សំណួរ-ចម្លើយ កិច្ចការពារអ្នកប្រើប្រាស់ (ភាគ១)

សំណួរ

១- តើការទទួលបានសំដៅដល់អ្វី ?

២- តើការផ្សាយពាណិជ្ជកម្មសំដៅដល់អ្វី ?

៣- តើបញ្ញត្តិករមានសមត្ថកិច្ចសំដៅដល់អ្វី ?

៤- តើធុរកិច្ចសំដៅដល់អ្វី ?

៥- តើអ្នកប្រើប្រាស់សំដៅដល់អ្វី ?

ចម្លើយ

១- ការទទួលបាន សំដៅដល់ការទទួលបានទំនិញនិងសិទ្ធិប្រត្យក្សលើអចលនទ្រព្យតាមរយៈអំណោយ ការទិញលក់ ការដោះដូរ ឬតាមការព្រមព្រៀងផ្សេងៗទៀត ព្រមទាំងការទទួលបានសេវាតាមរយៈការព្រមព្រៀងនានា ។

២- ការផ្សាយពាណិជ្ជកម្ម សំដៅដល់ការផ្សព្វផ្សាយជាសាធារណៈ ឬការផ្សព្វផ្សាយទៅកាន់ក្រុមណាមួយក្នុងចំណោមសាធារណជនទោះតាមទម្រង់ណាក៏ដោយ ក្នុងគោលបំណងជម្រុញការផ្គត់ផ្គង់ទំនិញ ឬសេវា ឬការលក់ ឬការផ្តល់សិទ្ធិប្រត្យក្សលើអចលនទ្រព្យ ។

៣- បញ្ញត្តិករមានសមត្ថកិច្ច សំដៅដល់ដល់ក្រសួង ស្ថាប័នណាមួយដែលមានមុខងារនិងតួនាទីការពារសិទ្ធិនិងផលប្រយោជន៍ស្របច្បាប់របស់អ្នកប្រើប្រាស់ក្រោមការទទួលខុសត្រូវរបស់ខ្លួន ។

៤- ធុរកិច្ចសំដៅដល់សកម្មភាពដែល ៖

• ទំនិញឬសេវាត្រូវបានទទួលឬផ្គត់ផ្គង់ ឬដែលសិទ្ធិប្រត្យក្សលើអចលនទ្រព្យ ត្រូវបានទទួល ឬបោះបង់ ឬ
• បានធ្វើឡើងតាមវិធីដែលមានការរៀបចំនិងមានភាពច្បាស់លាស់ ឬ
• បុគ្គលធ្វើសកម្មភាពនោះមានគោលបំណងរកប្រាក់ចំណេញទោះបីជាសកម្មភាពដែលបានធ្វើដោយបុគ្គលនោះជាសកម្មភាពចម្បង ឬបន្ទាប់បន្សំ ឬមិនធ្វើជាប្រចាំក៏ដោយ ។

៥- អ្នកប្រើប្រាស់សំដៅដល់បុគ្គលដែលទទួលបានទំនិញឬសេវា ៖

ក- ដែលជាធម្មតាយកទៅប្រើប្រាស់ជាលក្ខណៈផ្ទាល់់ខ្លួន ក្នុងផ្ទះ ឬក្នុងគ្រួសារ និង

ខ- ក្នុងគោលបំណង ៖

• មិនផ្គត់ផ្គង់បន្តក្នុងការធ្វើពាណិជ្ជកិច្ច ឬ
• មិនប្រើប្រាស់ក្នុងដំណើរការចង្វាក់ផលិតកម្មឬការផលិត ឬ
• មិនប្រើប្រាស់ទំនិញក្នុងសកម្មភាពពាណិជ្ជកម្ម ដូចជា ដើម្បីជួសជុលអគារឬយកទៅធ្វើជាវត្ថុតាំងភ្ជាប់លើអចលនទ្រព្យ ។