វិញ្ញាសាផែនដី ប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា ( វិញ្ញាសាទី៦៧ )

សំនួរ

១. តើថាមពលកម្តៅដីជាអ្វី ?

២. ចូរពណ៌នាពីធ្យោបាយប្រើប្រាស់ថាមពលកម្តៅដី ។

៣. នៅក្នុងមណ្ឌលអាកាសរចល់មានផ្ទុកសមាសធាតុអ្វីខ្លះ ?

៤. នៅក្នុងមណ្ឌលអាកាសរចល់ តើឧស្ម័នផ្ទះកញ្ចក់ដែលមានវត្តមានដោយធម្មជាតិមានអ្វីខ្លះ ?

៥. តើវត្តមានឧស្ម័នផ្ទះកញ្ចក់នៅក្នុងមណ្ឌលអាកាសរចល់ជួយរក្សាផែនដីដូចម្តេច ?

ចម្លើយ

១. ថាមពលកម្តៅដី គឺជាថាមពលដែលបានមកពីផ្នែកខាងក្នុងនៃផែនដី ។

២. ថាមពលកម្តៅដីត្រូវបានគេប្រើប្រាស់តាមមធ្យោបាយដូចជា ៖

• វិធីទាញយកថាមពលពីចំហាយទឹកក្តៅដែលភាយចេញពីផែនដីតាមរយៈទឹកក្តៅផុសពីក្នុងដី
• វិធីសិលាស្ងួត និងក្តៅគឺគេទាញយកចំហាយទឹកក្តៅពីក្នុងដី តាមរយៈការខួងអណ្តូង ឬរណ្តៅទៅក្នុងជម្រៅដី ។ ចំហាយនិងទឹកក្តៅបានបញ្ជូនទៅជនិតាអគ្គិសនីនៅក្នុងរោងចក្រ ។

៣. នៅក្នុងមណ្ឌលអាកាសរចល់មានផ្ទុកសមាសធាតុដូចជា ៖ អាសូត ៧៨% អុកស៊ីសែន ២១% ឧស្ម័នកាបូនិច ០.០៣% និងឧស្ម័នផ្សេងៗទៀត  ។

៤. នៅក្នុងមណ្ឌលអាកាសរចល់ ឧស្ម័នផ្ទះកញ្ចក់ដែលមានវត្តមាន​ដោយធម្មជាតិរួមមាន ៖ ទឹក ឧស្ម័នកាបូនិច ឌីអាសូតម៉ូណូអុកស៊ីត មេតាន អូសូន និងក្លរ៉ូភ្លុយអរ៉ូកាបូន ។

៥. វត្តមានឧស្ម័នផ្ទះកញ្ចក់នៅក្នុងមណ្ឌលអាកាសរចល់ជួយរក្សាឲ្យមានលំនឹងសីតុណ្ហភាពមធ្យមលើផ្ទៃផែនដីនៅត្រឹម ១៦អង្សាសេ ។ បើគ្មានឧស្ម័នផ្ទះកញ្ចក់ទេ នោះផែនដីនឹងទៅជាភពត្រជាក់ជាមិនខានឡើយ ។