅដី និងសារធាតុវិទ្យុសកម្ម ។