សំណួរ-ចម្លើយ មូលដ្ឋានគ្រឹះនៃពន្ធដារ (ភាគ១)

សំណួរ

១- តើរដ្ឋធ្វើការប្រមូលពន្ធក្នុងគោលបំណងអ្វីខ្លះ ?

២- តើមុខងាររបស់ពន្ធដារមានប៉ុន្មាន ?

៣- តើពន្ធដារជះឥទិ្ធពលដល់សេដ្ឋកិច្ចប៉ុន្មានផ្នែក ? ចូររៀបរាប់ ។

៤- តើពន្ធមានចំណាត់អ្វីខ្លះ ?

៥- តើអ្វីទៅហៅថាពន្ធលើវត្ថុ ?

ចម្លើយ

១- រដ្ឋធ្វើការប្រមូលពន្ធក្នុងគោលបំណងជាច្រើនដូចជា ៖

• ការប្រមូលពន្ធត្រូវផ្សារភ្ជាប់យ៉ាងជិតស្និទ្ធិទៅនឹងរចនាសម្ព័ន្ធសង្គមសេដ្ឋកិច្ច និងនយោបាយ
• ការប្រមូលពន្ធដើម្បីធានាការចំណាយរបស់រដ្ឋ
• ការប្រមូលពន្ធដើម្បីបែងចែកឡើងវិញនូវចំណូលរបស់ជាតិ
• ការប្រមូលពន្ធគឺជាប្រភពចំណូលសំខាន់របស់ជាតិ
• ការប្រមូលពន្ធដើម្បីសងបំណុលរបស់រដ្ឋ ។

២- មុខងាររបស់ពន្ធដារមានដូចជា ៖

• មុខងារហិរញ្ញវត្ថុរបស់ពន្ធដារ
• មុខងារសេដ្ឋកិច្ចរបស់ពន្ធដារ
• មុខងារសង្គមរបស់ពន្ធដា ។

៣- ពន្ធដារជះឥទិ្ធពលដល់សេដ្ឋកិច្ចពីរផ្នែកគឺ ៖

• ផលិតកម្ម (Production) ៖ ពន្ធដារការពារឧស្សាហកម្មក្នុងស្រុក ។ ប្រសិនបើអត្រាពន្ធត្រូវបង់ជូនរដ្ឋខ្ពស់នោះបំណង ឬលទ្ធភាពនៃការវិនិយោគថយចុះ ក៏ប៉ុន្តែប្រសិនបើអត្រាពន្ធត្រូវបង់ជូនរដ្ឋថយចុះនោះចំណង ឬលទ្ធភាពនៃការវិនិយោគកើនឡើងដែរ ។
• ការប្រើប្រាស់ (Consumption) ៖ ពន្ធដារជះឥទ្ធិពលដល់បរិមាណប្រាក់ចំណូលរបស់បុគ្គលម្នាក់ៗ ប្រសិនបើអត្រាពន្ធមានការប្រែប្រួល ។ ប្រព័ន្ធពន្ធដារដែលល្អ គឺជាប្រព័ន្ធពន្ធដែលធ្វើឲ្យគម្លាតរវាងអ្នកមាននិងអ្នកក្រនៅជិតបំផុត ។ វត្ថុប្រើប្រាស់ចាំបាច់ខ្ពស់ ដូចជា គ្រឿងឧបភោគ បរិភោគប្រចាំថ្ងៃ កម្រត្រូវបានគិតពន្ធ ។

៤- ពន្ធមានចំណាត់ដូចជា ៖

• ចំណាត់ថ្នាក់រដ្ឋបាល
• ចំណាត់ថ្នាក់សេដ្ឋកិច្ច
• ចំណាត់ថ្នាក់បច្ចេកទេស ។

៥- ពន្ធលើវត្ថុ គឺជាពន្ធដែលគិតលើទ្រព្យសម្បត្តិរបស់អ្នកជាប់ពន្ធ ដោយមិនយកចិត្តទុកដាក់លើរូបបុគ្គលរបស់អ្នកជាប់ពន្ធទេ ។