សំណួរ-ចម្លើយ ច្បាប់ភូមិបាល (ភាគ៤)

សំណួរ

១៦- តើនីតិបុគ្គលនៃនីតិសាធារណៈសំដៅដល់អ្វី ?

១៧- តើប័ណ្ណសំដៅដល់អ្វី ?

១៨- តើប្លង់សុរិយោដី ឬផែនទីសុរិយោដី ឬប្លង់ក្បាលដី សំដៅដល់អ្វី ?

១៩- តើបេតិករភណ្ឌសំដៅដល់អ្វី ?

២០- តើប្រាតិភោគភណ្ឌិកសំដៅដល់អ្វី ?

ចម្លើយ

១៦- នីតិបុគ្គលនៃនីតិសាធារណៈ សំដៅដល់ក្រុមរាជការសាធារណៈ ។ ឧទាហរណ៍ រដ្ឋ ខេត្ត ឃុំ ឬគ្រឹះស្ថានសាធារណៈ ដូចជា សកលវិទ្យាល័យជាដើម ។

១៧- ប័ណ្ណ សំដៅដល់លិខិតដែលមានរូបមន្តយថាភូត (ដែលមានរូបភាព និងទម្រង់ត្រឹមត្រូវតាមច្បាប់) សម្រាប់បញ្ជាក់សិទ្ធិណាមួយ ។

១៨- ប្លង់សុរិយោដី ឬផែនទីសុរិយោដី ឬប្លង់ក្បាលដី សំដៅដល់ប្លង់រួមនៃដីតំបន់ណាមួយដែលមន្រ្តីជំនាញសុរិយោដីបានវាស់វែង គូរបំពេញយ៉ាងត្រឹមត្រូវ និងគ្រប់គ្រាន់តាមបទដ្ឋានបច្ចេកទេស ហើយដាក់លេខក្បាលដី ឬដីឡូត៍យ៉ាងច្បាស់លាស់ ។

១៩- បេតិករភណ្ឌ សំដៅដល់ទ្រព្យដែលជនម្នាក់ៗមាន និងបំណុលដែលជនម្នាក់ៗជំពាក់គេ ។ ទាំងទ្រព្យទាំងបំណុលរបស់ជនម្នាក់ៗហៅថា “បេតិកភណ្ឌ” ។

២០- ប្រាតិភោគភណ្ឌិក សំដៅដល់ការយកទ្រព្យទៅធានាបំណុល ។ ឧទាហរណ៍ ការបញ្ចាំស្រែជាប្រាតិភោគភណ្ឌិកអចលវត្ថុ ។ ការបញ្ចាំខ្សែមាសជាប្រាតិភោគភណ្ឌិកចលនវត្ថុ ។ (ក្រមរដ្ឋប្បវេណីចាស់ប្រើប្រាតិភោគប្រត្យក្ស)

តភាគ