វិញ្ញាសាវប្បធម៌ទូទៅត្រៀមប្រឡងក្របខណ្ឌផ្ទៃក្នុងនិងសិស្សពូកែ (វិញ្ញាសាទី២៥)

សំណួរ

១. តើពាក្យសាមគ្គី និងសាមគ្គីធម៌មានន័យដូចម្តេច ?

២. តើអ្នកត្រូវធ្វើដូចម្តេចខ្លះ ដើម្បីឱ្យចំណងសាមគ្គីមានភាពរឹងមាំ និងយូរអង្វែង ?

៣. ចូរបង្ហាញអំពីសមិទ្ធផលដែលកើតឡើងពីការសាមគ្គីគ្នា ។

៤. ហេតុអ្វីបានជាមនុស្សម្នាក់ៗត្រូវការសាមគ្គី ? តើការមានសាមគ្គីនឹងផ្តល់ផលប្រយោជន៍អ្វីខ្លះដល់សង្គម ?

៥. តើសាមគ្គីភាព ជាអ្វី ? សាមគ្គីរសជាអ្វី ?

ចម្លើយ

១. ពាក្យសាមគ្គី មានន័យថា គឺជាតម្លៃមួយដែលតម្រូវឱ្យបុគ្គលម្នាក់ៗនៅក្នុងគ្រួសារ ក្រុម សហគមន៍ឬសង្គមចេះរួបរួមគ្នាបំពេញកិច្ចការគ្រប់បែបយ៉ាងដោយការព្យាយាមស្មោះត្រង់យោគយល់ និងអធ្យាស្រ័យគ្នាទៅវិញទៅមក ។សាមគ្គីគឺជាការព្រមព្រៀងគ្នា ឬការស្រុះស្រួលគ្នា ។ សាមគ្គីធម៌ មានន័យថា ជាច្បាប់ ឬលក្ខខណ្ឌសម្រាប់ប្រតិបត្តិឱ្យមានការព្រមព្រៀនគ្នា ឬសាមគ្គីគ្នា ។

២. ដើម្បីឱ្យចំណងសាមគ្គីមានភាពរឹងមាំ និងយូរអង្វែងយើងត្រូវប្រកាន់វិធី ៦ យ៉ាង ។

• ការតស៊ូ និងការអត់ធ្មត់
• ការសន្តោស និងការស្មោះត្រង់
• ការមិនប្រកាន់ ឬមិនរើសអើង
• ការមិនច្រណែន និន្នាឈ្នានីស
• ការស្មោះត្រង់ទៅវិញទៅមក
• ការពិចារណារកហេតុផលតាមផ្លូវល្អ ។

៣. សមិទ្ធផលដែលបានកើតឡើងពីការសាមគ្គីគ្នាគឺ ៖

• ការរីកចម្រើនឆាប់រហ័ស ទទួលបានជោគជ័យដោយងាយនិងការចំណេញពេលវេលា
• ការពារផលប្រយោជន៍សមិទ្ធផល បានឋិតថេរគង់វង្ស
• ការបង្កើតបានសមិទ្ធផលកាន់តែច្រើនឡើងថែមទៀត
• បុគ្គលម្នាក់ៗនឹងទទួលបានផលប្រយោជន៍គ្រប់បែបយ៉ាង
• គ្រួសារ សហគមន៍ សង្គម មានកម្លាំងកាន់តែរឹងមាំ មានកិត្តិយស កេរ្តិ៍ឈ្មោះ និងមិនមានសត្រូវណាម្នាក់មើលងាយឡើយ
• បុគ្គលម្នាក់ៗបានបំពេញកិច្ចការដែលត្រូវធ្វើតាមតួនាទីរៀងៗខ្លួនដោយមិនមើលបំណាំគ្នា
• ការឯកភាពគ្នាជាធ្លុងមួយ គ្មានការប្រឆាំង ឬជំទាស់ដែលនាំឱ្យសង្គមបាក់បែក ។

៤. បានជាមនុស្សម្នាក់ត្រូវការសាមគ្គីព្រោះមនុស្សម្នាក់ៗតែងមានបំណងប្រាថ្នាចង់បានសេចក្តីសុខ និងការរីកចម្រើន ។ ដើម្បីសម្រេចបំណងប្រាថ្នានេះមនុស្សគ្រប់រូបតែងរកមធ្យោបាយ ការសម្រេចចិត្ត ការបំពេញភារកិច្ចផ្សេងៗពីគ្នា ។ ប៉ុន្តែកិច្ចការធំៗមួយចំនួនគេមិនអាចបំពេញតែម្នាក់ឯងឬមនុស្សពីរបីនាក់បានទេលុះត្រាតែមានការចូលរួមឬការរួមសាមគ្គីទាំងកាយទាំងចិត្តរបស់មនុស្សភាគច្រើនទើបអាចសម្រេចចិត្តកិច្ចការនោះដោយជោគជ័យ ព្រោះសាមគ្គីជាកត្តាកំណត់ជ័យជំនះគ្រប់បែបយ៉ាង ។ ការមានសាមគ្គីនឹងផ្តល់ផលប្រយោជន៍ដល់សង្គមជាតិខ្មែរ គឺ ៖

• មានការរីកចម្រើនគ្រប់ផ្នែក គ្រប់វិស័យ រីកចម្រើនយ៉ាងឆាប់រហ័ស
• គ្មានសត្រូវមាក់ងាយ គ្មានអ្នកណាអាចរំលោភលើបូរណភាពបាន
• ឯកភាពជាធ្លុងមួយ គ្មានការប្រឆាំង និងជំទាស់
• មិនមានការមើលបំណាំគ្នា ស្រះស្រួលគ្នាធ្វើទាំងព្រម
• ការពារផលប្រយោជន៍ដែលបានមកពីការសាមគ្គី
• បំបាត់នូវភាពក្រីក្រក្នុងប្រទេស ។

៥. សាមគ្គីភាព គឺជាបែបបទ ឬរបៀបនៃការព្រមព្រៀងគ្នា ។ សាមគ្គីរស គឺជារសនៃសាមគ្គីមានន័យថាការព្រមព្រៀងគ្នាដោយការពេញចិត្ត និងការស្រលាញ់រាប់អានគ្នាទៅវិញទៅមក ។