សំណួរ-ចម្លើយ ចំណេះដឹងរដ្ឋបាល វិស័យការងារ និងបណ្តុះបណ្តាលវិជ្ជាជីវៈ (ភាគ១៧)

សំណួរ

៨១- តើគោលការណ៍គាំពារសុខភាពមានអ្វីខ្លះ ?

៨២- ហេតុអ្វីបានជារាជរដ្ឋាភិបាលចាត់ទុក " វិស័យឯកជនជាក្បាលរថភ្លើងនៃកំណើនសេដ្ឋកិច្ច" សម្រាប់ការអភិវឌ្ឍវិស័យឯកជននិងការងារនៅកម្ពុជាដូចដែលបានចែងក្នុងយុទ្ធសាស្ត្រចតុកោណដំណាក់កាលទី៣ ?

៨៣- តើយុទ្ធសាស្ត្រ "អភិវឌ្ឍន៍ទីផ្សារការងារ" របស់រាជរដ្ឋាភិបាលបានគ្របដណ្តប់លើចំណុចសំខាន់ៗអ្វីខ្លះ ?

៨៤- តើក្របខ័ណ្ឌគុណវុឌ្ឍជាតិកម្ពុជា ត្រូវបានបង្កើតឡើងក្នុងគោលបំណងអ្វី ?

៨៥- មានមតិជាច្រើនក្នុងសង្គមខ្មែរបច្ចុប្បន្នយល់ថា ការសិក្សាផ្នែកអប់រំបណ្តុះបណ្តាលបច្ចេកទេស និងហាក់មិនមានឧត្តមភាពសម្រាប់ការងារ ឬឋានៈសង្គម ដូចការសិក្សាផ្នែកឧត្តមសិក្សានោះទេ ។ ចូរបកស្រាយ ។

ចម្លើយ

៨១- គោលការណ៍គាំពារសុខភាពមានដូចជា ៖ វិសាលភាពគ្របដណ្តប់ប្រជាជនជាសាកល វិសាលភាពកញ្ចប់ តាវកាលិកជាសាកល វិសាលភាពគ្របដណ្តប់ការគាំពារហិរញ្ញវត្ថុសាកល សមភាពហិរញ្ញប្បទាន សមភាពក្នុងប្រើប្រាស់ ចិរភាពហិរញ្ញវត្ថុ អភិបាលកិច្ចល្អ ភាពសក្តិសិទ្ធិក្នុងការគ្រប់គ្រងទូទៅនៃការគាំពារសុខភាពសង្គម និងគុណ ភាពសេវាថែទាំ ។

៨២- វិស័យឯកជនមានតួនាទីគន្លឹះក្នុងការជំរុញកំណើន និងការអភិវឌ្ឍសង្គម-សេដ្ឋកិច្ចតាមរយៈ ការចូលរួមចំណែក ធ្វើឱ្យសម្រេចនូវគោលដៅរបស់រាជរដ្ឋាភិបាល ក្នុងការធ្វើពិពិធកម្មមូលដ្ឋានផលិតកម្ម ការបញ្ចូលបច្ចេកវិទ្យាទំនើប និងគំនិតច្នៃប្រឌិតសំដៅបង្កើនប្រសិទ្ធភាព និងពង្រឹងភាពប្រកួតប្រជែងនៃសេដ្ឋកិច្ចជាតិព្រមទាំងការបង្កើតការងារ ដើម្បីកាត់បន្ថយភាពក្រីក្រនិងលើកស្ទួយជីវភាពប្រជាជន ។

         សក្តានុពល នៃការវិនិយោគរបស់វិស័យឯកជនលើគ្រប់វិស័យរាប់ទាំងវិនិយោទុនក្នុងស្រុក និងវិនិយោគផ្ទាល់ ពីបរទេសបានរួមចំណែកយ៉ាងសកម្មក្នុងការជំរុញកំណើនសេដ្ឋកិច្ច និងបង្កើនឱកាសការងារគ្រប់ប្រភេទជូនប្រជាពលរដ្ឋ ។ ជាក់ស្ដែងការហូរចូលទុនវិនិយោគផ្ទាល់ពីបរទេស ៧០០លានដុល្លារជាមធ្យមក្នុងមួយឆ្នាំ អាចបង្កើតការងារថ្មីប្រមាណ ២សែនកន្លែង ។ គ្រាន់តែវិស័យកាត់ដេរសំលៀកបំពាក់និងស្បែកជើង បានប្រើប្រាស់កម្លាំងពលកម្មដោយផ្ទាល់ប្រហែល ៦.៦៧សែននាក់ ដែលអាចផ្តល់ប្រាក់ឈ្នួលសរុបយ៉ាងតិចបំផុតជាង ១.១២០លានដុល្លារ ក្នុងឆ្នាំ២០១៦នេះ ។

៨៣- ក្នុងគោលបំណងជំរុញឱ្យគ្រប់សមាសភាគ នៃទីផ្សារការងារដំណើរការប្រកបដោយភាពស៊ីចង្វាក់គ្នានិងជួយ នគាំទ្រគ្នាទៅវិញទៅមកសំដៅលើកកម្ពស់កំណើនសេដ្ឋកិច្ច បង្កើតការងារ និងលើកស្ទួយជីវភាពប្រជាជនរាជរដ្ឋាភិបាលបានដាក់ចេញនូវយុទ្ធសាស្រ្តអភិវឌ្ឍន៍ទីផ្សារការងារដោយផ្តោតលើចំណុចអាទិភាពដូចខាងក្រោម ៖

• រៀបចំនិងអនុវត្តគោលនយោបាយជាតិស្តីពីមុខរបរនិងការងារ ដើម្បីអភិវឌ្ឍវិស័យការងារស្របតាមការ វិវត្តនៃសង្គម-សេដ្ឋកិច្ច តាមរយៈការរៀបចំកម្លាំងពលកម្មឱ្យស្របតាមតម្រូវការទីផ្សារការងារ ។
• ពង្រឹងយន្តការ "វេទិកាការងារ" ដែលមានការចូលរួមពីសំណាក់អ្នកផ្តល់ការងារ អ្នកស្វែងរកការងារ និង អ្នកផ្តល់ការអប់រំបណ្តុះបណ្តាល ក្រោមការសម្របសម្រួលរបស់រាជរដ្ឋាភិបាល សំដៅផ្លាស់ប្តូរព័ត៌មាន ប្រឹក្សាយោបល់ និងធ្វើសកម្មភាពរួមគ្នាដើម្បីឆ្លើយតបទៅនឹងស្ថានភាពទីផ្សារការងារ ។
• ពង្រីកការផ្តល់សេវាការងារនិងព័ត៌មានទីផ្សារការងារឱ្យបានទូលំទូលាយដល់ប្រជាពលរដ្ឋគ្រប់មជ្ឈដ្ឋាន
• បន្តអភិវឌ្ឍប្រព័ន្ធព័ត៌មានទីផ្សារការងារឱ្យកាន់តែល្អ ដើម្បីប្រមូលវិភាគនិងផ្សព្វផ្សាយស្ថិតិការងារ និង ព័ត៌មានពាក់ព័ន្ធដទៃទៀត ។
• អភិឌ្ឍធនធានមនុស្សផ្នែកបច្ចេកទេស ឱ្យឆ្លើយតបតាមតម្រូវការទីផ្សារការងារ និងការអភិវឌ្ឍសង្គមសេដ្ឋកិច្ច ។
• បន្តលើកកម្ពស់លក្ខខណ្ឌការងារឱ្យកាន់តែប្រសើរ តាមរយៈការពង្រឹងការអនុវត្តច្បាប់ស្តីពីការងារ និងបទដ្ឋានគតិយុត្តពាក់ព័ន្ធដទៃទៀត ។
• ពង្រឹងភាពសុខដុមរមនានៃទំនាក់ទំនងវិជ្ជាជីវៈរវាងកម្មករនិយោជិត និងនិយោជក តាមរយៈការអនុវត្ត ច្បាប់ស្តីពីសហជីព ការពង្រឹងការគោរពវិន័យការងារនិងសីលធម៌វិជ្ជាជីវៈ ការទប់ស្កាត់ និងដោះស្រាយ វិវាទការងារនិងបាតុកម្ម...។ល។

៨៤- ដើម្បីធានានិងទទួលស្គាល់គុណភាពអប់រំ ដែលប្រកបដោយសង្គតិភាពរវាងការអប់រំឧត្តមសិក្សា និងការបណ្តុះបណ្តាលបច្ចេកទេស និងវិជ្ជាជីវៈនៅកម្ពុជា ក្របខ័ណ្ឌគុណជាតិកម្ពុជាត្រូវបានបង្កើតឡើងក្នុងគោលបំណង ដូចខាងក្រោម ៖

• ផ្តល់នូវការទទួលស្គាល់លើលទ្ធផលសិក្សា ដែលបានបញ្ចប់តាមកម្រិតគុណវុឌ្ឈនីមួយៗ ប្រកបដោយសង្គតិភាពជាតិ ។
• ជួយបង្កើតច្រកអាចបត់បែនបានដែលបង្កភាពងាយស្រួលដល់អ្នកសិក្សា ក្នុងការផ្លាស់ប្តូររវាងការអប់រំឧត្តមសិក្សា និងការអប់រំបណ្តុះបណ្តាលបច្ចេកទេសនិងវិជ្ជាជីវៈ ។
• ផ្តល់ភាពបត់បែនទៅតាមគោលបំណងនៃជម្រើសសិក្សាសម្រាប់ការអប់រំឧត្តមសិក្សា និងការបណ្តុះបណ្តាលបច្ចេកទេសនិងវិជ្ជាជីវៈ ។
• លើកទឹកចិត្តឱ្យមានការបង្កើន និងពង្រីកចំណេះដឹងនិងជំនាញតាមរយៈការអប់រំឧត្តមសិក្សា និងការបណ្តុះបណ្តាលដែលរួមចំណែកដល់ការសិក្សាពេញមួយជីវិត ។
• ជំរុញការផ្តល់គុណភាពអប់រំ និងការបណ្តុះបណ្តាល ដែលឆ្លើយតបតាមតម្រូវការរបស់បុគ្គលទីកន្លែងការងារនិងវិជ្ជាជីវៈ ។
• លើកកម្ពស់ការទទួលស្គាល់គុណវុឌ្ឍ ដែលចេញនៅក្នុងព្រះរាជាណាចក្រកម្ពុជាទាំងកម្រិតអន្តរជាតិ ។

៨៥- ប្រទេសកម្ពុជាបានបែងចែកការអប់រំជា ពីរ ច្រកគឺ ៖ ការអប់រំឧត្តមសិក្សា និងការអប់រំបណ្តុះបណ្តាលបចេ្ចកទេសនិងវិជ្ជាជីវៈ ។ កន្លងមកស្ថិតិរបស់ក្រសួងអប់រំយុវជន និងកីឡា បានបង្ហាញថាអត្រាចូលរៀនរបស់សិស្សកម្រិត បរិញ្ញាបត្រភាគច្រើនប្រមូលផ្តុំលើមុខវិជ្ជាឯកទេសផ្នែកសង្គម សេដ្ឋកិច្ច និងការគ្រប់គ្រងធុរកិច្ច ភាសាបរទេស និងព័ត៌មានវិទ្យាជាដើម ។ ចំណែកមុខវិជ្ជាបែបវិទ្យាសាស្ត្រ និងវិស្វកម្ម ហាក់មានអត្រាចូលរៀនទាប ។ បន្ថែមលើនេះការអប់រំបណ្តុះបណ្តាលបច្ចេកទេសនៅតាមគ្រឹះស្ថាន ដែលស្ថិតក្រោមក្រសួងការងារ និងបណ្តុះបណ្តាលវិជ្ជាជីវៈ ក៏មានចំនួនសិស្សចូលរៀនទាបផងដែរ ។

         ប៉ុន្តែប្រសិនក្រឡេកមើលពីស្ថានភាពក្នុងទីផ្សារការងារវិញ ក្រុមហ៊ុនសហគ្រាសការវិនិយោគ និងវិស័យ ឧស្សាហកម្មមានតម្រូវការកម្លាំងពលកម្ម ដែលមានជំនាញបែបបច្ចេកទេសច្រើនលើសលប់ ។ ដូច្នេះកត្តានេះបណ្តាលឱ្យមានគម្លាតជំនាញនៅក្នុងទីផ្សារការងារកម្ពុជា ។ ការពិតមានមូលហេតុជាច្រើន ដែលនាំកើតឡើងនូវបញ្ហានេះ ប៉ុន្តែក្នុងចំណោមនោះ ទស្សនៈអវិជ្ជមាន ចំពោះការអប់រំបណ្តុះបណ្តាលបច្ចេកទេសនិងវិជ្ជាជីវៈ ពីសំណាក់សិស្សនិស្សិត អាណាព្យាបាល និងមហាជនដែលយល់ថាការសិក្សាប្រភេទនេះមានកម្រិតសញ្ញាបត្រ ឬឧត្តមភាពទាបជាងកម្រិតឧត្តមសិក្សា ។ ឧទាហរណ៍ មនុស្សភាគច្រើនយល់ថាអ្នកបញ្ចប់ការសិក្សាផ្នែកបណ្តុះបណ្តាលបច្ចេកទេស គឺច្រើនតែបំពេញការងារជាកម្មករជំនាញ ។ ទស្សនៈនេះពុំបានពិនិត្យមើលគ្រប់ជ្រុងជ្រោយចំពោះអត្ថប្រយោជន៍ នៃជំនាញបច្ចេកទេសនោះឡើយ ជាពិសេសពុំបានគិតដល់ឱកាសការងារ និងតម្រូវការក្នុងទីផ្សារការងារ ព្រមទាំងលទ្ធភាពក្នុងការបង្កើនប្រាក់ចំណូលដោយឆាប់រហ័សនោះឡើយ ។

         អាស្រ័យដោយកំណើនការងារក្នុងវិស័យឧស្សាហកម្ម នៅមានសន្ទុះខ្លាំងក្លាធៀបនឹងវិស័យដទៃទៀតដូច្នេះ តម្រូវការវិស្វករអ្នកបច្ចេកទេស និងកម្មករជំនាញ ដើម្បីបម្រើការក្នុងវិស័យនេះបាននឹងកំពុងស្រូបទាញយកអ្នកបញ្ចប់ការសិក្សាជំនាញបច្ចេកទេសយ៉ាងច្រើនចូលទីផ្សារ ដែលបានបើកឱកាសទូលាយក្នុងការឆាប់ទទួលបានការងារប្រកបដោយភាពប្រកួតប្រជែង និងបង្កើតប្រាក់ចំណូលសម្រាប់លើកកម្ពស់ជីវភាពគ្រួសារ ។

តភាគ