សំណួរ-ចម្លើយ ច្បាប់ស្តីពីគយ (ភាគ១)

សំណួរ

១- តើប្រទេសដើមកំណើតគឺជាអ្វី ?

២- តើគយឬរដ្ឋបាលគយគឺជាអ្វី ?

៣- តើការបំពេញបែបបទបញ្ចេញទំនិញពីគយគឺជាអ្វី ?

៤- តើទំនិញគ្មានការទាមទារគឺជាអ្វី ?

៥- តើកន្លែងបំពេញបែបបទបញ្ចេញទំនិញពីគយគឺជាអ្វី ?

ចម្លើយ

១- ប្រទេសដើមកំណើត គឺជាប្រទេសដែលទំនិញត្រូវបានផលិត ឬកែច្នៃស្របតាមលក្ខណវិនិច្ឆ័យ ដែលមានចែងសម្រាប់ជាគោលបំណងនៃការប្រើប្រាស់តារាងពន្ធគយ ស្របតាមការកម្រិតកំណត់លើបរិមាណ ឬករណីផ្សេងទៀតដែលពាក់ព័ន្ធនឹងវិស័យពាណិជ្ជកម្ម ។

២- គយឬរដ្ឋបាលគយ គឺសំដៅលើទីចាត់ការគយ និងរដ្ឋាករនៃក្រសួងសេដ្ឋកិច្ចនិងហិរញ្ញវត្ថុ ដោយរាប់បញ្ចូលមន្រ្តីគយដែលទទួលខុសត្រូវក្នុងការគ្រប់គ្រងត្រួតពិនិត្យ ការអនុវត្តច្បាប់គយ​ ការប្រមូលពន្ធ អាករ និងកម្រៃផ្សេងៗ ព្រមទាំងទទួលខុសត្រូវផងដែរក្នុងការអនុវត្តច្បាប់ និងបទប្បញ្ញត្តិផ្សេងទៀត ដែលទាក់ទងនឹងការនាំចេញ ឬនាំចូលចរាចរ និងសន្និធិទំនិញ ។

៣- ការបំពេញបែបបទបញ្ចេញទំនិញពីគយ គឺជាការបំពេញនូវទម្រង់ការគយចាំបាច់នានា​ ដើម្បីទទួលបានការអនុញ្ញាតឲ្យទំនិញអាចដាក់ឲ្យប្រើប្រាស់បានក្នុងប្រទេសអាចឲ្យនាំចេញ ឬដាក់ក្រោមរបបគយមួយផ្សេងទៀតបាន ។

៤- ទំនិញគ្មានការទាមទារគឺជា ៖

• ទំនិញរក្សាទុកក្នុងទីកន្លែងសន្និធិគយបណ្តោះអាសន្ន ឬនៅក្នុងភណ្ឌាគារគយមានដែនកំណត់ ដែលហួសរយៈពេលកំណត់ក្រោមបញ្ញត្តិនៃច្បាប់នេះ ។
• ទំនិញផ្ញើតាមប្រៃសណីយ៍ដែលគម្យជនបដិសេធមិនទទួលយក ឬគម្យជនពុំត្រូវបានរកឃើញ និងមិនអាចបញ្ចូនទំនិញត្រឡប់ទៅអ្នកផ្ញើវិញបាន ។
• ទំនិញ និងមធ្យោបាយដឹកជញ្ជូនពុំជាប់អាយ័ត ដែលស្ថិតនៅក្នុងកន្លែងបញ្ចេញទំនិញពីគយ ហើយម្ចាស់បានបោះបង់ចោលជាលាយល័ក្ខណ៍អក្សរ ។

៥- កន្លែងបំពេញបែបបទបញ្ចេញទំនិញពីគយ គឺជាកន្លែងដែលស្ថិតនៅក្រោមការគ្រប់គ្រង ការឃ្លាំមើលដោយរដ្ឋបាលគយ ។