សំណួរ-ចម្លើយ សេដ្ឋកិច្ច (ភាគ១២)

សំណួរ

៥៦- តើថ្លៃធនធានសេដ្ឋកិច្ចសំដៅលើអ្វី ?

៥៧- ដូចម្តេចដែលហៅថា កត្តាសេដ្ឋកិច្ចដ៏សំខាន់ក្នុងការកំណត់អត្រាប្តូរប្រាក់ ?

៥៨- តើការចង់បានឬការប៉ងប្រាថ្នារបស់អ្នកទិញសំដៅលើអ្វី ?

៥៩- ចូរបង្ហាញពីលក្ខណៈនៃសេដ្ឋកិច្ចទីផ្សារនិងសេដ្ឋកិច្ចបែបផែនការ ។

៦០- ដូចម្តេចដែលហៅថា ការប្រកួតប្រជែងពេញលេញ ?

ចម្លើយ

៥៦- ថ្លៃធនធានសេដ្ឋកិច្ច សំដៅលើការចំណាយតិចលើវត្ថុធាតុដើម ទំនិញវិនិយោគ (គ្រឿងម៉ាស៊ីន) កម្លាំងពលកម្ម (វិស្វករ កម្មករ...) ។

៥៧- ដែលហៅថា កត្តាសេដ្ឋកិច្ចដ៏សំខាន់ក្នុងការកំណត់អត្រាប្តូរប្រាក់ គឺស្ថានភាពសមតុល្យគណនីចរន្ត អត្រាសន្ទស្សន៍ទំនិញប្រើប្រាស់និងភាពខុសគ្នារវាងអត្រាការប្រាក់ ។

៥៨- ការចង់បាន ឬការប៉ងប្រាថ្នារបស់អ្នកទិញ សំដៅលើសេរីភាពក្នុងការជ្រើសរើសទំនិញ ដែលគេយល់ថាមានតម្លៃសមស្របនិងបំពេញនូវសេចក្តីត្រូវការរបស់គេ ។

៥៩- ការបង្ហាញលក្ខណៈនៃសេដ្ឋកិច្ចទីផ្សារ និងសេដ្ឋកិច្ចបែបផែនការគឺ ៖

          ក­- លក្ខណៈនៃសេដ្ឋកិច្ចទីផ្សារ

• មានកម្មសិទ្ធឯកជន (មធ្យោបាយផលិតកម្ម)
• យន្តការទីផ្សារជាអ្នកសម្របសម្រួល និងគ្រប់គ្រងសកម្មភាពសេដ្ឋកិច្ច
• រដ្ឋមិនលូកដៃចូលក្នុងសកម្មភាពសេដ្ឋកិច្ច ក្នុងករណីសេដ្ឋកិច្ចដំណើរការល្អ
• រដ្ឋជាអ្នករៀបចំក្របខ័ណ្ឌច្បាប់ និងស្ថាប័ន ដើម្បីដំណើរការទីផ្សារ ឬសេដ្ឋកិច្ចប្រព្រឹត្តទៅបានល្អក្នុងបរិយាកាសប្រកួតប្រជែង
• រដ្ឋមិនកំណត់ថ្លៃ តម្រូវការ និងការផ្គត់ផ្គង់ជាអ្នកកំណត់ថ្លៃ ។

         ខ- លក្ខណៈនៃសេដ្ឋកិច្ចបែបបផែនការ

• រដ្ឋជាម្ចាស់កម្មសិទ្ធលើមធ្យោបាយផលិតកម្ម
• យន្តការគ្រប់គ្រង ​និងសម្របសម្រួលគឺអាស្រ័យលើអ្នកធ្វើផែនការ
• មធ្យោបាយ និងសកម្មភាពផលិកកម្ម ស្ទើរតែទាំងអស់ស្ថិតក្រោមការគ្រប់គ្រងរបស់រដ្ឋ
• រដ្ឋកំណត់ថ្លៃ
• រដ្ឋអន្តរាគមន៍​ក្នុងសកម្មភាពសេដ្ឋកិច្ច ។

៦០- ដែលហៅថា ការប្រកួតប្រជែងពេញលេញ គឺជាទីផ្សារមួយដែលនៅក្នុងនោះ អ្នកលក់និងអ្នកទិញជឿថាគេមិនអាចគ្រប់ គ្រងលើថ្លៃទំនិញ សេវា និងបរិមាណផលិតផលក្នុងទីផ្សារបានឡើយ ។

តភាគ